പുഴയോരത്ത് മാലിന്യങ്ങള്‍ തള്ളുന്നത് പതിവാകുന്നു; രോഗഭീതിയില്‍ നാട്ടുകാര്‍

By Web Desk SUJun 23, 2017, 13:00 IST

മൊഗ്രാല്‍: (www.kasargodvartha.com 23.06.2017) പുഴയോരത്ത് മാലിന്യങ്ങള്‍ തള്ളുന്നത് പതിവായതോടെ രോഗഭീതിയില്‍ നാട്ടുകാര്‍. മൊഗ്രാല്‍ പുഴയോരത്താണ് അറവ് മാലിന്യവും ഹോട്ടല്‍ വേസ്റ്റും മറ്റും തള്ളി മലിനമാക്കുന്നത്. മൊഗ്രാല്‍ പ്രദേശം മുഴുവന്‍ ദുര്‍ഗന്ധപൂരിതമാണ്.

അറവു മാലിന്യവും വീടുകളിലെ വേസ്റ്റ് സാധനങ്ങളും കൊണ്ട് ഈ പ്രദേശം വീര്‍പ്പു മുട്ടുകയാണ്. മഴക്കാലമായതോടെ പകര്‍ച്ചവ്യാധികള്‍ പടരുമെന്ന ഭീതിയിലാണ് ജനങ്ങള്‍ ഇപ്പോള്‍ കഴിഞ്ഞു കൂടുന്നത്. ഇതിനെതിരെ കണ്ണ് തുറക്കേണ്ട ഉത്തരവാദിത്തപ്പെട്ടവര്‍ ഉറങ്ങുകയാണെന്ന് നാട്ടുകാര്‍ കുറ്റപ്പെടുത്തുന്നു.

പുഴയോരത്ത് മാലിന്യങ്ങള്‍ തള്ളുന്നത് പതിവാകുന്നു; രോഗഭീതിയില്‍ നാട്ടുകാര്‍

പഞ്ചായത്ത് അധികൃതര്‍ മറ്റു പ്രൊജക്ടുകളില്‍ ഒരുപാട് പണം ചെലവഴിക്കുമ്പോള്‍ മനുഷ്യ ജീവന് തന്നെ ഭീഷണിയാവുന്ന ഇത്തരം സംഭവങ്ങള്‍ക്കു നേരെ മുഖം തിരിക്കുന്ന ഈ നിലപാട് ശരിയല്ല. ഈ അവസ്ഥ ഇനിയും തുടര്‍ന്നാല്‍ ശക്തമായ സമര പരിപാടികളുമായി രംഗത്തിറങ്ങുമെന്ന് ഡി വൈ എഫ് ഐ മുന്നറിയിപ്പ് നല്‍കി.

മലിനമായ മൊഗ്രാല്‍ പുഴ സന്ദര്‍ശിച്ച് നടപടികള്‍ സ്വീകരിക്കണമെന്ന് ആവശ്യപ്പെട്ട് ഡി വൈ എഫ് ഐ മൊഗ്രാല്‍ യൂണിറ്റ് സെക്രട്ടറി അര്‍ഷാദ് തവക്കല്‍ പഞ്ചായത്ത് അധികൃതര്‍ക്ക് നിവേദനം നല്‍കി.