മന്‍സൂര്‍ അലി വധക്കേസിന്റെ വിചാരണ ഒക്ടോബര്‍ 27ന് തുടങ്ങും; പഴയ സ്വര്‍ണം വില്‍ക്കാനുണ്ടെന്ന് പറഞ്ഞ് വിളിച്ചുവരുത്തി തലക്കടിച്ചു കൊലപ്പെടുത്തിയ കേസില്‍ വിചാരണ നേരിടുന്നത് 3 പ്രതികള്‍, 74 സാക്ഷികള്‍

കാസര്‍കോട്: (www.kasargodvartha.com 17.09.2018) പൈവളിഗെ ബായാര്‍പദവ് സുന്നക്കട്ടയില്‍ പൊട്ടക്കിണറ്റില്‍ കൊല്ലപ്പെട്ട തളങ്കര കടവത്ത് സ്വദേശിയും ചെട്ടുംകുഴിയിലെ താമസക്കാരനുമായ മന്‍സൂര്‍ അലി വധക്കേസിന്റെ വിചാരണ ഒക്ടോബര്‍ 27ന് തുടങ്ങും. പഴയ സ്വര്‍ണം വില്‍ക്കാനുണ്ടെന്ന് പറഞ്ഞ് വിളിച്ചുവരുത്തി തലക്കടിച്ചു കൊലപ്പെടുത്തിയ കേസില്‍ മൂന്ന് പ്രതികളാണ് വിചാരണ നേരിടുന്നത്.

പഴയ സ്വര്‍ണം വില്‍ക്കാനുണ്ടെന്ന് പറഞ്ഞ് വിളിച്ചു വരുത്തി വാഹനത്തില്‍ കയറ്റിക്കൊണ്ട് പോയാണ് സംഘം മന്‍സൂര്‍ അലിയെ തലക്കടിച്ചു കൊലപ്പെടുത്തി പൊട്ടക്കിണറ്റില്‍ തള്ളിയത്. തമിഴ്നാട് പുതുക്കൈ അത്താണി അഗ്രഹാര കുടിയിരിപ്പു കോളനിയിലെ മാരിമുത്തു എന്ന ശ്രീധരന്‍ എന്ന മുഹമ്മദ് അഷ്റഫ് (45), കര്‍ണാടക ബണ്ട്വാള്‍ കറുവത്തടുക്ക മിത്തനടുക്കയിലെ അബ്ദുല്‍ സലാം (30), മന്ത്രവാദിയും കര്‍ണാടക ഹാസന്‍ സ്വദേശിയുമായ രംഗണ്ണ (45) എന്നിവരാണ് കേസിലെ പ്രതികള്‍.

2017 ജനുവരി 25നാണ് കേസിനാസ്പദമായ സംഭവം നടന്നത്. മുഖ്യപ്രതി പഴയ സ്വര്‍ണം വില്‍ക്കാനുണ്ടെന്ന് പറഞ്ഞാണ് മന്‍സൂര്‍ അലിയെ ഉപ്പളയിലേയ്ക്കു വിളിപ്പിച്ചത്. കറന്തക്കാട്ടു നിന്നും ബസില്‍ കയറി ഉപ്പളയിലെത്തിയ മന്‍സൂര്‍ അലിയെ മുഖ്യപ്രതികള്‍ വാനില്‍ കയറ്റി ബായാറിലേക്ക് കൂട്ടിക്കൊണ്ടുപോയി. പിന്നീട് ചിപ്പാര്‍ മുളിഗദ്ദെ എടംബള പുഴയുടെ സമീപത്ത് വെച്ച് മന്‍സൂര്‍ അലിയുടെ മുഖത്ത് മുളക് പൊടി വിതറിയ ശേഷം ഇരുമ്പുവടി കൊണ്ട് തലയ്ക്കടിച്ചു കൊലപ്പെടുത്തിയ ശേഷം മൃതദേഹം സമീപത്തെ പൊട്ടക്കിണറ്റില്‍ തള്ളുകയായിരുന്നു.

മന്‍സൂര്‍ അലിയുടെ പക്കലുണ്ടായിരുന്ന 2.40 ലക്ഷം രൂപയും മൊബൈല്‍ ഫോണും തട്ടിയെടുത്തുവെന്നും കുറ്റപത്രത്തില്‍ പറയുന്നു. 74 സാക്ഷികളാണ് കേസിലുള്ളത്. സ്പെഷ്യല്‍ പ്രോസിക്യൂട്ടറായി സി കെ ശ്രീധരനെ നേരത്തെ സര്‍ക്കാര്‍ നിയമിച്ചിരുന്നു.

Related News:
മന്‍സൂര്‍ അലി വധം; അഡ്വ. സി.കെ ശ്രീധരനെ സ്‌പെഷ്യല്‍ പ്രോസിക്യൂട്ടറായി നിയമിച്ച് സര്‍ക്കാര്‍ ഉത്തരവായി
മന്‍സൂര്‍ അലിയെ കൊലപ്പെടുത്തിയശേഷം കവര്‍ന്ന പണത്തില്‍നിന്നും സലാം പൂജ നടത്താന്‍ കാല്‍ ലക്ഷം രൂപ നല്‍കി; ദര്‍ഗയിലെ ഭണ്ഡാരത്തിലും പണം നിക്ഷേപിച്ചു