അവരും മനുഷ്യരാണ്; വയനാട്ടിൽ മാവോയിസ്റ്റ് പ്രവർത്തകനെ വെടിവെച്ചുകൊന്ന സംഭവത്തിൽ ജുഡീഷ്യൽ അന്വേഷണം നടത്തണം: ചെന്നിത്തല

കാസർകോട്: (www.kasargodvartha.com 04.11.2020) വയനാട്ടിൽ മാവോയിസ്റ്റ് പ്രവർത്തകനെ വെടിവെച്ചുകൊന്ന സംഭവത്തിൽ ജുഡീഷ്യൽ അന്വേഷണം നടത്തണമെന്ന് പ്രതിപക്ഷ നേതാവ് ചെന്നിത്തല ആവശ്യപ്പെട്ടു. കാസർകോട് ഡി സി സി ഓഫീസിൽ വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. 

വയനാട്ടിലെ വെടിവെപ്പിൽ ദുരൂഹതയുണ്ട്. മാധ്യമ പ്രവർത്തകരെ പോലും സംഭവസ്ഥലത്തേക്ക് കടത്തിവിട്ടില്ല. ഇക്കാര്യത്തിൽ സത്യാവസ്ഥ പുറത്തുവരണം. എട്ട് മനുഷ്യരെയാണ് പിണറായി സർക്കാർ വെടിവെച്ചു കൊന്നത്. അവരും മനുഷ്യരാണ്. മാവോയിസ്റ്റായാൽ വെടിവെച്ചു കൊല്ലണമെന്നുണ്ടോയെന്നും ചെന്നിത്തല ചോദിച്ചു.

സി പി എമ്മിൻ്റ ജീർണതയുടെ ആഴം തെളിയിക്കുന്നതാണ് ബിനീഷിൻ്റെ വീട്ടിലെ റെയ്‌ഡെന്നും ചെന്നിത്തല കുറ്റപ്പെടുത്തി. കള്ളപ്പണവും കള്ളക്കടത്തും മയക്കുമരുന്ന് കേസിലുമടക്കം എല്ലാ സംഭവത്തിലും പ്രതിസ്ഥാനത്ത് മുഖ്യമന്ത്രിയും പാർട്ടി സെക്രട്ടറിയുമാണ്. ആദർശം പ്രസംഗിച്ചു അധോലോക പ്രവർത്തനം നടത്തുന്ന പാർട്ടിയാണ് സി പി എം. അന്തസ്സുണ്ടെങ്കിൽ കോടിയേരി രാജിവയ്ക്കണം. സംസ്ഥാന സെക്രട്ടറി സ്ഥാനത്ത് അള്ളിപ്പിടിച്ചിരിക്കരുത് ബിനീഷ് കേസിൽ മുഖ്യമന്ത്രിക്ക് മൗനമാണ്. എല്ലാം മുഖ്യമന്ത്രിക്കും പാർട്ടിക്കും അറിയാമായിരുന്നു എന്നതിൻ്റെ തെളിവാണിത്.

< !- START disable copy paste -->