Demand | കണ്ണൂർ-ഷൊർണൂർ എക്സ്പ്രസ് കാസർകോട്ടേക്ക് നീട്ടണമെന്ന് എം വി ബാലകൃഷ്ണൻ

കാസർകോട്‌: (KasargodVartha) ജില്ലയിലെ യാത്രാസൗകര്യം മെച്ചപ്പെടുത്തുന്നതിനായി കണ്ണൂർ-ഷൊർണൂർ എക്സ്പ്രസ് കാസർകോട്‌ വരെ നീട്ടണമെന്ന് സിപിഐഎം ജില്ലാ സെക്രട്ടറി എം.വി. ബാലകൃഷ്ണൻ ആവശ്യപ്പെട്ടു. വടക്കൻ കേരളത്തിലെ കടുത്ത യാത്രാദുരിതം പരിഹരിക്കാൻ ഒരിടപെടലും റെയിൽവേ നടത്തുന്നില്ലെന്ന്‌ അദ്ദേഹം പ്രസ്‌താവനയിൽ പറഞ്ഞു.

കഴിഞ്ഞ ജൂലൈയിൽ അനുവദിച്ച ഈ ട്രെയിൻ പ്രതിദിനമാക്കിയിട്ടും കാസർകോട്‌ വരെ നീട്ടിയിട്ടില്ലെന്ന് അദ്ദേഹം പറഞ്ഞു. കോവിഡ് മഹാമാരിക്ക് ശേഷം ദേശീയപാത നിർമാണത്തെ തുടർന്ന് റോഡ് ഗതാഗതം തടസ്സപ്പെട്ടതോടെ റെയിൽ യാത്രയുടെ പ്രാധാന്യം വർദ്ധിച്ചിട്ടുണ്ട്. എന്നാൽ, നിലവിലുള്ള ട്രെയിൻ സൗകര്യം പലർക്കും പര്യാപ്തമല്ല.

ഈ ട്രെയിൻ അനുവദിച്ചതു മുതൽ മംഗളൂരുവിലേക്കോ കാസർകോട്ടേക്കോ നീട്ടണമെന്ന ആവശ്യം ഉയർന്നിരുന്നു. എന്നാൽ, കണ്ണൂരിൽ മണിക്കൂറുകളോളം നിർത്തിയിടുന്ന ഈ ട്രെയിൻ ഇതുവരെ വടക്കോട്ട് നീട്ടിയിട്ടില്ല. വടക്കോട്ട്‌ നീട്ടാനുള്ള ഇടപെടൽ റെയിൽവേയോ കാസർകോട്ടെ എംപിയോ നടത്തിയില്ല. രാവിലെയും വൈകിട്ടും ട്രെയിനിൽ യാത്ര ചെയ്യുന്നവർ വലിയ ബുദ്ധിമുട്ട് അനുഭവിക്കുന്നു. അതിനാൽ, കണ്ണൂർ-ഷൊർണൂർ സർവീസ് അടിയന്തിരമായി കാസർകോട്‌ വരെ നീട്ടണമെന്ന് എം.വി. ബാലകൃഷ്ണൻ ആവശ്യപ്പെട്ടു.

#Kasaragod #KannurShoranurExpress #RailwayExtension #KeralaNews #PublicTransport