Change | ബ്രിട്ടീഷ് കാലത്തെ തൊപ്പിക്ക് വിട; കർണാടക പൊലീസ് കേരള മാതൃകയിലേക്ക്

ബെംഗളൂരു: (KasargodVartha) കർണാടക പൊലീസ് സേനയിലെ കോൺസ്റ്റബിൾ, ഹെഡ് കോൺസ്റ്റബിൾ അംഗങ്ങൾ അണിയുന്ന ബ്രിട്ടീഷ് ഭരണ കാലത്തെ തൊപ്പി ഉപേക്ഷിക്കാൻ കർണാടക സർക്കാർ നടപടി ആരംഭിച്ചു. കേരളത്തിലെപ്പോലെ സ്മാർട്ട് പീക്ക്ഡ് തൊപ്പിയിലേക്കാണ് കർണാടക പോലീസ് സേന മാറാൻ ഒരുങ്ങുന്നത്. റാലികൾ, പ്രതിഷേധങ്ങൾ, ലാത്തി ചാർജുകൾ എന്നിവ നടക്കുമ്പോൾ നിലവിലുള്ള തൊപ്പികൾ പലപ്പോഴും ശല്യമാവുന്നു എന്ന് കർണാടക പോലീസ് ഉദ്യോഗസ്ഥർ അറിയിച്ചു. 

ശരിയായി തലയിൽ നിൽക്കാത്തത് കാരണം ഓടുന്നതിനിടയിൽ തൊപ്പി വീണുപോകുന്ന സാഹചര്യങ്ങൾ ഉണ്ടാവാറുണ്ട്. ഇത് പോലീസ് സേനയുടെ അനാദരവായി കണക്കാക്കുന്നു. കൂടാതെ തൊപ്പികളുടെ ആരോഗ്യപരമായ പ്രതികൂല ഫലങ്ങളെക്കുറിച്ച് കേന്ദ്ര ആരോഗ്യ വകുപ്പ് മുന്നറിയിപ്പ് നൽകിയിരുന്നു.
കേരളം, ആന്ധ്രാപ്രദേശ്, തമിഴ്നാട് എന്നീ സംസ്ഥാനങ്ങളിലെ പോലീസ് ഉദ്യോഗസ്ഥർക്ക് പീക്ക് ക്യാപ്പുകൾ നൽകിയിട്ടുണ്ട്. 

കർണാടകയിൽ ഇതേ മോഡൽ പുറത്തിറക്കുന്ന വിഷയത്തിൽ അന്വേഷണം നടത്തി റിപ്പോർട്ട് നൽകാൻ ഡിജി-ഐജി പി ഡോ. അലോക് മോഹൻ നിർദേശം നൽകി. ക്യാപ്പുകളുടെ വിതരണത്തെക്കുറിച്ച് ചർച്ച ചെയ്യുന്നതിനായി ഏപ്രിൽ നാലിന് സംസ്ഥാന സായുധ റിസർവ് സേനയുടെ (കെഎസ്ആർപി) അഡീഷണൽ ഡയറക്ടർ ജനറൽ ഓഫ് പോലീസിന്റെ അധ്യക്ഷതയിൽ കിറ്റ് സ്പെസിഫിക്കേഷൻ കമ്മിറ്റിയുടെ യോഗം വിളിച്ചുചേർത്തിട്ടുണ്ട്.

ബംഗളൂരു നോർത്ത് ഡിവിഷൻ, ആസ്ഥാന ഡിവിഷൻ ഐജിപി, സിഎആർ ഡിസിപിമാർ, ബംഗളൂരു സിറ്റി ജില്ല എസ്പി, കെഎസ്ആർപി കമാൻഡന്റ്, മറ്റ് മുതിർന്ന ഉദ്യോഗസ്ഥർ എന്നിവർ യോഗത്തിൽ പങ്കെടുക്കും. ഈ യോഗത്തിൽ നിലവിലെ പോലീസ് തൊപ്പിയുടെ ഗുണദോഷങ്ങളെക്കുറിച്ച് ചർച്ച നടക്കും. ഒരു പീക്ക് ക്യാപ്പ് ശുപാർശ ഇതിൽ ഉരുത്തിരിയുമെന്നാണ് പ്രതീക്ഷിക്കുന്നത്.

ഈ വാർത്ത നിങ്ങളുടെ പങ്കുവെക്കുക. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Karnataka Police is planning to replace the British-era hats with smart peaked caps similar to those used by Kerala Police. This decision comes after concerns were raised about the discomfort and health issues associated with the current hats. A meeting is scheduled for April 4th to discuss the implementation of the new caps.

#KarnatakaPolice, #KeralaModel, #PoliceReform, #NewCaps, #IndiaNews, #PoliceUniform