Drowned | പെരുന്നാൾ ആഘോഷത്തിന് മുത്തച്ഛന്റെ വീട്ടിലെത്തിയ സഹോദരങ്ങൾ പള്ളിക്കുളത്തിൽ മുങ്ങിമരിച്ചു

കാസർകോട്: (www.kasargodvartha.com) പെരുന്നാൾ ആഘോഷത്തിന് മുത്തച്ഛന്റെ വീട്ടിലെത്തിയ രണ്ട് സഹോദരങ്ങൾ പള്ളിക്കുളത്തിൽ മുങ്ങിമരിച്ചു. മൊഗ്രാൽ കൊപ്പളത്ത് ശനിയാഴ്ച ഉച്ചയോടെയാണ് സംഭവം. മഞ്ചേശ്വരത്തെ ഖാദർ - കൊപ്പളം സ്വദേശിനി നസീമ ദമ്പതികളുടെ മക്കളായ നവാസ് റഹ്‌മാൻ (22), നാദിൽ (17) എന്നിവരാണ് മരിച്ചത്. സഹോദരങ്ങളിൽ ഒരാൾ മുങ്ങിത്താഴുന്നത് കണ്ട് മറ്റെയാൾ രക്ഷിക്കാൻ ശ്രമിക്കുന്നതിനിടെയാണ് അപകടത്തിൽ പെട്ടതെന്നാണ് വിവരം. കുളത്തിന് സമീപത്തുള്ള റെയിൽ പാളത്തിലൂടെ നടന്നുപോവുകയായിരുന്ന കുട്ടികൾ സംഭവം കണ്ട് ബഹളം വെച്ചതോടെ ഓടിക്കൂടിയ നാട്ടുകാരാണ് രണ്ടുപേരെയും പുറത്തെടുത്തത്. ഉടൻ തന്നെ ആശുപത്രിയിൽ എത്തിച്ചെങ്കിലും മരണം സ്ഥിരീകരിച്ചിരുന്നു. വിവരം അറിഞ്ഞു കുമ്പള പൊലീസ് സ്ഥലത്ത് എത്തിയിരുന്നു. സഹോദരങ്ങളുടെ ദാരുണ മരണത്തിന്റെ ഞെട്ടലിലാണ് പ്രദേശം.