കാസർകോട്ടെ യു ഡി എഫ് സ്ഥാനാർഥി എൻ എ നെല്ലിക്കുന്ന് പത്രിക സമർപിച്ചു

കാസർകോട്: (www.kasargodvartha.com 17.03.2021) മണ്ഡലത്തിലെ യു ഡി എഫ് സ്ഥാനാർഥി എൻ എ നെല്ലിക്കുന്ന് നാമനിർദേശ പത്രിക സമർപിച്ചു. മാലിക് ദീനാർ, നെല്ലിക്കുന്ന് മഖ്ബറകളിൽ പ്രാർഥന നടത്തിയ ശേഷം എം ജി റോഡിലെ വിപി ടവറിൽ നിന്ന് പ്രകടനമായാണ് പത്രിക സമർപണത്തിന് എത്തിയത്. സി ടി അഹ്‌മദ് അലി, ടി ഇ അബ്ദുല്ല, കല്ലട്ര മാഹിൻ ഹാജി, ഹകീം കുന്നിൽ, പി എ അശ്‌റഫ് അലി, അബ്ബാസ് ബീഗം, കരിവെള്ളൂർ വിജയൻ, അബ്ദുല്ല കുഞ്ഞി ചെർക്കള, വി പി അബ്ദുൽ ഖാദർ, ആർ ഗംഗാധരൻ തുടങ്ങിയ നേതാക്കൾ സംബന്ധിച്ചു.

                                                                            


ത്രികോണ മത്സരം നടക്കുന്ന മണ്ഡലത്തിൽ ബിജെപി ജില്ലാ പ്രസിഡന്റ് കെ ശ്രീകാന്ത് ആണ് എൻഡിഎ സ്ഥാനാർഥി. എൽഡിഎഫിനായി ഐ എൻ എൽ സംസ്ഥാന സെക്രടറി എം എ ലത്വീഫ് ജനവിധി തേടുന്നു. കഴിഞ്ഞ കുറെ തെരെഞ്ഞെടുപ്പുകളിലായി ബി ജെ പി രണ്ടാം സ്ഥാനത്തെത്തുന്ന മണ്ഡലമാണിത്.

തുടർച്ചയായ മൂന്നാം ജയം ലക്ഷ്യമിട്ടാണ് എൻ എ നെല്ലിക്കുന്ന് മത്സരത്തിനിറങ്ങുന്നത്. മുസ്ലിം ലീഗിന് വലിയ സ്വാധീനമുള്ള മണ്ഡലത്തിൽ മികച്ച ഭൂരിപക്ഷത്തിൽ ജയിക്കാനാവുമെന്നാണ് യുഡിഎഫ് കണക്ക് കൂട്ടൽ.