N G Raghunathan | എൻ ജി രഘുനാഥന് എക്സൈസ് കമീഷണറുടെ ബാഡ്ജ് ഓഫ് എക്സലൻസ്; ലഹരിക്കെതിരെയുള്ള പോരാട്ടത്തിന് അംഗീകാരം; 15 വർഷം കൊണ്ട് നടത്തിയത് 2300 ക്ലാസുകൾ

കാസർകോട്: (www.kasargodvartha.com) യുവതലമുറയെ കാര്‍ന്ന് തിന്നുകൊണ്ടിരിക്കുന്ന മദ്യ, മയക്ക് മരുന്ന് വിരുദ്ധ പ്രവർത്തനങ്ങളിൽ കാസർകോട്ടെ നിറസാന്നിധ്യമായ എക്സൈസ് പ്രിവന്റീവ് ഓഫീസർ എൻ ജി രഘുനാഥന് എക്സൈസ് കമീഷണറുടെ ബാഡ്ജ് ഓഫ് എക്സലൻസ് ലഭിച്ചു. അഞ്ച് വിഭാഗങ്ങളിലായി നൽകുന്ന എക്സലൻസ് അവാർഡിൽ ആന്റി കാംപയിനിൻ്റെ പ്രവർത്തന മികവിന് സംസ്ഥാന തലത്തിൽ ഓരോ വർഷവും മൂന്ന് ഉദ്യോഗസ്ഥരെയാണ് പരിഗണിക്കുന്നത്. എല്ലാ വിഭാഗത്തിൽ നിന്നുമായി ജില്ലയിൽ നിന്ന് തെരഞ്ഞെടുക്കപ്പെട്ട ഏക ഉദ്യോഗസ്ഥനാണ് രഘുനാഥൻ.
  
ലഹരി പദാർഥങ്ങളുടെ വിപത്തുകൾക്കെതിരായ ബോധവത്കരണ ക്ലാസുകൾ, ലഹരിക്ക് അടിമപ്പെട്ടവർക്കുള്ള ചികിത്സാ സഹായം, വിദ്യാർഥികൾക്ക് കൗൺസലിംഗ് സൗകര്യം ഒരുക്കിക്കൊടുക്കൽ തുടങ്ങിയ വിമുക്തി മിഷന് നൽകിയ സമഗ്ര സംഭാവനകൾ പരിഗണിച്ചാണ് രഘുനാഥന് ബാഡ്ജ് ഓഫ് എക്സലൻസ് അവാർഡ് ലഭിച്ചത്.

നീലേശ്വരം ചായ്യോത്ത് സ്വദേശിയായ രഘുനാഥൻ 2001 ലാണ് സർവീസിൽ പ്രവേശിച്ചത്. 2007 മുതൽ കഴിഞ്ഞ 15 വർഷം കൊണ്ട് 2300 ഓളം ബോധവത്കരണ ക്ലാസുകളാണ് ഇദ്ദേഹം നടത്തിയിട്ടുള്ളത്. നിരവധി ബോധവത്കരണ പ്രദർശന സ്റ്റാളുകൾക്ക് നേതൃത്വം കൊടുക്കുകയും ചെയ്തിട്ടുണ്ട്. ആവശ്യമായവർക്ക് ചികിത്സയും കൗൺസലിംഗും ലഭ്യമാക്കുന്നതിന് മുൻനിരയിൽ പ്രവർത്തിച്ചു വരികയാണ്.