Exploitation | '20 മിനുറ്റ് ദൈർഘ്യമുള്ള വീഡിയോ ഇൻസ്റ്റാഗ്രാമിൽ പങ്കുവെച്ച് മംഗ്ളൂറിൽ യുവാവ് ജീവനൊടുക്കി'; സിഐഎസ്എഫ് വനിതാ ഉദ്യോഗസ്ഥ ചൂഷണം ചെയ്തുവെന്ന് ആരോപണം

മംഗ്ളുറു: (KasargodVartha) സിഐഎസ്എഫ് വനിതാ ഉദ്യോഗസ്ഥ തന്നെ വഞ്ചിച്ചുവെന്നും ചൂഷണം ചെയ്തുവെന്നും ആരോപിച്ച് യുവാവ് മംഗ്ളൂരുറിൽ ജീവനൊടുക്കിയതായി പൊലീസ് പറഞ്ഞു. ഉത്തർപ്രദേശിലെ ഗാസിപൂർ സ്വദേശിയായ അഭിഷേക് സിംഗ് (40) ആണ് മരിച്ചത്. റാവു & റാവു സർക്കിളിനടുത്തുള്ള ഒരു ലോഡ്ജിലാണ്  മരിച്ച നിലയിൽ കണ്ടെത്തിയത്. 

ചെന്നൈയിലെ ഒരു സ്വകാര്യ കമ്പനിയിൽ ജോലി ചെയ്തിരുന്ന അഭിഷേക്, സഹപ്രവർത്തകർക്കൊപ്പം മംഗ്ളൂറിൽ ഒരു പ്രദർശനത്തിൽ പങ്കെടുക്കാൻ എത്തിയതായിരുന്നു. ജീവിതം അവസാനിപ്പിക്കുന്നതിന് മുൻപ് 20 മിനിറ്റ് ദൈർഘ്യമുള്ള ഒരു വീഡിയോ അഭിഷേക് ഇൻസ്റ്റാഗ്രാമിൽ അപ്‌ലോഡ് ചെയ്തു. അതിൽ, സിഐഎസ്എഫ് അസിസ്റ്റന്റ് കമാൻഡന്റ് മോണിക സിഹാഗ് എന്ന വനിതാ ഉദ്യോഗസ്ഥയാണ് തന്റെ മരണത്തിന് കാരണമെന്ന് അഭിഷേക് ആരോപിച്ചു.

വിവാഹിതയാണെന്ന വിവരം മറച്ചുവെച്ച് മോണിക സിഹാഗ് താനുമായി പ്രണയബന്ധം സ്ഥാപിച്ചെന്നും, പിന്നീട് വൈകാരികമായും ശാരീരികമായും സാമ്പത്തികമായും ചൂഷണം ചെയ്തെന്നും അഭിഷേക് വീഡിയോയിൽ ആരോപിച്ചു. എട്ട് ലക്ഷം രൂപ വിലമതിക്കുന്ന സ്വർണം മോണിക തട്ടിയെടുത്തതായും, അവർക്ക് സമാനമായ ബന്ധങ്ങൾ മറ്റ് പലരുമായി ഉണ്ടെന്നും അഭിഷേക് ആരോപിച്ചു. 

തന്റെ ജീവിതം തകർത്തത് മോണികയാണെന്നും, അവരാണ് തന്റെ മരണത്തിന് ഉത്തരവാദിയെന്നും അഭിഷേക് വീഡിയോയിൽ പറയുന്നു. ഈ വെളിപ്പെടുത്തലുകൾ സമൂഹമാധ്യമങ്ങളിൽ വലിയ ചർച്ചകൾക്ക് വഴിവെച്ചിരിക്കുകയാണ്. സംഭവത്തിൽ പാണ്ഡേശ്വർ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. അഭിഷേകിന്റെ മരണത്തിന് കാരണമായ സാഹചര്യങ്ങളെക്കുറിച്ച് വിശദമായ അന്വേഷണം നടത്തുമെന്ന് പൊലീസ് അറിയിച്ചു.

ഈ വാർത്ത എല്ലാവരുമായി പങ്കുവെക്കുക. നിങ്ങളുടെ അഭിപ്രായങ്ങൾ രേഖപ്പെടുത്തുക.

Man died in Mangalore, blames CISF officer in video. Accuses her of cheating, exploitation, and financial fraud. Police have registered a case and are investigating.

#Death, #Mangalore, #CISF, #Exploitation, #Crime, #SocialMedia