Religion | മഹാശിവരാത്രി: ആരാധനയില്‍ വരുത്തുന്ന തെറ്റുകള്‍ പ്രാര്‍ത്ഥനകളെ നിഷ്ഫലമാക്കും; തുളസി സമര്‍പ്പിക്കുന്നത് അശുഭമായി കണക്കാക്കപ്പെടുന്നു, ഇക്കാര്യങ്ങള്‍ പ്രത്യേകം ശ്രദ്ധിക്കുക

കാസര്‍കോട്: (KasargodVartha) എല്ലാ വര്‍ഷവും ഫാല്‍ഗുന മാസത്തിലെ കൃഷ്ണപക്ഷത്തിലെ ചതുര്‍ദശിയ്ക്കാണ് മഹാശിവരാത്രി ആഘോഷിക്കുന്നത്. ഈ വര്‍ഷത്തെ മഹാശിവരാത്രി ഫെബ്രുവരി 26നാണ് വരുന്നത്. ജീവിതത്തില്‍ ഐശ്വര്യം പ്രധാനം ചെയ്യാന്‍ ഈ ദിവസം മഹാദേവനെ ആരാധിക്കുന്നതും വ്രതമനുഷ്ടിക്കുന്നതും നല്ലതാണെന്ന് വിശ്വാസികള്‍ കരുതുന്നു. 

ആചാരങ്ങള്‍ക്കനുസൃതമായി ഉപവസിച്ചും ആരാധന നടത്തിയും ശിവനെ പ്രീതിപ്പെടുത്താന്‍ ശ്രമിക്കുമ്പോള്‍ അറിയാതെ ചെയ്യുന്ന ചില കാര്യങ്ങള്‍ നമ്മള്‍ക്ക് ദോഷഫലങ്ങള്‍ ഉണ്ടാക്കുന്നു. ആരാധനയില്‍ വരുത്തുന്ന ചില തെറ്റുകള്‍ പ്രാര്‍ത്ഥനകളെ നിഷ്ഫലമാക്കും. അതിനാല്‍ താഴെ പറയുന്ന കാര്യങ്ങള്‍ പ്രത്യേകം ശ്രദ്ധിക്കുക.

തുളസിയില അര്‍പ്പിക്കരുത്: ശിവരാത്രി ദിനത്തില്‍ ദേവനെ ആരാധിക്കുമ്പോള്‍ പൂജയില്‍ തുളസിയില ഉപയോഗിക്കുന്നത് നല്ലതല്ല. വിഷ്ണുവിന്റെയും ലക്ഷ്മിയുടെയും പ്രതീകമായാണ് തുളസിയെന്ന മാതാവിനെ ഹൈന്ദവര്‍ കണക്കാക്കുന്നത്. അതിനാല്‍ ശിവലിംഗത്തില്‍ തുളസി സമര്‍പ്പിക്കുന്നത് അശുഭമായി കണക്കാക്കപ്പെടുന്നു.

കൂവളത്തിന്റെ ഇല: ശിവന് കൂവളത്തിന്റെ ഇല വളരെ ഇഷ്ടമാണ്. പക്ഷേ പൂജയില്‍ എപ്പോഴും  പൊട്ടാത്തതും കീറാത്തതുമായ പുതിയ കൂവളത്തിന്റെ ഇല ഉപയോഗിക്കുക. പഴുത്തതോ ചീത്തയോ ആയ കൂവളം അര്‍പ്പിക്കുന്നത് ആരാധനയുടെ ഫലം നല്‍കുന്നില്ലെന്നാണ് വിശ്വാസം.

