അതിർത്തി കാക്കാൻ നാട്ടുകാരൻ തന്നെ എത്തുമോ; അനുകൂല തരംഗത്തിൽ പ്രതീക്ഷയർപിച്ച് എ കെ എം അശ്‌റഫ്

ഉപ്പള: (www.kasargodvartha.com 04.04.2021) മഞ്ചേശ്വരത്തെ പ്രധാന രണ്ട് മുന്നണി സ്ഥാനാർഥികൾക്കില്ലാത്ത ഒരു പ്രത്യേകത എ കെ എം അശ്‌റഫിനുണ്ട്, തനിക്ക് തന്നെ വോട് ചെയ്യാനുള്ള അവസരം. എന്നാൽ എൽഡിഎഫ്, എൻഡിഎ സ്ഥാനാർഥികൾക്ക് ആ ഭാഗ്യമില്ല. അവരാരും മഞ്ചേശ്വരം മണ്ഡലം സ്വദേശികളല്ല. ഇത് തന്നെയാണ് യുഡിഎഫിന്റെ പ്രധാന പ്രചാരണമായി മണ്ഡലത്തിൽ നിറഞ്ഞത്. അതിർത്തി കാക്കാൻ മണ്ഡലംകാരൻ തന്നെ എന്ന് മഞ്ചേശ്വരത്തെ യുഡിഎഫ് പ്രചാരണ വേദികളിൽ മുഴങ്ങി കൊണ്ടേയിരുന്നു.

എ കെ എം അശ്‌റഫിന്റെ ജനനവും വിദ്യഭ്യാസവും രാഷ്ട്രീയ വളർചയുമെല്ലാം മഞ്ചേശ്വരം മണ്ഡലത്തിലായിരുന്നു. അദ്ദേഹത്തെ പോലെ ഈ മണ്ണിനെയും മനുഷ്യരെയും അറിഞ്ഞവരല്ല എതിർ സ്ഥാനാർഥികൾ. ഇത് തന്നെയാണ് അശ്‌റഫിന്റെ കൈമുതലും. ബ്ലോക് പഞ്ചായത് പ്രസിഡന്റായിരുന്ന സമയത്ത് അദ്ദേഹം നടപ്പിലാക്കിയ വികസന പ്രവർത്തങ്ങൾ കക്ഷി രാഷ്ട്രീയ ഭേദമന്യേ ഏവരുടെയും അംഗീകാരം നേടിയിരുന്നു. മംഗൽപാടിയിലെ മഞ്ചേശ്വരം താലൂക്ക് ഹോസ്പിറ്റലിൽ അദ്ദേഹത്തിന്റെ നേതൃത്വത്തിൽ ആരംഭിച്ച ഡയാലിസിസ് സെന്റർ നിരവധി പേർക്കാണ് സാന്ത്വനമായത്.