കുഡ്‌ലു ബാങ്ക് കൊള്ള: മഹ്ഷൂഖിന്റേയും സാബിറിന്റേയും അറസ്റ്റ് രേഖപ്പെടുത്തി

കാസര്‍കോട്: (www.kasargodvartha.com 16/09/2015) കുഡ്‌ലു ബാങ്ക് കൊള്ളയുമായി ബന്ധപ്പെട്ട് പിടിയിലായ രണ്ട് പ്രതികളുടെ അറസ്റ്റ് പോലീസ് ബുധനാഴ്ച ഉച്ചയോടെ രേഖപ്പെടുത്തി. ചൗക്കി കുന്നിലിലെ മഹ്ഷൂഖ് (25), ചൗക്കി ബദര്‍ നഗറിലെ മുഹമ്മദ് സാബിര്‍ (25) എന്നിവരെയാണ് കാസര്‍കോട് ഡി.വൈ.എസ്.പി. ടി.പി. രഞ്ജിത്തിന്റെ നേതൃത്വത്തില്‍ കേസന്വേഷിക്കുന്ന കാസര്‍കോട് സി.ഐ. പി.കെ. സുധാകരനും സംഘവും അറസ്റ്റുചെയ്തത്.

ബംഗളൂരുവില്‍വെച്ച് പിടിയിലായ മഹ്ഷൂഖിനേയും ഗോവയില്‍വെച്ച് പിടിയിലായ സാബിറിനേയും കാസര്‍കോട്ടെത്തിച്ചശേഷമാണ് അറസ്റ്റുരേഖപ്പെടുത്തിയത്. ബേവിഞ്ച സ്റ്റാര്‍ നഗറില്‍ ബൈക്ക് യാത്രക്കാരനെ കണ്ണില്‍ മുളകുപൊടി വിതറി അഞ്ച് ലക്ഷം രൂപ തട്ടിയെടുത്ത കേസില്‍    പ്രതിയാണ് മഹ്ഷൂഖ്. ഈ കേസിലെ ആറാം പ്രതിയാണ് മഹ്ഷൂഖ്. ബേവിഞ്ച സ്റ്റാര്‍ നഗറിലെ മാര ഹൗസില്‍ സി.എച്ച് ജലീലിനെ 2014 ജൂണ്‍ ഏഴിന് ആക്രമിച്ച് പണം തട്ടിയകേസിലാണ് മഹ്ഷൂഖ് നേരത്തെ പ്രതിയായിരുന്നത്. കാറുകളിലും ബൈക്കിലും പിന്തുടര്‍ന്നെത്തിയ സംഘം ജലീലിന്റെ ബൈക്ക് തടഞ്ഞ് കണ്ണില്‍ മുളകുപൊടി വിതറി പണം തട്ടുകയായിരുന്നു.

കുഡ്‌ലു ബാങ്കിലെ ജീവനക്കരികളേയും ഇടപാടിനെത്തിയ സ്ത്രീയെയും കത്തികാട്ടി ബന്ദിയാക്കി ഭീഷണിപ്പെടുത്തിയാണ് 21 കിലോ സ്വര്‍ണവും 13 ലക്ഷം രൂപയും കവര്‍ന്നത്. ജീവനക്കാരികളെ കസേരയില്‍ കെട്ടിയിട്ടത് മൂന്നുപേരാണ്. സ്വര്‍ണം സൂക്ഷിച്ച സ്‌ട്രോങ്ങ് റൂമിനകത്തേക്ക് കയറിയത് മഹാഷൂഖും സാബിറുമെന്നാണ് പോലീസിന് മൊഴിലഭിച്ചിരിക്കുന്നത്. സ്‌ട്രോംