History | 52 വർഷം മുമ്പ് ഹോക്കി ലോകകപ്പ് ആരംഭിച്ചത് ഇങ്ങനെ! പിന്നിൽ ഇന്ത്യ-പാക് യുദ്ധവുമായി ബന്ധപ്പെട്ട കൗതുകകരമായ ചരിത്ര പശ്ചാലത്തലവും

ഭുവനേശ്വർ: (www.kasargodvartha.com) പതിനഞ്ചാമത് ഹോക്കി ലോകകപ്പ് ജനുവരി 13ന് ഇന്ത്യയിൽ ആരംഭിക്കും. ടൂർണമെന്റിലെ എല്ലാ മത്സരങ്ങളും ഒഡീഷയുടെ തലസ്ഥാനമായ ഭുവനേശ്വറിലും റൂർക്കേലയിലുമായി നടക്കും. ഭുവനേശ്വറിന് തുടർച്ചയായി രണ്ടാം തവണയാണ് ആതിഥേയത്വം വഹിക്കാനുള്ള അവസരം ലഭിക്കുന്നത്. 2018ലും ഇവിടെ ഹോക്കി ലോകകപ്പ് സംഘടിപ്പിച്ചിരുന്നു. അന്ന് പെനാൽറ്റി ഷൂട്ടൗട്ടിൽ ബെൽജിയം നെതർലൻഡ്‌സിനെ പരാജയപ്പെടുത്തി കിരീടം നേടി.
  
52 വർഷം മുമ്പാണ് ഹോക്കി ലോകകപ്പ് ടൂർണമെന്റ് ആരംഭിച്ചത്. 1971ൽ ആദ്യമായി ഹോക്കി ലോകകപ്പ് സ്പെയിനിൽ നടന്നു. ബാഴ്‌സലോണയിൽ ആതിഥേയരായ സ്‌പെയിനിനെ പരാജയപ്പെടുത്തി പാകിസ്താൻ കിരീടം നേടി. ലോകകപ്പിന്റെ തുടക്കത്തിലെ രസകരമായ കഥയും പാകിസ്ഥാനുമായി ബന്ധപ്പെട്ടതാണ്.


ഹോക്കി ലോകകപ്പ് തുടക്കം

പാകിസ്‌താന്റെ എയർ മാർഷൽ നൂർ ഖാനാണ് ആദ്യമായി ഹോക്കി ലോകകപ്പ് നിർദേശിച്ചത്. വേൾഡ് ഹോക്കി മാസികയുടെ ആദ്യ എഡിറ്ററായ പാട്രിക് റൗളിയിലൂടെ അദ്ദേഹം തന്റെ ആശയം ഇന്റർനാഷണൽ ഹോക്കി ഫെഡറേഷനിൽ (IFH) അവതരിപ്പിച്ചു. 1969-70ൽ ഈ ടൂർണമെന്റിന്റെ കാര്യത്തിൽ ഒരു സുപ്രധാന തീരുമാനമെടുത്തു. ആദ്യ ലോകകപ്പിന്റെ ആതിഥേയത്വം പാകിസ്‌താനെ ഏൽപ്പിക്കുമെന്നായിരുന്നു ചർച്ച.


ആതിഥേയരെ മാറ്റി

അന്ന് ബംഗ്ലാദേശ് പാകിസ്താന്റെ ഭാഗമായിരുന്നു. അവിടെ ബംഗ്ലാദേശ് വിമോചനയുദ്ധം നടക്കുകയായിരുന്നു. ഇക്കാര്യം എഫ്ഐഎച്ച് കാര്യമാക്കിയിരുന്നില്ല. ഇതിന് ആറ് വർഷം മുമ്പും ഇന്ത്യയും പാകിസ്താനും തമ്മിൽ യുദ്ധം നടന്നിരുന്നു. 1965 ന് ശേഷം 1971 ലും ഇരു രാജ്യങ്ങളും മുഖാമുഖം വന്നു. അപ്പോൾ ഇന്ത്യ ബംഗ്ലാദേശിനെ സഹായിക്കുകയും മോചിപ്പിക്കുകയും ചെയ്തു. ഇത്തരമൊരു സാഹചര്യത്തിൽ ക്രിക്കറ്റ് താരം അബ്ദുൽ ഹഫീസ് കർദാറിന്റെ നേതൃത്വത്തിൽ പാകിസ്താനികൾ ഹോക്കി ലോകകപ്പിൽ ഇന്ത്യയെ പങ്കെടുപ്പിക്കുന്നതിനെ എതിർത്തു.


ആതിഥേയത്വം സ്‌പെയിനിന്

പാകിസ്താനും ഇന്ത്യയും തമ്മിലുള്ള ഗുരുതരമായ രാഷ്ട്രീയ കാലാവസ്ഥ കണക്കിലെടുത്ത്, ടൂർണമെന്റ് മറ്റൊരിടത്തേക്ക് മാറ്റാൻ എഫ്ഐഎച്ച് തീരുമാനിച്ചു. ആതിഥേയത്വം സ്പാനിഷ് നഗരമായ ബാഴ്‌സലോണയ്ക്ക് കൈമാറി. ബാഴ്‌സലോണ ശാന്തമായ സ്ഥലമായിരുന്നു. നിഷ്പക്ഷ ഗ്രൗണ്ടിൽ കളിക്കാൻ ഇന്ത്യയുടെയും പാക്കിസ്ഥാന്റെയും ടീമുകൾ സമ്മതിച്ചു. ടൂർണമെന്റിൽ 10 ടീമുകൾ പങ്കെടുത്തു.


1971 ഹോക്കി ലോകകപ്പ്

ചരിത്രത്തിലെ ഏറ്റവും ചെറിയ ലോകകപ്പായിരുന്നു അത്. 1978ൽ 14 ടീമുകൾ പങ്കെടുത്തു. 2002ലും 2018ലും അത് 16 ടീമുകളായി മാറി. ഇത് കൂടാതെ 12 വീതം രാജ്യങ്ങൾ മറ്റ് ലോകകപ്പുകളിൽ പങ്കെടുത്തു. രണ്ട് വർഷം കൂടുമ്പോഴാണ് ആദ്യം മൂന്ന് ടൂർണമെന്റുകൾ നടന്നത്. 1978ൽ നടന്ന ലോകകപ്പ് മൂന്ന് വർഷത്തിന് ശേഷമാണ് നടന്നത്. അതിനുശേഷം നാല് വർഷം കൂടുമ്പോഴാണ് ടൂർണമെന്റ് സംഘടിപ്പിക്കുന്നത്.


ട്രോഫിയിൽ പാകിസ്‌താന്റെ സംഭാവന

പാകിസ്ഥാൻ ആർമിയിലെ കരകൗശല വിദഗ്ധരാണ് ഹോക്കി ലോകകപ്പ് ട്രോഫി നിർമ്മിച്ചത്. സ്വർണവും വെള്ളിയും കൊണ്ടാണ് നിർമാണം. ട്രോഫിയുടെ മുകളിൽ ഗ്ലോബും അതിനു മുകളിൽ ഒരു ഹോക്കി സ്റ്റിക്കും കാണാം.

Keywords:  International, News, Latest-News, Top-Headlines, Sports, Hockey, Hockey-World-Cup, National, Information, India-Vs-Pakistan, Hockey World Cup History.