Engine failure | കാസർകോട്ട് ദേശീയപാതയുടെയും മേൽപാലങ്ങളുടെയും ഉദ്ഘാടന പരിപാടിക്ക് എത്തേണ്ടിയിരുന്ന കേന്ദ്രമന്ത്രിമാരായ നിതിൻ ഗഡ്കരിയും വി മുരളീധരനും സഞ്ചരിക്കേണ്ട വിമാനത്തിന് എൻജിൻ തകരാർ; ഉദ്ഘാടനം ഓൺലൈൻ വഴി; പാതി വഴിയിൽ മന്ത്രി മുഹമ്മദ് റിയാസും മടങ്ങി

കാസർകോട്: (KasargodVartha) ഭാരത് പരിയോജന പദ്ധതിയിൽ ഉൾപെടുത്തി സംസ്ഥാനത്ത് നിർമാണം ആരംഭിക്കുന്നതും പൂർത്തീകരിക്കുന്നതും ആയ 12 ദേശീയപാത - മേൽപാല പദ്ധതികളുടെ കാസർകോട്ടെ ഉദ്ഘാടന പരിപാടിക്ക് എത്തേണ്ടിയിരുന്ന കേന്ദ്രമന്ത്രിമാരായ നിതിൻ ഗഡ്കരിയും വി മുരളീധരനും സഞ്ചരിക്കേണ്ട വിമാനത്തിന്റെ എൻജിൻ തകരാറിനെ തുടർന്ന് യാത്ര അവസാന നിമിഷം റദ്ദാക്കി.
  
പറഞ്ഞതിലും ഒന്നര മണിക്കൂർ കഴിഞ്ഞതിന് ശേഷം പരിപാടിയുടെ ഉദ്ഘാടനം ഓൺലൈൻ വഴിയാണ് നടത്തിയത്. ഇതിനിടയിൽ പരിപാടിയിൽ പങ്കെടുക്കാൻ മാത്രമായി തിരുവനന്തപുരത്ത് നിന്നും കണ്ണൂരിൽ വിമാനമിറങ്ങി കാസർകോട്ടേക്ക് പുറപ്പെട്ട സംസ്ഥാന പൊതുമരാമത്ത് മന്ത്രി മുഹമ്മദ് റിയാസ് ഡെൽഹിയിൽ നിന്നുള്ള നിർദേശത്തെ തുടർന്ന് പാതിവഴിയിൽ തളിപ്പറമ്പിൽ നിന്നും മടങ്ങി ഓൺലൈനിൽ ഉദ്ഘാടന ചടങ്ങിൽ പങ്കാളികളായി.