Drowning | കൂട്ടുകാരായ 3 യുവാക്കൾ കടലിൽ മുങ്ങിമരിച്ചു; വിനോദയാത്ര ദുരന്തത്തിൽ കലാശിച്ചു

മംഗ്ളുറു: (KasargodVartha) സൂറത്ത്കൽ കുളായി ജെട്ടിയിൽ കടലിൽ കുളിക്കാനിറങ്ങിയ മൂന്ന് യുവാക്കൾ തിരയിൽപ്പെട്ട് മുങ്ങിമരിച്ചു. ചിത്രദുർഗ ജില്ലയിലെ ഉപ്പരിഗെനഹള്ളിയിൽ നിന്നുള്ള ശിവലിംഗപ്പയുടെ മകൻ എം എസ് മഞ്ജുനാഥ് (31), ശിവമൊഗ്ഗ ജില്ലയിൽ നിന്നുള്ള ശിവകുമാർ (30), ബെംഗ്ളൂറിലെ ജെപി നഗറിൽ നിന്നുള്ള സത്യവേലു (30) എന്നിവരാണ് മരിച്ചത്. ബിദാർ ജില്ലയിലെ ഹംഗാർഗയിൽ നിന്നുള്ള പരമേശ്വര (30) മത്സ്യത്തൊഴിലാളികളുടെ സമയോചിതമായ ഇടപെടൽ മൂലം രക്ഷപ്പെട്ടു.

എഎംസി എൻജിനീയറിംഗ് കോളജിലെ സഹപാഠികളും അടുത്ത സുഹൃത്തുക്കളുമായിരുന്നു ഈ നാലുപേരും. ചൊവ്വാഴ്ച രാത്രി ബെംഗ്ളൂറിൽ നിന്ന് കാറിൽ യാത്ര തിരിച്ച ഇവർ ബുധനാഴ്ച രാവിലെയാണ് മംഗ്ളൂറിൽ എത്തിയത്. ഒരു ഹോട്ടലിൽ നിന്ന് പ്രഭാതഭക്ഷണം കഴിച്ച ശേഷം ഉച്ചയോടെ ഇവർ കുളായി ജെട്ടിയിലേക്ക് പോവുകയായിരുന്നു. കടലിൽ കളിക്കുന്നതിനിടെ നാലുപേരും അപ്രതീക്ഷിതമായി അപകടത്തിൽ പെടുകയായിരുന്നു.

സ്ഥലത്തുണ്ടായിരുന്ന മത്സ്യത്തൊഴിലാളികൾ രക്ഷാപ്രവർത്തനത്തിന് ഉടൻ തന്നെ ഇറങ്ങിയെങ്കിലും മൂന്നുപേരെ രക്ഷിക്കാനായില്ല. ശിവകുമാറിന്റെയും സത്യവേലുവിന്റെയും മഞ്ജുനാഥിന്റെയും മൃതദേഹങ്ങൾ ജെട്ടിയുടെ വലതുവശത്തുനിന്നാണ് കണ്ടെത്തിയത്. പരമേശ്വരനെ ഉടൻ തന്നെ ആശുപത്രിയിൽ പ്രവേശിപ്പിച്ചു. മൃതദേഹങ്ങൾ പോസ്റ്റ്‌മോർട്ടത്തിനായി എജെ ആശുപത്രിയിലേക്ക് മാറ്റി. സംഭവമറിഞ്ഞ് സൂറത്ത്കൽ പോലീസ് സ്ഥലത്തെത്തി അന്വേഷണം ആരംഭിച്ചു.

#Mangaluru #KulaiJetty #Drowning #Accident #Tragedy #Karnataka