Student Fest | മഞ്ചേശ്വരം മള്ഹറിൽ 'അല്‍ ഖലം' വിദ്യാർഥി ഫെസ്റ്റിന് വ്യാഴാഴ്ച തുടക്കമാവും; 4 ദിവസങ്ങളിലായി പ്രതിഭകൾ മാറ്റുരയ്ക്കും; സാഹിത്യ അവാര്‍ഡ് സമ്മാനിക്കും

കാസർകോട്: (www.kasargodvartha.com) മഞ്ചേശ്വരം മള്ഹര്‍ വിദ്യാർഥി ഫെസ്റ്റ് 'അല്‍ ഖലം 2022'ന് വ്യാഴാഴ്ച മള്ഹര്‍ കാംപസിൽ തുടക്കം കുറിക്കുമെന്ന് സംഘാടകർ വാർത്താസമ്മേളനത്തിൽ അറിയിച്ചു. സാംസ്‌കാരിക വിദ്യാഭ്യാസ മേഖലകളില്‍ പിന്നാക്കം നില്‍ക്കുന്ന അതിർത്തി ഗ്രാമങ്ങളുടെ പ്രതീക്ഷയായി വളർന്നു വരുന്ന മള്ഹർ നൂരിൽ ഇസ്ലാമി തഅലീമി സ്ഥപന വിദ്യാർഥി കൂട്ടായ്മയാണ് ഫെസ്റ്റ് ഒരുക്കുന്നത്. നാല് ദിവസം നീണ്ടുനില്‍ക്കുന്ന ഫെസ്റ്റ് 11ന് ഞായറാഴ്ച സമാപിക്കും. എട്ടിന് വൈകിട്ട് നാല് മണിക്ക് മള്ഹര്‍ വൈസ് ചെയര്‍മാന്‍ സയ്യിദ് അബ്ദുർ റഹ്‌മാന്‍ ശഹീര്‍ അല്‍ ബുഖാരി പതാക ഉയര്‍ത്തും.
6.30ന് സയ്യിദ് മുസ്ത്വഫ സിദ്ദീഖി മമ്പുറം പ്രാരംഭ പ്രാർഥന നടത്തും. ദഅവാ അഡ്മിനിസ്‌ട്രേറ്റര്‍ ഹസന്‍ സഅദി അല്‍ അഫ്‌ളലിയുടെ അധ്യക്ഷതയില്‍ മള്ഹര്‍ ജെനറല്‍ സെക്രടറി സയ്യിദ് അഹ്‌മദ് ജലാലുദ്ദീന്‍ സഅദി അല്‍ ബുഖാരി ഉദ്ഘാടനം ചെയ്യും. കേരള മാപ്പിള കലാ അകാഡമി വൈസ് പ്രസിഡൻ്റ് നാസിര്‍ മേച്ചേരി മുഖ്യാതിഥിയാകും. എകെഎം അശ്റഫ് എംഎല്‍എ, ഫാറൂഖ് പൊസോട്ട്, ബശീര്‍ പുളിക്കൂര്‍, സിദ്ദീഖ് മോണ്ടുഗോളി, മുസ്ത്വഫ നഈമി, ഖാരീ യുസുഫ് ലത്വീഫി മാണിയമ്പലം തുടങ്ങിയവര്‍ സംബന്ധിക്കും. 10,000 രൂപയും പ്രശസ്തി പത്രവും അടങ്ങുന്ന പ്രഥമ അല്‍ ഖലം സാഹിത്യ അവാര്‍ഡ് ചടങ്ങിൽ സമ്മാനിക്കും.