Accident | വൈദ്യുതി തൂൺ മറിഞ്ഞുവീണ് ഗർഭിണിയടക്കം 2 സ്ത്രീകൾക്ക് ദാരുണാന്ത്യം ​​​​​​​

ബെംഗ്ളുറു: (KasargodVartha) ബൈയപ്പനഹള്ളിയിൽ വൈദ്യുതി പോസ്റ്റ് മറിഞ്ഞുവീണ് രണ്ടു യുവതികൾക്ക് ദാരുണാന്ത്യം. തമിഴ്നാട് സ്വദേശിനി സുമതി (32), ബിഹാർ സ്വദേശിനി സോണി കുമാരി (31) എന്നിവരാണ് മരിച്ചത്. സുമതി നാല് മാസം ഗർഭിണിയായിരുന്നു. സോണി കുമാരി കഴിഞ്ഞ എട്ട് വർഷമായി ബംഗളൂരുവിൽ താമസിക്കുകയായിരുന്നു.

ബൈയപ്പനഹള്ളിയിലെ റോഡ് നിർമാണത്തിന്റെ ഭാഗമായി മണ്ണ് നീക്കം ചെയ്തുകൊണ്ടിരുന്ന സ്ഥലത്തെ വൈദ്യുതി പോസ്റ്റാണ് അപകടകരമായി നിലംപൊത്തിയത്. മണ്ണ് മാറ്റുന്നതിനിടയിൽ പോസ്റ്റ് ദുർബലമായതാണ് അപകടത്തിന് കാരണമെന്നാണ് പ്രാഥമിക നിഗമനം. പോസ്റ്റ് മറിയുന്നത് കണ്ടപ്പോൾ യുവതികൾ ഓടി രക്ഷപ്പെടാൻ ശ്രമിച്ചെങ്കിലും ഇരുവരുടെയും ദേഹത്തേക്ക് പൊടുന്നനെ പതിക്കുകയായിരുന്നു. ഇരുവരും സംഭവസ്ഥലത്ത് വെച്ച് തന്നെ മരണപ്പെട്ടു.

സംഭവസമയത്ത് മണ്ണുമാന്തി യന്ത്രം പ്രവർത്തിപ്പിച്ചുകൊണ്ടിരിക്കുകയായിരുന്നുവെന്നും സമീപത്തെ റോഡിലൂടെ യുവതികൾ നടന്നുപോകുന്നത് ശ്രദ്ധിച്ചില്ലെന്നുമാണ് ഡ്രൈവർ പൊലീസിനോട് പറഞ്ഞത്. ഇതിനെത്തുടർന്ന് ജെസിബി ഡ്രൈവർ രാജുവിനെ പൊലീസ് കസ്റ്റഡിയിലെടുത്തിട്ടുണ്ട്.  മണ്ണുമാന്തി യന്ത്രം ഓടിക്കുന്നയാൾ ഹെഡ്ഫോൺ വെച്ചിരിക്കുകയായിരുന്നുവെന്നും വയറിൽ തട്ടിയപ്പോൾ നാട്ടുകാർ വിളിച്ചുപറഞ്ഞത് കേട്ടില്ലെന്നുമാണ് നാട്ടുകാർ ആരോപിക്കുന്നത്. അപകടത്തെത്തുടർന്ന് പ്രദേശത്ത് വലിയ ജനക്കൂട്ടം തടിച്ചുകൂടുകയും പ്രതിഷേധം ശക്തമാക്കുകയും ചെയ്തു.

സംഭവത്തിൽ ബൈയപ്പനഹള്ളി പൊലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്. അപകടത്തെത്തുടർന്ന് ഇത്തരം പ്രവൃത്തികൾ നടത്തുമ്പോൾ മുൻകരുതൽ നടപടികൾ സ്വീകരിക്കാൻ ബൃഹത് ബെംഗളൂരു മഹാനഗര പാലികെക്ക് (ബിബിഎംപി) നിർദേശം നൽകിയിട്ടുണ്ടെന്ന് കർണാടക ഉപമുഖ്യമന്ത്രി ഡി കെ ശിവകുമാർ അറിയിച്ചു. ഭാവിയിൽ ഇത്തരം ദാരുണ സംഭവങ്ങൾ ആവർത്തിക്കാതിരിക്കാൻ ശക്തമായ നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.

ഈ സംഭവത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Two women, including a pregnant woman, died after an electric pole fell on them during road construction in Byappanahalli, Bengaluru. The JCB driver has been taken into custody.

#BengaluruAccident, #ElectricPoleTragedy, #RoadConstruction, #Negligence, #KarnatakaNews, #AccidentNews