Politics | കാസർകോട് ഡിസിസി തലപ്പത്തേക്ക് ബി എം ജമാൽ എത്തുമോ? പ്രൊഫ. ഖാദർ മാങ്ങാടിന്റെ പേരും പരിഗണനയിൽ

എം എ മുഹ്സിൻ

കാസർകോട്: (KasargodVartha) ഗുജറാത്തിൽ നടന്ന അഖിലേന്ത്യാ കോൺഗ്രസ് കമ്മിറ്റി (എഐസിസി) സമ്മേളനത്തിലെ തീരുമാനങ്ങളുടെ പശ്ചാത്തലത്തിൽ, സംസ്ഥാനത്തെ കേരള പ്രദേശ് കോൺഗ്രസ് കമ്മിറ്റിയിലും (കെപിസിസി), ജില്ലാ കോൺഗ്രസ് കമ്മിറ്റികളിലും (ഡിസിസി) വലിയ മാറ്റങ്ങൾ വരുത്താൻ കോൺഗ്രസ് ദേശീയ നേതൃത്വം ആലോചിക്കുന്നതായി സൂചന. 

പാർട്ടിയെ പുനരുജ്ജീവിപ്പിക്കാനുള്ള ഈ നീക്കങ്ങളുടെ പ്രാരംഭ പ്രവർത്തനങ്ങൾ വിവിധ സംസ്ഥാനങ്ങളിൽ ആരംഭിച്ചിട്ടുണ്ട് എന്നത് കോൺഗ്രസിന് പ്രതീക്ഷ നൽകുന്നു.

ദേശീയ തലത്തിലും വിവിധ സംസ്ഥാനങ്ങളിലെ തദ്ദേശ തിരഞ്ഞെടുപ്പുകളിലുമുണ്ടായ പരാജയങ്ങളെ തുടർന്ന്, താഴെത്തട്ടിൽ പാർട്ടിയെ ശക്തിപ്പെടുത്തേണ്ടത് അനിവാര്യമാണെന്ന തിരിച്ചറിവ് കോൺഗ്രസ് ഹൈക്കമാൻഡിനുണ്ട്. ഇതിന്റെ ഭാഗമായി ഡിസിസികളെ ശക്തിപ്പെടുത്താനുള്ള പ്രത്യേക പദ്ധതികൾ തയ്യാറാക്കിയിരിക്കുകയാണ്. 

സംസ്ഥാനത്തെ മൂന്ന് മേഖലകളായി തിരിച്ച് എഐസിസി സെക്രട്ടറിമാർ മണ്ഡലങ്ങളിൽ നേരിട്ടെത്തി സ്ഥിതിഗതികൾ വിലയിരുത്തിയിരുന്നു. സംഘടനാ ദൗർബല്യങ്ങൾ പലയിടത്തുമുണ്ടെന്നും, സംസ്ഥാനത്ത് ശക്തമായ ഭരണവിരുദ്ധ വികാരമുണ്ടെങ്കിലും അത് വോട്ടാക്കി മാറ്റാൻ കൂട്ടായ പ്രവർത്തനം വേണമെന്നും, ഇതിനായി ഡിസിസികളിൽ അഴിച്ചുപണി നടത്തേണ്ടത് അത്യാവശ്യമാണെന്നും അവർ ഹൈക്കമാൻഡിന് റിപ്പോർട്ട് നൽകിയിരുന്നു. ഈ റിപ്പോർട്ടുകളുടെ അടിസ്ഥാനത്തിലാണ് എഐസിസി സമ്മേളനത്തിൽ സംഘടനാ സംവിധാനം ഉടച്ചുവാർക്കാൻ തീരുമാനമുണ്ടായത്.

പുതിയ ഡിസിസി അധ്യക്ഷന്മാരെ നിയമിച്ചാൽ ഒരു വർഷത്തിനുള്ളിൽ ബൂത്ത്, മണ്ഡലം, ബ്ലോക്ക് ഭാരവാഹികളെ അവരുടെ യോഗ്യതയുടെ അടിസ്ഥാനത്തിൽ നിശ്ചയിക്കണമെന്നാണ് നിർദ്ദേശം. 2025 അവസാനത്തോടെ പുനഃസംഘടന പൂർത്തിയാക്കാനും നിർദ്ദേശമുണ്ട്. ഓരോ വീട്ടിലും കോൺഗ്രസ്സിന്റെ പ്രവർത്തനങ്ങളും, പദ്ധതികളും, ആശയങ്ങളും എത്തിക്കാനുള്ള ഒരു സംവിധാനം കെട്ടിപ്പടുക്കുകയാണ് പാർട്ടിയുടെ ലക്ഷ്യം. ജനകീയ മുഖങ്ങളെയും, യുവാക്കളെയും, സ്ത്രീകളെയും ആകർഷിക്കാനുള്ള പദ്ധതികൾ രൂപീകരിക്കണമെന്നും നിർദ്ദേശത്തിൽ പറയുന്നു.

