കുമ്പള സൂപ്പര്‍ സെവന്‍സ് ഫുട്‌ബോള്‍ ടൂര്‍ണമെന്റ്; മത്സരം പുരോഗമിക്കുന്നു

ബ്രദേഴ്‌സ് കുമ്പള നടത്തുന്ന നാങ്കി അബ്ദുല്ല മാസ്റ്റര്‍ മെമ്മോറിയല്‍ ട്രോഫിക്കുള്ള കളിക്കാരുമായി  എന്‍.എ നെല്ലിക്കുന്ന് എം.എല്‍.എ പരിചയപ്പെടുന്നു.

കുമ്പള: ബ്രദേഴ്‌സ് കുമ്പള നടത്തുന്ന നാങ്കി അബ്ദുല്ല മാസ്റ്റര്‍ മെമ്മോറിയല്‍ ട്രോഫിക്കുള്ള ഓള്‍ ഇന്ത്യ സൂപ്പര്‍ സെവന്‍സ് ഫുട്‌ബോള്‍ ടൂര്‍ണമെന്റ് മത്സരങ്ങള്‍ പുരോഗമിക്കുന്നു. ജീവകാരുണ്യ പ്രവര്‍ത്തനങ്ങള്‍ ലക്ഷ്യം വെച്ചു നടത്തുന്ന മത്സരത്തിനു നല്ല ജന പിന്തുണയാണ് ലഭിച്ചു കൊണ്ടിരിക്കുന്നത്. ദിവസവും ഓരോ നിര്‍ധന കുടുംബത്തിനു തയ്യല്‍ മെഷിന്‍ നല്‍കുന്നു.
ബഹു ഭാഷ പണ്ഡിതനും അധ്യാപകനും പത്ര പ്രവര്‍ത്തകനുമായിരുന്ന നാങ്കി അബ്ദുല്ല മാസ്റ്റരുടെ പേരിലാണ് ടൂര്‍ണമെന്റ് എന്നത് നിരവധി സ്മരണകള്‍ ഉണര്‍ത്താന്‍ പര്യാപ്തമായി.
ഏപ്രില്‍ 15ന് ഉദ്ഘാടന മത്സരത്തില്‍ ഹണ്ടേഴ്‌സ് കൂത്തുപ്പറമ്പ് വിജയികളായി. തുടര്‍ന്നുള്ള മത്സരങ്ങളില്‍ പള്ളിക്കര, എഫ്.സി ചെന്നൈ, ബ്രദേഴ്‌സ് മൊഗ്രാല്‍ പുത്തൂര്‍, ബ്രദേഴ്‌സ് ആരിക്കാടി തുടങ്ങിയവര്‍ ജേതാക്കളായി. കേരളത്തിലെയും കര്‍ണാടകയിലെയും തമിഴ്‌നാടിലെയും നിരവധി പ്രമുഖ ടീമുകള്‍ കൊമ്പ് കോര്‍ക്കുന്ന മത്സരം അക്ഷരാര്‍ഥത്തില്‍ തന്നെ കുമ്പളയെ ഉത്സവ ലഹരിയിലാക്കി.
വെള്ളിയാഴ്ച ബ്ലാക്ക് ആന്‍ഡ് വൈറ്റ് കോഴിക്കോടും ഷൂട്ടേഴ്‌സ് പടന്നയും തമ്മിലാണ് മത്സരം.

ബ്രദേഴ്‌സ് കുമ്പള നടത്തുന്ന നാങ്കി അബ്ദുല്ല മാസ്റ്റര്‍ മെമ്മോറിയല്‍ ട്രോഫിക്കുള്ള കളിക്കാരുമായി മുന്‍ മുനിസിപ്പല്‍ ചെയര്‍മാന്‍ എ. അബ്ദുര്‍ റഹ്മാന്‍ പരിചയപ്പെടുന്നു.