Philanthropy | തലസ്ഥാനത്തെ നന്മമരം: അബ്ദുല്ല ഹാജിയുടെ ജീവകാരുണ്യ പ്രവർത്തനങ്ങളെ പ്രകീർത്തിച്ച് എകെഎം. അഷ്റഫ് എംഎൽ.എ

തിരുവനന്തപുരം: (KasargodVartha) നിയമസഭാ സമ്മേളനത്തിനിടയിൽ റമദാൻ മാസത്തിലെ തന്റെ അനുഭവങ്ങൾ പങ്കുവെച്ച് മഞ്ചേശ്വരം എം.എൽ.എ എ.കെ.എം. അഷ്റഫ്. തലസ്ഥാനത്തെ പ്രമുഖ റസ്റ്റോറന്റായ സംസമിൻ്റെ ഉടമ മണ്ണംകുഴി അബ്ദുല്ല ഹാജിയെക്കുറിച്ചും അദ്ദേഹത്തിൻ്റെ ജീവകാരുണ്യ പ്രവർത്തനങ്ങളെക്കുറിച്ചും ഫേസ്ബുക്കിൽ എഴുതിയ കുറിപ്പാണ് ഇപ്പോൾ ശ്രദ്ധേയമാകുന്നത്. മഞ്ചേശ്വരം മണ്ഡലത്തിൽ നിന്നുള്ള ആളുകളാണ് തിരുവനന്തപുരത്തെ പല റസ്റ്റോറന്റുകളും നടത്തുന്നത്.

മുൻ മുഖ്യമന്ത്രി സി.എച്ച്. മുഹമ്മദ് കോയയോടൊപ്പം പ്രവർത്തിച്ച പരിചയമുള്ള അബ്ദുല്ല ഹാജി, മുസ്ലിം ലീഗിൻ്റെ ഉന്നതനായ നേതാവാണ്. നിയമസഭയിൽ സത്യപ്രതിജ്ഞ ചെയ്ത ശേഷം എൻ.എ. നെല്ലിക്കുന്നിനോടൊപ്പം അദ്ദേഹത്തിൻ്റെ വീട്ടിൽ പോയിരുന്നു. അബ്ദുല്ല ഹാജിയുടെ മക്കളായ നാഫിയും മുന്നയും അവരുടെ സുഹൃത്ത് ആരിഫുമായി എ.കെ.എം. അഷ്റഫ് എം.എൽ.എയും എൻ.എ. നെല്ലിക്കുന്നും പതിവായി ബന്ധം പുലർത്തുന്നു. നിയമസഭാ സമ്മേളനത്തിന് ശേഷം അബ്ദുല്ല ഹാജിയുടെ വീട്ടിൽ നോമ്പ് തുറക്കുകയും അദ്ദേഹവുമായി ദീർഘനേരം സംസാരിക്കുകയും ചെയ്തു.

മുസ്ലിം ലീഗിൻ്റെ പിളർപ്പിൻ്റെ കാലത്ത് യൂണിയൻ ലീഗിനൊപ്പം ഉറച്ചുനിന്നതിൻ്റെ ഓർമ്മകളും പ്രസംഗവേദികളിലെ അനുഭവങ്ങളും അദ്ദേഹം പങ്കുവെച്ചു. മുഖ്യമന്ത്രിയുടെ ഇഫ്താർ പാർട്ടിയടക്കം അദ്ദേഹത്തിൻ്റെ മേൽനോട്ടത്തിലാണ് സംഘടിപ്പിക്കാറുള്ളത്. തിരുവനന്തപുരത്തെത്തിയാൽ അബ്ദുല്ല ഹാജിയെയും അദ്ദേഹത്തിൻ്റെ സംസം ഹോട്ടലിനെയും അറിയാത്തവർ ചുരുക്കമാണ്.

