പടന്നക്കാട് തീര്‍ത്ഥങ്കര കുളത്തിലെ ടണ്‍ കണക്കിന് കുളവാഴകളും പായലുകളും പുറത്തേക്ക് നീക്കി പോലീസുകാരുടെ ശ്രമദാനം; ജില്ലാ പോലീസ് ചീഫ് അടക്കമുള്ളവര്‍ സാക്ഷികളായി

കാസര്‍കോട്: (www.kasargodvartha.com 03.06.2019) കാസര്‍കോട് ജില്ലയിലെ ഏറ്റവും വലിയ ശുദ്ധജല തടാകമായ പടന്നക്കാട് തീര്‍ത്ഥങ്കര കുളത്തിലെ ടണ്‍ കണക്കിന് കുളവാഴകളും പായലുകളും പുറത്തേക്ക് നീക്കി പോലീസുകാരുടെ ശ്രമദാനം. കേരള പോലീസ് അസോസിയേഷന്‍ 33-ാം കാസര്‍കോട് ജില്ലാ സമ്മേളനത്തോടനുബന്ധിച്ചാണ് ജില്ലയിലെ പോലീസുകാരുടെ നേതൃത്വത്തില്‍ പടന്നക്കാട് തീര്‍ത്ഥങ്കര കുളം ശുചീകരിച്ചത്.

പടന്നക്കാട് നെഹ്‌റു ആര്‍ട്‌സ് ആന്‍ഡ് സയന്‍സ് കോളേജ് എന്‍ എസ് എസ് പ്രവര്‍ത്തകര്‍, സമീപ പ്രദേശങ്ങളിലെ കുടുംബശ്രീ പ്രവര്‍ത്തകര്‍, വിവിധ ക്ലബ്ബ് പ്രവര്‍ത്തകര്‍, മറ്റു സാമൂഹ്യ പ്രവര്‍ത്തകര്‍ എന്നിവരുടെ സഹകരണത്തോടെയാണ് ശുചീകരണ യജ്ഞം നടത്തിയത്. ശുചീകരണ പ്രവര്‍ത്തനത്തിന്റെ ഉദ്ഘാടനം ജില്ലാ പോലീസ് ചീഫ് ജെയിംസ് ജോസഫ് നിര്‍വ്വഹിച്ചു. ചടങ്ങില്‍ സമ്മേളന സ്വാഗതസംഘം ചെയര്‍മാന്‍ ടി വി പ്രമോദ് അധ്യക്ഷത വഹിച്ചു.


കാഞ്ഞങ്ങാട് നഗരസഭ കൗണ്‍സിലര്‍ എം എം നാരായണന്‍, നീലേശ്വരം നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്‍ മുഹമ്മദ് റാഫി, അഗ്രികള്‍ച്ചര്‍ യൂണിവേഴ്‌സിറ്റി ഡീന്‍ ഇന്‍ ചാര്‍ജ്ജ് ഡോ. കെ എം ശ്രീകുമാര്‍, സംസ്ഥാന ബീഡി തൊഴിലാളി ക്ഷേമനിധി ബോര്‍ഡ് ചെയര്‍മാന്‍ കെ ബാലകൃഷ്ണന്‍, കേരളാ പോലീസ് ഓഫീസേഴ്‌സ് അസോസിയേഷന്‍ ജില്ലാ സെക്രട്ടറി മഹേഷ് പി പി, സംസ്ഥാന നിര്‍വ്വാഹക സമിതി അംഗം പി വി സതീശന്‍, പോലീസ് അസോസിയേഷന്‍ ജില്ലാ പ്രസിഡണ്ട് ഗിരീഷ് ബാബു, നെഹ്‌റു കോളേജ് എന്‍ എസ് എസ് വളണ്ടിയര്‍ സെക്രട്ടറി ശ്രീലക്ഷ്മി തുടങ്ങിയവര്‍ ആശംസയര്‍പ്പിച്ചു സംസാരിച്ചു.

വിവിധ ക്ലബ്ബ് ഭാരവാഹികളായ ദിനേശന്‍ തീര്‍ത്ഥങ്കര, പ്രമോദ് തീര്‍ത്ഥങ്കര, ശാന്തകുമാര്‍ തീര്‍ത്ഥങ്കര, മധു ഒ വി, സുമതി കെ തുടങ്ങിയവര്‍ ചടങ്ങില്‍ പങ്കെടുത്തു. ചടങ്ങിന് കെ പി എ ജില്ലാ സെക്രട്ടറി പി രവീന്ദ്രന്‍ സ്വാഗതവും സ്വാഗത സംഘം ജനറല്‍ കണ്‍വീനര്‍ എം ടി പി സെയ്ഫുദ്ദീന്‍ നന്ദിയും പറഞ്ഞു.