കുഡ്‌ലു ബാങ്ക് കൊള്ള: മുഖ്യസൂത്രധാരനായ പൊതുപ്രവര്‍ത്തകന്‍ മുംബൈയില്‍ പിടിയില്‍

By Desk DeltaSep 15, 2015, 12:58 IST

കാസര്‍കോട്: (www.kasargodvartha.com 15/09/2015) കുഡ്‌ലു സര്‍വ്വീസ് സഹകരണ ബാങ്ക് കൊള്ളയുമായി ബന്ധപ്പെട്ട് പോലീസ് തിരയുന്ന മുഖ്യസൂത്രധാരനും പൊതുപ്രവര്‍ത്തകനുമായ ചൗക്കി കല്ലങ്കൈ സ്വദേശിയും ഉപ്പള ബന്തിയോട് താമസക്കാരനുമായ ഷരീഫ് (44) മുംബൈയില്‍ പിടിയിലായി. മുംബൈ വിമാനത്താവളംവഴി ഗള്‍ഫിലേക്ക് കടക്കാനുള്ള ശ്രമത്തിനിടേയാണ് പ്രതി പോലീസിന്റെ പിടിയിലായത്.

(www.kasargodvartha.com)

എന്നാല്‍ ഇയാളില്‍നിന്നും കവര്‍ച്ചാ സ്വര്‍ണം കണ്ടെടുക്കാനായിട്ടില്ലെന്നാണ് വിവരം. സ്വര്‍ണം ഏതോ രഹസ്യകേന്ദ്രത്തില്‍ സൂക്ഷിച്ചിട്ടുണ്ടെന്നാണ് പോലീസിന് ലഭിച്ചിരിക്കുന്ന സൂചന. നേരത്തെ ബംഗളൂരുവില്‍വെച്ച് പോലീസിന്റെ പിടിയിലായ മഹ്ഷൂഖില്‍നിന്ന് ലഭിച്ച നിര്‍ണായക വിവരങ്ങള്‍ പിന്തുടര്‍ന്നാണ് ഷരീഫിനെ മുംബൈയില്‍വെച്ച് പോലീസ് കുടുക്കിയത്. സ്വര്‍ണം കണ്ടെടുക്കാനുള്ള തീവ്രശ്രമത്തിലാണ് പോലീസ്.

(www.kasargodvartha.com)

ചൗക്കി കല്ലങ്കൈയിലെ ജന്മി കുടുംബാംഗമായ ഷരീഫ് അടുത്തകാലത്തായി സാമ്പത്തിക പ്രതിസന്ധിയിലായിരുന്നുവെന്നും ഇത് തരണംചെയ്യാനാണ് നിരവധി കവര്‍ച്ചാകേസുകളില്‍ ഉള്‍പെട്ട ചിലരുമായി ഗൂഡാലോചന നടത്തി കുഡ്‌ലു ബാങ്കില്‍നിന്നും സ്വര്‍ണവും പണവും കൊള്ളയടിക്കാന്‍ പദ്ധതിയിട്ടതെന്നുമാണ് പോലീസിന് വിവരം ലഭിച്ചിരിക്കുന്നത്. മഹ്ഷൂഖില്‍നിന്നും കവര്‍ച്ചയുമായി ബന്ധപ്പെട്ട മുഴുവന്‍ രേഖകളും പോലീസിന് ലഭിച്ചിരുന്നു.

(www.kasargodvartha.com)

മഹ്ഷൂഖ് നല്‍കിയ വിവരത്തിന്റെ അടിസ്ഥാനത്തിലാണ് ഷരീഫിന് വേണ്ടിയുള്ള അന്വേഷണം മുംബൈയിലേക്ക് വ്യാപിപ്പിച്ചത്. മറ്റു പ്രതികള്‍ക്കുവേണ്ടിയുള്ള അന്വേഷണം എറണാകുളത്തും ഗോവയിലുമായി പോലീസ് തുടരുകയാണ്. പിടിയിലായ ഷരീഫിനേയും മറ്റൊരു പ്രധാന പ്രതി മഹ്ഷൂഖിനേയുംകൊണ്ട് പോലീസ് ഉടന്‍തന്നെ കാസര്‍കോട്ട് തിരിച്ചെത്തുമെന്നാണ് വിവരം. കാസര്‍കോട് ഡി.വൈ.എസ്.പി. ടി.പി. രഞ്ജിത്തിന്റെ മേല്‍നോട്ടത്തില്‍ കാസര്‍കോട് സി.ഐ. പി.കെ. സുധാകാരന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതികള്‍ക്കുവേണ്ടിയുള്ള തിരച്ചില്‍ നടത്തിവരുന്നത്.