ജീവകാരുണ്യ പ്രവർത്തനങ്ങളിൽ സജീവമായ അബ്ദുല്ല ഹാജി നിരവധി പേർക്ക് സഹായം നൽകുന്നു. എ.കെ.എം. അഷ്റഫ് എം.എൽ.എയുടെ പിതാവിൻ്റെ അടുത്ത സുഹൃത്തായ അബ്ദുല്ല ഹാജിയുടെ നന്മ നിറഞ്ഞ സ്വഭാവവും സഹകരണ മനോഭാവവും അദ്ദേഹത്തിൻ്റെ മക്കളായ നാഫിയും മുന്നയും പിന്തുടരുന്നു. അബ്ദുല്ല ഹാജിയുടെ വീട്ടിൽ നിന്ന് നോമ്പ് തുറന്നിറങ്ങിയപ്പോൾ അദ്ദേഹത്തോടൊപ്പം കൂടുതൽ സമയം ചെലവഴിക്കണമെന്നും പുതുതലമുറയിലെ ലീഗ് പ്രവർത്തകർക്ക് അദ്ദേഹത്തെ പരിചയപ്പെടുത്തണമെന്നും തീരുമാനിച്ചു.

ചന്ദ്രികയിൽ ലേഖനങ്ങൾ എഴുതിയിരുന്ന അബ്ദുല്ല ഹാജി രണ്ട് പുസ്തകങ്ങളും രചിച്ചിട്ടുണ്ട്. ജീവകാരുണ്യ സാമൂഹിക സേവന രംഗത്ത് സജീവമായിരുന്ന ലണ്ടൻ മുഹമ്മദ് ഹാജിയുടെ സഹോദരനാണ് അദ്ദേഹം. അബ്ദുല്ല ഹാജിക്ക് ദീർഘായുസ്സ് ലഭിക്കട്ടെയെന്ന് പ്രാർത്ഥിച്ചുകൊണ്ടാണ് കുറിപ്പ് അവസാനിക്കുന്നത്.

തിരുവനന്തപുരത്തെ ക്യാൻസർ സെൻ്ററിലേക്കടക്കം ചികിത്സയ്ക്കായി എത്തുന്നവർക്ക് തുണയാകുന്നതും അബ്ദുല്ല ഹാജിയാണ്. തലസ്ഥാനത്തെ ഉന്നത ഉദ്യോഗസ്ഥർക്കും എം.എൽ.എമാർക്കുമെല്ലാം അബ്ദുല്ല ഹാജിയുടെ നന്മയെക്കുറിച്ച് പറയാൻ നൂറ് നാവാണ്.

എ കെ എം അശ്റഫ് എം എൽ എയുടെ ഫേസ് ബുക്ക് പോസ്റ്റിൻ്റെ പൂർണ രൂപം:

നിയമസഭ സമ്മേളനം നടക്കുന്നതിനാൽ ഇപ്രാവശ്യത്തെ റമസാനിനിന്റെ ഏറിയ പങ്കും തിരുവനന്തപുരത്താണ്.

തിരുവനന്തപുരത്തെ ഒട്ടുമിക്ക റസ്റ്റോറന്റുകളും മഞ്ചേശ്വരം മണ്ഡലത്തിൽ നിന്നുള്ളവരുടേതായതിനാൽ നാട്ടിലെ പലരെയും കാണാനും സൗഹൃദം പങ്കിടാനുമൊക്കെയുള്ള അവസരം ലഭിക്കാറുണ്ട്.

ഇതിൽ പ്രധാന റസ്റ്റോറന്റാണ് പ്രിയപ്പെട്ട മണ്ണംകുഴി അബ്ദുള്ള ഹാജിയുടെ ഉടമസ്ഥതയിലുള്ള “സംസം റസ്‌റ്റോറന്റ്”തലസ്ഥാനത്തുമെത്തുമ്പോഴൊക്കെ ഞങ്ങളുടെ ഭക്ഷണപ്പുരയാണ് സംസം.

എക്കാലത്തും ഹരിത പതാകയെ നെഞ്ചിലേറ്റിയ അബ്ദുള്ള ഹാജിക്ക് മുസ്ലിം ലീഗിന്റെ സമൂന്നതനായ നേതാവായിരുന്ന ബഹുമാന്യനായ മുൻ മുഖ്യമന്ത്രി സിഎച്ച് മുഹമ്മദ്‌ കോയയുടെ കൂടെയടക്കം പ്രവർത്തിച്ച അനുഭവങ്ങളുണ്ട്.

ഞാൻ എംഎൽഎ ആയി സത്യപ്രതിജ്ഞ ചെയ്തതിന് ശേഷം പ്രിയപ്പെട്ട എൻഎ നെല്ലിക്കുന്നിനോടൊപ്പം അബ്ദുള്ള ഹാജിയുടെ വീട്ടിൽ പോയി കണ്ടിരുന്നു.തിരുവനന്തപുരത്തെത്തിയാൽ എല്ലാ സമയത്തും ഭക്ഷണത്തിന്റെ കാര്യത്തിൽ അബ്ദുള്ള ഹാജിയുടെ മക്കളായ പ്രിയപ്പെട്ട നാഫിയും മുന്നയും പ്രിയ സുഹൃത്ത് ആരിഫിനോടും ബന്ധപ്പെടാറുണ്ട്.സ്വന്തം വീട് പോലെ ഭക്ഷണം  കഴിക്കുന്ന സ്ഥാപനമാണ് സംസം.

ഇന്നലെ സഭാ സമ്മേളനം കഴിഞ്ഞു നിർബന്ധ ബുദ്ധിയോടെ ക്ഷണിക്കാത്ത അതിഥികളായി ഞാനും എൻഎ നെല്ലിക്കുന്നും അഷ്‌റഫ്‌ കൊടിയമ്മയും അദ്ദേഹത്തിന്റെ വീട്ടിലേക്ക് പോകുകയും അദ്ദേഹത്തോടൊപ്പം നോമ്പ് തുറക്കുകയും ദീർഘാനേരം അദ്ദേഹവുമായി സംസാരിക്കുകയും ചെയ്തു.

ലീഗിന്റെ പിളർപ്പിന്റെ കാലഘട്ടത്ത് യുണിയൻ ലീഗിനോടൊപ്പം അടിയുറച്ച് നിന്ന പ്രവർത്തനത്തിന്റെ പഴയകാല ഓർമ്മകൾ പങ്കുവെക്കുകയും അക്കാലത്ത് പ്രസംഗവേദികളിലെ അനുഭവങ്ങളും പാർട്ടി യോഗങ്ങൾക്കായി അന്നത്തെ കണ്ണൂരിലേക്ക് എൻഎ നെല്ലിക്കുന്നിനോടൊപ്പം പോയിരുന്ന രംഗങ്ങളൊക്കെ ഓർത്തെടുത്തു.

തിരുവനന്തപുരത്ത് അബ്ദുള്ള ഹാജിയെയും അദ്ദേഹത്തിന്റെ സംസം ഹോട്ടലിനെയും കുറിച്ചറിയാത്ത ആൾക്കാർ ചുരുക്കമാകും,ബഹു:മുഖ്യമന്ത്രിയുടെ ഇഫ്താർ പാർട്ടിയടക്കം അദ്ദേഹത്തിന്റെ മേൽനോട്ടത്തിലാണ് സംഘടിപ്പിക്കാർ,തലസ്ഥാന നഗരിയിലും നാട്ടിലും അദ്ദേഹം നടത്തുന്ന ദീനി പ്രവർത്തനങ്ങളും ഇടത് കയ്യറിയാതെ വലതു കൈകൊണ്ടു ചെയ്യുന്ന സഹായങ്ങളും കാരുണ്യപ്രവർത്തനങ്ങൾ കൊണ്ടും സജീവമായ മനുഷ്യസ്നേഹിയാണ് അദ്ദേഹം,അദ്ദേഹത്തെ കുറിച്ച് ചോദിച്ചാൽ തിരുവനന്തപുരത്തെ ഏതു ഉന്നത ഉദ്യോഗസ്ഥർക്കും നിലവിലെയും മുൻ MLA മാർക്കും അദ്ദേഹത്തിന്റെ നന്മകൾ പറയാൻ നൂറുനാക്കാണ്,ക്യാൻസർ സെന്ററിലേക്കടക്കം തിരുവനന്തപുരത്ത് ചികിത്സയ്ക്കായി എത്തുന്ന തുണയില്ലാത്തവർക്ക് തുണയാകുന്നതും അദ്ദേഹം തന്നെയാണ്.