പാല്‍, തേങ്ങാവെള്ളം അര്‍പ്പിക്കുന്നത്: ശിവലിംഗത്തില്‍ പാല്‍ അര്‍പ്പിക്കുന്നത് ശുഭകരമായി കണക്കാക്കുന്നു. എന്നാല്‍ പാല്‍ അര്‍പ്പിക്കാന്‍ ചെമ്പ് പാത്രം മാത്രമേ ഉപയോഗിക്കാവൂവെന്നും വെങ്കല പാത്രത്തില്‍ പാല്‍ അര്‍പ്പിക്കുന്നത് ശുഭകരമായി കണക്കാക്കില്ലെന്നും വിശ്വാസികള്‍ പറയുന്നു. ശിവരാത്രി ദിനത്തില്‍ ശിവനെ പാല്‍, വെള്ളം, തേന്‍, നെയ്യ്, തൈര് എന്നിവ കൊണ്ട് അഭിഷേകം ചെയ്യുന്നത് ഉത്തമമാണ്, എന്നാല്‍ ശിവലിംഗത്തില്‍ തേങ്ങാവെള്ളം അര്‍പ്പിക്കുന്നത് അശുഭകരമായി കണക്കാക്കപ്പെടുന്നു.

കറുത്ത വസ്ത്രങ്ങള്‍ ധരിക്കുന്നത് ഒഴിവാക്കുക: ശിവരാത്രി ദിനത്തില്‍ കറുത്ത വസ്ത്രങ്ങള്‍ കഴിവതും ഒഴിവാക്കുക. വെള്ള, മഞ്ഞ അല്ലെങ്കില്‍ ഇളം നിറങ്ങളിലുള്ള വസ്ത്രങ്ങള്‍ ധരിക്കുന്നത് ശുഭകരമായി കണക്കാക്കപ്പെടുന്നു. കറുപ്പ് നിറം നെഗറ്റീവ് എനര്‍ജിയുമായി ബന്ധപ്പെട്ടതായി കണക്കാക്കപ്പെടുന്നു, അതിനാല്‍ ദേവനെ ആരാധിക്കുന്ന നേരത്ത് ഈ നിറത്തിലുള്ള വസ്ത്രം ഒഴിവാക്കണം.

ഈ പൂക്കള്‍ അര്‍പ്പിക്കരുത്: കൈതപ്പൂവ് ഒരിക്കലും ശിവന്റെ ആരാധനാനേരത്ത് അര്‍പ്പിക്കരുത്. ഈ പൂക്കള്‍ ശിവന് അനിഷ്ടകരമായി കണക്കാക്കപ്പെടുകയും ആരാധനയില്‍ നിഷിദ്ധമാകുകയും ചെയ്യുന്നു. പൂജാവേളയില്‍ ശിവലിംഗത്തില്‍ വെളുത്ത പൂക്കള്‍ അര്‍പ്പിക്കുന്നത് ശുഭകരമായി കണക്കാക്കപ്പെടുന്നു.

ശിവലിംഗത്തിന് ചുറ്റും പ്രദക്ഷിണം പൂര്‍ത്തിയാക്കരുത്: ശിവരാത്രി ദിനത്തില്‍ ശിവലിംഗത്തെ പ്രദക്ഷിണം ചെയ്യുമ്പോള്‍ വളരെയധികം ശ്രദ്ധിക്കേണ്ടതുണ്ട്. ഒരിക്കലും ഒരു പൂര്‍ണ്ണ വൃത്തം ഉണ്ടാക്കിക്കൊണ്ട് ശിവലിംഗത്തെ പ്രദക്ഷിണം ചെയ്യരുതെന്നും മതവിശ്വാസമനുസരിച്ച്, ശിവലിംഗത്തെ പകുതി ദൂരം പ്രദക്ഷിണം ചെയ്ത ശേഷമാണ് മടങ്ങേണ്ടതെന്നുമാണ് വിശ്വാസം. പൂര്‍ണ്ണമായ പ്രദക്ഷിണം അശുഭകരമായി കണക്കാക്കപ്പെടുന്നു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് അഭിപ്രായങ്ങൾ താഴെ കമന്റ് ചെയ്യുക.

Maha Shivaratri, celebrated on February 26th this year, is a significant occasion for devotees of Lord Shiva. The article highlights key aspects of worship, cautioning against the use of tulsi leaves, certain flowers, and emphasizing the correct way to offer bilva leaves, milk, and perform the pradakshina. Avoiding black clothing is also recommended.

#MahaShivaratri, #LordShiva, #Worship, #Hinduism, #Festival, #India