ചെറുവത്തൂര്‍ വിജയ ബാങ്ക് കവര്‍ച്ച: ബാങ്ക് ജീവനക്കാരെ ചോദ്യംചെയ്യുന്നു

By Desk DeltaSep 30, 2015, 10:31 IST

ചെറുവത്തൂര്‍: (www.kasargodvartha.com 30/09/2015) ചെറുവത്തൂരിലെ വിജയ ബാങ്ക് കൊള്ളയടിച്ച കേസില്‍ പോലീസ് അന്വേഷണം ബാങ്ക് ജീവനക്കാരിലേക്കും നീളുന്നു. ഇക്കഴിഞ്ഞ ശനിയാഴ്ചയാണ് വിജയാ ബാങ്കിന്റെ ചെറുവത്തൂര്‍ ശാഖയില്‍ കവര്‍ച്ച നടന്നത്. ഒന്നാം നിലയിലുള്ള ബാങ്കിന്റെ താഴെയുള്ള കടമുറിയില്‍ നിന്നും കോണ്‍ക്രീറ്റ് തുരന്നാണ് കവര്‍ച്ചാ സംഘം സ്‌ട്രോങ് റൂമില്‍ കടന്നത്.

സ്‌ട്രോങ് റൂമിലുണ്ടായിരുന്ന രണ്ട് സേഫ് ലോക്കറുകളില്‍ ഒന്നില്‍ നിന്നാണ് സംഘം 5.11 കോടിരൂപ വിലമതിക്കുന്ന സ്വര്‍ണം കവര്‍ന്നത്. സേഫ് ലോക്കര്‍ തകര്‍ക്കാതെയായിരുന്നു മോഷണം. ഇതാണ് ജീവനക്കാര്‍ക്ക് കവര്‍ച്ചയില്‍ പങ്കുണ്ടെന്ന സംശയത്തിന് കാരണം. ലോക്കര്‍ മനപൂര്‍വ്വം പൂട്ടാതിരുന്നതാണോ അബദ്ധത്തില്‍ പൂട്ടാന്‍ മറന്നാതാണോ എന്ന കാര്യമാണ് പോലീസ് അന്വേഷിക്കുന്നത്. കോടികളുടെ സ്വര്‍ണം സൂക്ഷിച്ച ലോക്കര്‍ അടച്ച്പൂട്ടാന്‍ അബദ്ധത്തില്‍ മറന്ന് പോവാന്‍ സാധ്യതയില്ലെന്നാണ് പോലീസിന്റെ നിഗമനം.

ഭദ്രമായി പൂട്ടിയിരുന്ന രണ്ടാമത്തെ സേഫ് ലോക്കര്‍ കവര്‍ച്ചാ സംഘത്തിന് തകര്‍ക്കാന്‍ കഴിഞ്ഞിരുന്നില്ല. ഇതാണ് കവര്‍ച്ചാ സംഘവുമായി ജീവനക്കാര്‍ക്ക് ബന്ധമുണ്ടോ എന്ന സംശയത്തിന് കാരണം. കുഡ്‌ലു ബാങ്ക് കവര്‍ച്ചയുടെ പശ്ചാതലത്തില്‍ സുരക്ഷ ശക്തമാക്കാന്‍ ജില്ലാ പോലീസ് ബാങ്ക് അധികൃതകര്‍ക്ക് നിര്‍ദ്ദേശം നല്‍കിയിരുന്നു. എന്നാല്‍ മുഴുവന്‍ സമയ സുരക്ഷാ ജീവനക്കാരെ നിയമിക്കാന്‍ പോലും വിജയബാങ്കിന്റെ ചെറുവത്തൂര്‍ ശാഖ അധികൃതര്‍ തയ്യാറായിരുന്നില്ല. ബാങ്ക് ജീവനക്കാരെ ചോദ്യംചെയ്യുന്നതിനുള്ള നടപടികള്‍ പോലീസ് ആരംഭിച്ചിട്ടുണ്ട്.