ദുല്‍ദുല്‍ ഷരീഫ് ഒരുലക്ഷം രൂപ നല്‍കിയ യുവാവിനെ പോലീസ് വീണ്ടും ചോദ്യംചെയ്യാന്‍ വിളിപ്പിച്ചു

ഷരീഫ് തന്നോട് രണ്ടര ലക്ഷം രൂപ കടമായി ആവശ്യപ്പെട്ടിരുന്നുവെന്നും എന്നാല്‍ ഒരു ലക്ഷം രൂപ നല്‍കിയിരുന്നതായും യുവാവ് പോലീസിന് മൊഴിനല്‍കിയിട്ടുണ്ട്. ഈ തുകയാണ് ഷരീഫ് കവര്‍ച്ചനടന്ന് പിറ്റേദിവസം കാസര്‍കോട് ടൗണിലെ തന്റെ കടയിലെത്തി തിരിച്ചേല്‍പിച്ചതെന്നാണ് യുവാവ് പോലീസിനെ അറിയിച്ചിരിക്കുന്നത്. സപ്തംബര്‍ ഒന്നിന് നല്‍കാമെന്ന് പറഞ്ഞാണ് തന്നോട് ഷരീഫ് പണംവാങ്ങിയതെന്ന് എരിയാല്‍ സ്വദേശിയായ യുവാവ് പോലീസിനോട് പറഞ്ഞിരുന്നു. പറഞ്ഞതീയ്യതിക്ക് പണംതിരിച്ചുനല്‍കാത്തതിനെതുടര്‍ന്ന് പലതവണ വാട്‌സ് ആപ്പിലൂടെയും ഫോണിലൂടെയും ആവശ്യപ്പെട്ടിട്ടും വാങ്ങിയപണം നല്‍കിയിരുന്നില്ല. 

പിന്നീട് ഏഴിന് കവര്‍ച്ചനടന്ന് പിറ്റേദിവസം യുവാവിനെ അങ്ങോട്ട് വിളിച്ച് പണം എവിടെയാണ് നല്‍കേണ്ടതെന്ന് ചോദിക്കുകയായിരുന്നു. താന്‍ കാസര്‍കോട്ടെ കടയിലുണ്ടെന്ന് പറഞ്ഞപ്പോള്‍ കടയിലെത്തി പണം ഏല്‍പിച്ച് ഷരീഫ് പോവുകയായിരുന്നുവെന്നും യുവാവ് പോലീസിനെ അറിയിച്ചതായാണ് വിവരം. ബാങ്കില്‍നിന്നും കവര്‍ന്ന പണമാണോ യുവാവിനെ ഷരീഫ് ഏല്‍പിച്ചതെന്നറിയാന്‍ പോലീസ് അന്വേഷണം നടത്തുന്നുണ്ട്. ബാങ്കില്‍നിന്നും നഷ്ടപ്പെട്ട തുകയുടെ സീരിയല്‍ നമ്പര്‍ കണ്ടെത്താന്‍ പോലീസ് ശ്രമം നടത്തിവരികയാണ്. നിരപരാധിത്വം തെളിയിക്കാനായി യുവാവ് കവര്‍ച്ച നടക്കുന്നതിന് ദിവസങ്ങള്‍ക്ക് മുമ്പ് ഷരീഫ് പണം ആവശ്യപ്പെട്ടതിന്റേയും യുവാവ് പണം തിരിച്ചുചോദിച്ചതിന്റേയും മറ്റും വാട്‌സ് ആപ്പ് സന്ദേശങ്ങള്‍ പോലീസിന് നല്‍കിയിട്ടുണ്ടെന്നാണ് സൂചന. യുവാവ് ഇപ്പോഴും പോലീസ് കസ്റ്റഡിയിലാണ്.

കുഡ്‌ലു ബാങ്ക് കൊള്ള: മുഖ്യസൂത്രധാരനായ പൊതുപ്രവര്‍ത്തകന്‍ മുംബൈയില്‍ പിടിയില്‍