Inspection | ജാഗ്രതൈ! ആർസി, ലൈസൻസ് വരെ സസ്‍പെൻഡ് ചെയ്യാം; പുതുവത്സരാഘോഷത്തിനിടെ കാസർകോട്ട് പൊലീസും എംവിഡിയും ചേർന്ന് പ്രത്യേക പരിശോധന തുടങ്ങി

കാസർകോട്: (KasargodVartha) പുതുവത്സരാഘോഷങ്ങളുടെ ഭാഗമായി വാഹന പരിശോധന കർശനമാക്കി. കാസർകോട് ജില്ലയിൽ മോട്ടോർ വാഹന വകുപ്പും പൊലീസും സംയുക്തമായി തിങ്കളാഴ്ച വൈകുന്നേരം മുതൽ പ്രത്യേക പരിശോധന ആരംഭിച്ചു. ആഘോഷത്തിമിർപ്പുകളിൽ അമിതവേഗത, മദ്യപിച്ചുള്ള ഡ്രൈവിംഗ്, അപകടകരമായ രീതിയിലുള്ള വാഹനമോടിക്കൽ തുടങ്ങിയ നിയമലംഘനങ്ങൾ തടയുകയാണ് പ്രധാന ലക്ഷ്യം. ഹൈകോടതിയുടെ നിർദേശപ്രകാരം, നിയമലംഘനം നടത്തുന്നവരുടെ വാഹനങ്ങളുടെ രജിസ്ട്രേഷൻ സർട്ടിഫിക്കറ്റ് (ആർസി), ഡ്രൈവിംഗ് ലൈസൻസ് എന്നിവ സസ്പെൻഡ് ചെയ്യുന്നതുൾപ്പെടെയുള്ള കർശന നടപടികൾ സ്വീകരിക്കുമെന്ന് കാസര്‍കോട് ആര്‍ടിഒ അറിയിച്ചു.

പുതുവത്സര രാവിൽ ഉണ്ടാകാൻ ഇടയുള്ള അപകടങ്ങൾ കണക്കിലെടുത്താണ് പരിശോധന ശക്തമാക്കുന്നത്. പ്രധാന നഗരങ്ങളിലും ടൗണുകളിലും മാത്രമല്ല, ഗ്രാമീണ റോഡുകളിലും വിനോദ സഞ്ചാര കേന്ദ്രങ്ങളിലേക്കുള്ള വഴികളിലും പരിശോധന ഉണ്ടാകും. അമിത വേഗതയിൽ പോകുന്ന വാഹനങ്ങൾ കണ്ടെത്താനായി ക്യാമറകളും സ്ഥാപിച്ചിട്ടുണ്ട്. ഇരുചക്ര വാഹനങ്ങളിൽ ഒന്നിൽ കൂടുതൽ ആളുകളെ കയറ്റുന്നതും ശ്രദ്ധയിൽപ്പെട്ടാൽ നടപടിയുണ്ടാകും.

വാഹനം ഓടിക്കുന്നവരുടെ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് പരിശോധന നടത്തുന്നത് എന്ന് അധികൃതർ വ്യക്തമാക്കി. ആഘോഷങ്ങൾക്കിടയിൽ അശ്രദ്ധമായി വാഹനമോടിക്കുന്നത് മൂലമുണ്ടാകുന്ന അപകടങ്ങൾ ഒഴിവാക്കുകയാണ് പ്രധാന ലക്ഷ്യം. നിയമലംഘനങ്ങൾ ശ്രദ്ധയിൽപ്പെട്ടാൽ കർശന നടപടി സ്വീകരിക്കുമെന്നും ആർടിഒ അറിയിച്ചു. പൊതുജനങ്ങളുടെ സഹകരണവും അധികൃതർ അഭ്യർഥിച്ചു.

 #KasargodNews #NewYearSafety #PoliceAction #MVD #RoadSafety #VehicleInspection