എല്ലാത്തിനുമുപരി എന്റെ വഴികാട്ടിയും എന്റെ മാതൃകയും ആയ എന്റെ പ്രിയപ്പെട്ട പിതാവിന്റെ ഏറ്റവും അടുത്ത സുഹൃത്തുമാണ്,ഞാൻ ഹാജിക്കയെന്ന് സ്നേഹപൂർവ്വം വിളിക്കാറുള്ള അദ്ദേഹത്തിന്റെ നന്മയാർന്ന സ്വാഭാവവും സഹകരണ മനോഭാവവും അതേ രീതിയിൽ പകർത്തിയാണ് മക്കളായ നാഫിയും മുന്നയും അവരുടെ ബിസിനസ് ശ്രിംകലയെ മുന്നോട്ട് കൊണ്ട് പോകുന്നത്,അവരുടെ സ്ഥാപനത്തിലെ താഴെ തട്ടിലുള്ള തൊഴിലാളികളെ പോലും അദ്ദേഹം പരിഗണിക്കുന്നതൊക്കെ അദ്‌ഭുദത്തോടെയാണ് ഞാനൊക്കെ നോക്കിക്കാണാറ്.

അബ്ദുള്ള ഹാജിയുടെ വീട്ടിൽ നിന്ന് നോമ്പ് തുറന്നിറങ്ങിയ വേളയിൽ ഞാനും എൻഎ നെല്ലിക്കുന്നും വീണ്ടും അദ്ദേഹത്തോടൊപ്പം കൂടുതൽ സമയം ഇരിക്കണമെന്നും പുതുതലമുറയിലെ ലീഗ് പ്രവർത്തകർക്ക് അബ്ദുള്ള ഹാജിയെ പരിചയപ്പെടുത്തണമെന്നുമൊക്കെ തീരുമാനമെടുത്താണ് മടങ്ങിയത്.

ചന്ദ്രികയിൽ ലേഖനം എഴുതിയിരുന്ന അദ്ദേഹം 2 പുസ്തകങ്ങളും എഴുതിയിട്ടുണ്ട്.

ജീവകാരുണ്യ സാമൂഹ്യ സേവന രംഗത്ത് സജീവമായിരുന്ന 2 വർഷം മുൻപ് നമ്മെ വിട്ടു പിരിഞ്ഞ ഞാൻ ഏറെ സ്നേഹിച്ചിരുന്നു ലണ്ടൻ മുഹമ്മദ്‌ ഹാജിയുടെ അനുജൻ കൂടിയാണ് അബ്ദുള്ള ഹാജി.

സർവ്വ ശക്തൻ അബ്ദുള്ള ഹാജിക്കാക്ക് ആഫിയത്തോടെയുള്ള ദീർഘായുസ്സ് നൽകിയും അദ്ദേഹത്തിന്റെ ബിസിനസ്സും ജീവകാരുണ്യ പ്രവർത്തനങ്ങളും കൂടുതൽ ഉയരങ്ങളിലേക്ക് വ്യാപിക്കാൻ സാഹയിക്കുമാറാവട്ടെ..ആമീൻ

 ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക 

Manjeshwaram MLA AKM Ashraf praised Mannamkuzhi Abdullah Haji, owner of Samsam Restaurant in Thiruvananthapuram, for his philanthropic activities. In a Facebook post, Ashraf highlighted Haji's long association with Muslim League, his support during the party's split, and his extensive charitable work, including helping those coming to Thiruvananthapuram for cancer treatment. Ashraf also noted Haji's close friendship with his late father and the continuation of his benevolent nature by his sons.

#AbdullahHaji, #AKMAshraf, #Philanthropy, #Thiruvananthapuram, #MuslimLeague, #Kerala