വാഹനങ്ങളുടെ രേഖകളെല്ലാം കൃത്യമാണെങ്കില്‍ നിങ്ങള്‍ക്ക് ലഭിക്കും 1 ലിറ്റര്‍ പെട്രോളും ഒപ്പം മധുരവും സമ്മാനം; ഈ സൗഭാഗ്യം ഒരാഴ്ച മാത്രം

കാസര്‍കോട്: (www.kasargodvartha.com 07.02.2019) വാഹനങ്ങളുടെ രേഖകളെല്ലാം കൃത്യമാണെങ്കില്‍ നിങ്ങള്‍ക്ക് ലഭിക്കും ഒരു ലിറ്റര്‍ പെട്രോളും ഒപ്പം മധുരവും. കാസര്‍കോട് ട്രാഫിക് പോലീസും സി ടി എം പെട്രോള്‍ പമ്പും ചേര്‍ന്ന് ട്രാഫിക് വാരാചരണത്തിന്റെ ഭാഗമായാണ് ബോധവത്കരണത്തിന്റെ ഭാഗമായി ഈ നൂതന പദ്ധതി നടപ്പിലാക്കിയത്. ഓട്ടോറിക്ഷകള്‍ക്കും ബൈക്ക്- സ്‌കൂട്ടര്‍ യാത്രക്കാര്‍ക്കുമാണ് പരിശോധനയ്ക്കിടെ രേഖകള്‍ കൃത്യമാണെങ്കില്‍ പെട്രോളും മധുരവും സമ്മാനമായി നല്‍കുന്നത്.

കാസര്‍കോട് ട്രാഫിക് എസ് ഐ ശശികുമാറിന്റെ നേതൃത്വത്തിലാണ് പഴയ പ്രസ് ക്ലബ് ജംഗ്ഷനില്‍ പരിശോധന നടത്തിയത്. രേഖകളെല്ലാം കൃത്യമായി സൂക്ഷിച്ച 27 പേര്‍ക്ക് പെട്രോളും മധുരവും നല്‍കി. ഒരാഴ്ച ഇത്തരത്തില്‍ പരിശോധന നടത്തുമെന്നും രേഖകളെല്ലാം ശരിയായി സൂക്ഷിച്ചവര്‍ക്ക് പെട്രോളും മധുരവും സമ്മാനമായി നല്‍കുമെന്ന് കാസര്‍കോട് ട്രാഫിക് എസ് ഐ ശശികുമാര്‍ കാസര്‍കോട് വാര്‍ത്തയോട് പറഞ്ഞു.