HC Verdict | സുപ്രധാന വിധി: മക്കൾക്ക് നൽകിയ സ്വത്ത് രക്ഷിതാക്കൾക്ക് തിരിച്ചെടുക്കാനാകില്ലെന്ന് ഹൈക്കോടതി

ചെന്നൈ: (www.kasargodvartha.com) മക്കൾക്ക് ഒരിക്കൽ നൽകിയ സ്വത്ത് രക്ഷിതാവിന് തിരിച്ചെടുക്കാനാകില്ലെന്ന് മദ്രാസ് ഹൈക്കോടതിയുടെ സുപ്രധാന വിധി. മാതാപിതാക്കളുടെയും മുതിർന്ന പൗരന്മാരുടെയും മെയിന്റനൻസ് ആൻഡ് വെൽഫെയർ ആക്ട് പ്രകാരം, കൈമാറ്റ രേഖകളിൽ സ്വീകർത്താവ് ദാതാവിനെ പരിപാലിക്കണം എന്ന വ്യവസ്ഥ ഇല്ലെങ്കിൽ, സ്വത്ത് തിരിച്ചെടുക്കാൻ ആവില്ലെന്ന് ജസ്റ്റിസ് ആർ സുബ്രഹ്മണ്യം നിരീക്ഷിച്ചു.       
           
സെക്ഷൻ 23 പ്രകാരം സ്വത്ത് കൈമാറ്റം അസാധുവായി പ്രഖ്യാപിക്കുന്നതിന് രണ്ട് വ്യവസ്ഥകളുണ്ടെന്ന് ജസ്റ്റിസ് ആർ സുബ്രഹ്മണ്യം പറഞ്ഞു. നിയമം പ്രാബല്യത്തിൽ വന്നതിന് ശേഷമായിരിക്കണം കൈമാറ്റ രേഖ തയ്യാറാക്കിയിരിക്കേണ്ടത് എന്നതാണ് ആദ്യത്തെ വ്യവസ്ഥ. രണ്ടാമത്തെ വ്യവസ്ഥ, അത് കൈമാറ്റം ചെയ്യുന്നയാളെ ബാധ്യത ഏറ്റെടുക്കാൻ നിശ്ചയിക്കുക എന്നതാണ്. രണ്ട് വ്യവസ്ഥകളിൽ ഏതെങ്കിലും തൃപ്തികരമല്ലെങ്കിൽ, മെയിന്റനൻസ് ട്രിബ്യൂണലുകളുടെ തലവനായ റവന്യൂ ഡിവിഷണൽ ഓഫീസർമാർക്ക് (RDO) രേഖകൾ അസാധുവായി പ്രഖ്യാപിക്കുന്നതിനുള്ള അപേക്ഷകൾ പരിഗണിക്കാനാവില്ലെന്ന് എസ് സെൽവരാജ് എന്നയാൾ നൽകിയ റിട്ട് ഹർജി തള്ളിക്കൊണ്ട് ജഡ്‌ജ്‌ പറഞ്ഞു

അതേസമയം, ഹരജിക്കാരന് മകനിൽ നിന്ന് ജീവനാംശം ലഭിക്കുന്നതിന് ഉചിതമായ നടപടികൾ കൈകൊള്ളാമെന്ന് ജഡ്‌ജ്‌ വ്യക്തമാക്കി. സ്വത്ത് കൈമാറ്റ രേഖ റദ്ദാക്കാൻ സിവിൽ കോടതിയെ സമീപിക്കാം. നിയമപ്രകാരം പരിപാലിക്കുന്നില്ലെന്ന ആരോപണത്തിൽ കഴമ്പുണ്ടെങ്കിൽ, അത്തരമൊരു കൈമാറ്റം വഞ്ചനയോ നിർബന്ധമോ അനാവശ്യ സ്വാധീനം മൂലമോ നടത്തിയതായി കണക്കാക്കുകയും അത് അസാധുവായി പ്രഖ്യാപിക്കുകയും ചെയ്യാമെന്നും കോടതി ഉത്തരവിൽ പറഞ്ഞു.