ബൈക്കപകടത്തില്‍ യുവാവ് മരിച്ചു; ബന്ധുവിന് ഗുരുതരം

File photo

പെരിയ: ബൈക്കും ടെമ്പോ ട്രാവലറും കൂട്ടിയിടിച്ച് യുവാവ് മരിച്ചു. ഗുരുതരമായി പരിക്കേറ്റ നിലയില്‍ ബന്ധുവിനെ മംഗലാപുരം ആശുപത്രിയില്‍ പ്രവേശിപ്പിച്ചു. ബൈക്ക് ഓടിച്ച രാവണേശ്വരം നാട്ടാങ്കല്ലിലെ രാജീവന്‍(32) ആണ് മരിച്ചത്.

ബൈക്കിന് പിറകിലിരിക്കുകയായിരുന്ന ഇളയച്ഛന്റെ മകന്‍ പ്രമോദിനാണ്(24) ഗുരുതരമായി പരിക്കേറ്റത്. ശനിയാഴ്ച രാത്രി 10.45 മണിക്ക് പെരിയ ബസാറിലാണ് അപകടം. പെട്രോള്‍ ബങ്കില്‍ നിന്നും പെട്രോളടിച്ച് പോകുമ്പോള്‍ ഇവര്‍ സഞ്ചരിച്ച കെ.എല്‍ 60 8207 ബൈക്കില്‍ കെ.എല്‍ 13 ക്യു 24 ടെമ്പോ ട്രാവലര്‍ ഇടിക്കുകയായിരുന്നു. കണ്ണൂരില്‍ നിന്നും വിനോദയാത്രയ്ക്ക് പുറപ്പെട്ട സംഘം സഞ്ചരിച്ച ടെമ്പോ ട്രാവലറാണ് ഇടിച്ചത്.

ഗള്‍ഫിലായിരുന്ന രാജീവന്‍ കുറച്ചുകാലമായി നാട്ടിലായിരുന്നു. വിസ ശരിയായതിനെ തുടര്‍ന്ന് വീണ്ടും ഗള്‍ഫില്‍ പോകാനുള്ള തെയ്യാറെടുപ്പിനിടെയാണ് അപകടത്തില്‍ മരിച്ചത്. മണലില്‍ ശ്രീധരന്റെയും രശ്മിയുടെയും മകനാണ്. ഭാര്യ: പ്രസീദ. മക്കള്‍: ലക്ഷ്മി, കണ്ണന്‍. സഹോദരങ്ങള്‍: രാജന്‍, രാജേഷ്, രജനി. ടെമ്പോ ഡ്രൈവര്‍ക്കെതിരെ ബേക്കല്‍ പോലീസ് കെസെടുത്തു.