ബസില്‍ നിന്ന് തെറിച്ചുവീണ വീട്ടമ്മ അതേ ബസിനടിയില്‍ പെട്ട് മരിച്ചു

കാസര്‍കോട്: ബസില്‍ നിന്ന് തെറിച്ചുവീണ വീട്ടമ്മ അതേ ബസിന്റെ ടയര്‍ കയറിയിറങ്ങി മരിച്ചു. കുഡ്‌ലു ആര്‍ഡി നഗര്‍ കന്നിവളപ്പ് ഹൗസിലെ മഹാലിംഗയുടെ ഭാര്യ സരോജിനി(64) യാണ് മരിച്ചത്. ചൊവ്വാഴ്ച വൈകിട്ട് ഉദയഗിരി കൈലാസപുരം ബസ് സ്റ്റോപ്പിനടുത്തുവെച്ചാണ് അപകടം ഉണ്ടായത്.

ഉദയഗിരി വീവേഴ്‌സ് കോ- ഓപ്പറേറ്റീവ് സൊസൈറ്റിയിലെ ജീവനക്കാരിയായ സരോജിനി വൈകിട്ട് ജോലി കഴിഞ്ഞ് വീട്ടില്‍ പോകാന്‍ ഉദയഗിരി കൈലാസപുരം ബസ് സ്റ്റോപ്പില്‍ നിന്നു ബസ് കയറുകയായിരുന്നു. അതിനിടെ ബസില്‍ നിന്ന് തെറിച്ച് റോഡിലേക്ക് വീണ് സരോജിനിയുടെ ദേഹത്ത് ബസിന്റെ ടയറുകള്‍ കയറിയിറങ്ങുകയും ചെയ്തു.

ഗുരുതരമായി പരിക്കേറ്റ സരോജിനിയെ കാസര്‍കോട്ടെ ആശുപത്രിയില്‍ പ്രഥമ ശുശ്രൂഷ നല്‍കിയശേഷം മംഗലാപുരത്തെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മക്കള്‍: ബാലകൃഷ്ണന്‍( ഓട്ടോ ഡ്രൈവര്‍), ജയശ്രി. മരുമക്കള്‍: ദിവാകരന്‍, ഷീലാവതി. സഹോദരങ്ങള്‍: സദാനന്ദ, ശ്രീധര, ദാമോദര, ജലജ, ഭാസുനി, അനിത, ചന്ദ്രകല. ബസ് ഡ്രൈവര്‍ക്കെതിരെ വിദ്യാനഗര്‍ പോലീസ് കേസെടുത്തു.