Ranipuram | മഞ്ഞും പച്ചയണിഞ്ഞ മലകളും പിന്നെ ട്രക്കിങ്ങും; അവധിക്കാലം ആഘോഷമാക്കാൻ റാണിപുരത്തേക്ക് യാത്ര തിരിക്കാം

കേരള-കർണാടക അതിർത്തിയോട് ചേർന്ന് കോട്ടഞ്ചേരി-തലകാവേരി മലനിരകളിലാണ് റാണിപുരം സ്ഥിതി ചെയ്യുന്നത്. കാവേരി നദി ഉത്ഭവിക്കുന്ന തലക്കാവേരി പർവതനിരകളുടെ കാഴ്ചകൾ തരുന്ന നിരവധി ട്രക്കിംഗ് പാതകളും റാണിപുരത്തുണ്ട്. ഇടതൂർന്ന വനത്തിലൂടെയുള്ള നടത്തം ഒരാൾക്ക് കടന്നുപോകാവുന്ന ഏറ്റവും മറക്കാനാവാത്ത അനുഭവങ്ങളിലൊന്നാണ്. മരങ്ങൾ, പക്ഷികളുടെ കരച്ചിൽ, കല്ലിട്ട വഴികൾ എന്നിവ ഗംഭീരമാണ്. കാടിന് ചുറ്റുമുള്ള സമ്പന്നമായ സസ്യജന്തുജാലങ്ങൾ ഈ സ്ഥലത്തിന്റെ പ്രാധാന്യം വർധിപ്പിക്കുന്നു.

ഒരു മണിക്കൂറോളം നടന്നാൽ ഊട്ടിയോട് സാമ്യമുള്ള മലമുകളിൽ എത്താം. സമ്പന്നമായ ഭൂപ്രകൃതിയും താഴെ ഏക്കർ കണക്കിന് ഹരിതമാർന്ന താഴ്‌വരയും മനോഹരമായ കാഴ്ചയാണ്. 139 ഹെക്ടറില്‍ വ്യാപിച്ചുകിടക്കുന്ന ജൈവവൈവിധ്യങ്ങളുടെ വനമേഖലയാണ് റാണിപുരം. വനംവകുപ്പിന് കീഴില്‍ റാണിപുരം വനസംരക്ഷണ സമിതിക്കാണ് പരിപാലന ചുമതല. പനത്തടി പഞ്ചായത്തിൽ സ്ഥിതി ചെയ്യുന്ന റാണിപുരത്തേക്ക് ഇപ്പോൾ ഗതാഗത സംവിധാനങ്ങളും മെച്ചപ്പെട്ടിട്ടുണ്ട്.

കുടക്, കുശാല്‍നഗര്‍, മൈസൂര്‍ എന്നിവയാണ് അടുത്തുള്ള കർണാടകയിലെ പ്രദേശങ്ങൾ. വർഷത്തിൽ ഏത് സമയത്തും റാണിപുരം സന്ദർശിക്കാം. എന്നിരുന്നാലും മഴക്കാലത്ത് കനത്ത മഴ ലഭിക്കുന്ന പ്രദേശം കൂടിയാണിത്. ഏറ്റവുമടുത്ത റെയിൽവേ സ്റ്റേഷനായ കാഞ്ഞങ്ങാട് നിന്ന് 48 കിലോമീറ്റർ അകലെയാണ് റാണിപുരം. കണ്ണൂർ വിമാനത്താവളത്തിൽ നിന്ന് 107 കിലോമീറ്റർ ദൂരമുണ്ട്. പൊതു - സ്വകാര്യ യാത്രാ മാർഗങ്ങളും ലഭ്യമാണ്. വിനോദസഞ്ചാരികൾക്കായി ജില്ലാ ടൂറിസം പ്രമോഷൻ കൗൺസിൽ കോട്ടേജുകൾ ഒരുക്കിയിട്ടുണ്ട്.

Keywords: Kasaragod, Kerala, News, Top Headlines, Kanhangad, Ranipuram, Hill Station, Travel&Tourism, Sea, Forest, Ranipuram: Best hill station in Kerala.
< !- START disable copy paste -->