ജില്ലയിൽ നിലവിലുണ്ടായിരുന്ന ഡിസിസി കമ്മിറ്റി വാർഡ് കമ്മിറ്റികൾ പുനഃസംഘടിപ്പിച്ചതായി പറയുന്നെങ്കിലും, കൂടുതലും നോമിനേറ്റ് ചെയ്ത അംഗങ്ങളാണെന്ന പരാതി ഉയർന്നിട്ടുണ്ട്. അടുത്ത തദ്ദേശ തിരഞ്ഞെടുപ്പിൽ സ്ഥാനാർത്ഥികളെ നിർണ്ണയിക്കുന്നത് അതത് വാർഡ് കമ്മിറ്റികളായിരിക്കുമെന്ന എഐസിസി നിർദ്ദേശം വന്നതോടെ, നേതാക്കൾ തങ്ങളുടെ ഇഷ്ടക്കാരുടെ പേരുകൾ എഴുതി ഡിസിസിക്ക് കൈമാറിയെന്ന ആക്ഷേപവും ശക്തമാണ്. ജില്ലയിലെ തുച്ഛമായ വാർഡ് കമ്മിറ്റികൾ മാത്രമാണ് ജനാധിപത്യ രീതിയിൽ തിരഞ്ഞെടുക്കപ്പെട്ടിട്ടുള്ളതെന്നും, ബാക്കിയുള്ളവരെല്ലാം നോമിനേറ്റ് ചെയ്യപ്പെട്ട അംഗങ്ങളാണെന്നുമാണ് പ്രധാന ആരോപണം.

ജില്ലയിലെ ഡിസിസി അധ്യക്ഷന്റെ കാര്യത്തിൽ ഇപ്പോൾ ഏകദേശ ധാരണയായതായാണ് സൂചന. കെഎസ്‌യു മുതൽ യൂത്ത് കോൺഗ്രസ്, ഡിസിസി വരെ വിവിധ തലങ്ങളിൽ പ്രവർത്തിച്ച പരിചയസമ്പത്തും, മുൻ കേന്ദ്ര വഖ്ഫ് കൗൺസിൽ സെക്രട്ടറിയുമായിരുന്ന അഡ്വ: ബി.എം. ജമാലിനെയാണ് കാസർകോട് ഡിസിസി അധ്യക്ഷ സ്ഥാനത്തേക്ക് പ്രധാനമായി പരിഗണിക്കുന്നത്. പ്രൊഫ: ഖാദർ മാങ്ങാടിന്റെ പേരും സജീവ പരിഗണനയിലുണ്ട്. ഈ വിഷയത്തിൽ ഉടൻ തന്നെ തീരുമാനമുണ്ടാകുമെന്നാണ് പാർട്ടി കേന്ദ്രങ്ങൾ നൽകുന്ന സൂചന.

അതിനിടെ, കെപിസിസി അധ്യക്ഷൻ കെ. സുധാകരനെയും മാറ്റിയേക്കുമെന്ന റിപ്പോർട്ടുകളും പുറത്തുവരുന്നുണ്ട്. എന്നാൽ അദ്ദേഹത്തെ എങ്ങനെ അനുനയിപ്പിക്കും എന്ന കാര്യത്തിൽ ഇപ്പോഴും അനിശ്ചിതത്വം നിലനിൽക്കുന്നു. തദ്ദേശ, നിയമസഭാ തിരഞ്ഞെടുപ്പുകൾ അടുത്ത് നിൽക്കുന്ന സാഹചര്യത്തിൽ, ഇങ്ങനെയുള്ള സംസ്ഥാനങ്ങളിൽ ഉടൻ പുനഃസംഘടന വേണ്ടെന്ന ഒരു അഭിപ്രായവും കോൺഗ്രസ് നേതൃത്വത്തിൽ ശക്തമായി നിലനിൽക്കുന്നുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Following AICC decisions, discussions are rife about a potential change in the Kasargod DCC leadership. Advocate B.M. Jamal is a frontrunner, with Prof. Khadar Mangad also under consideration. Changes in KPCC leadership are also speculated.

#KasargodDCC #CongressKerala #BMJamal #KhadarMangad #KeralaPolitics #LeadershipChange