കുഡ്‌ലു ബാങ്ക് കൊള്ള: ഐ.എന്‍.എല്‍. പ്രക്ഷോഭത്തിലേക്ക്

എരിയാല്‍: (www.kasargodvartha.com 12/09/2015) കുഡ്‌ലു സഹകരണ ബാങ്കില്‍ ജീവനക്കാരികളെ കത്തി കാട്ടി ഭീഷണിപ്പെടുത്തി 21 കിലോ സ്വര്‍ണവും 13 ലക്ഷം രൂപയും കൊളളയടിച്ച സംഭവത്തില്‍ സുരക്ഷാ ക്രമീകരണത്തില്‍ വന്‍ വീഴ്ച വരുത്തിയതായി തെളിഞ്ഞ സാഹചര്യത്തില്‍ ബാങ്ക് ഭരണ സമിതി ഭാരവാഹികളെ അറസ്റ്റ് ചെയ്യുക, നഷ്ടപെട്ട സ്വര്‍ണ്ണം ഇടപാടുകാര്‍ക്ക് തിരിച്ച് കൊടുക്കുക തുടങ്ങിയ ആവശ്യമുന്നയിച്ച് ഐ എന്‍ എല്‍ എരിയാല്‍ മേഖലാ കമ്മിറ്റി  അനിശ്ചിതകാല നിരാഹാരത്തിന് ഒരുങ്ങുന്നു. ഇതിന്റെ മുന്നോടിയായി സൂചനാ സമരമെന്നോളം ബാങ്കിന് മുന്നില്‍ ധര്‍ണയും ഏകദിന ഉപവാസവും സംഘടിപ്പിച്ചു. സ്ഥലം സന്ദര്‍ശിച്ച എ ഡി ജി പി എന്‍. ശങ്കര്‍ റെഡ്ഡിക്ക് ഐ എന്‍ എല്‍ പരാതിയും നല്‍കി.
2001 ല്‍ നടന്ന കവര്‍ച്ചയില്‍ സ്വര്‍ണ്ണം നഷ്ടപെട്ട പലര്‍ക്കും സ്വര്‍ണ്ണം തിരിച്ച് കൊടുക്കാനോ അര്‍ഹമായ നഷ്ടപരിഹാരം നല്‍കാനോ ഭരണ സമിതി ഇതു വരെ തയ്യാറായില്ല. കോടതിയെ സമീപിച്ച ഇടപാടുകാര്‍ക്ക് അനുകൂലമായി വന്ന വിധിക്കെതിരേ മേല്‍ കോടതിയില്‍ അപ്പീല്‍ നല്‍കുന്ന നിലപാടാണ് ഭരണ സമിതി സ്വീകരിച്ചത്. ഇത് സാധാരണകാരോടുളള വെല്ലു വിളിയാണെന്ന് ഐ എന്‍ എല്‍ ജില്ലാ സെക്രട്ടറി അസീസ് കടപ്പുറം ആരോപിച്ചു. ഇതിന് പരിഹാരമുണ്ടാക്കിയില്ലെങ്കില്‍ ഇടപാടുകാരായ സ്ത്രീകളെയും മറ്റുള്ളവരെയും നാട്ടുകാരെയും ഉള്‍പെടുത്തി ശക്തമായ സമരവുമായി മുന്നോട്ട് പോകുമെന്നും അസീസ് കടപ്പുറം മുന്നറിയിപ്പ് നല്‍കി.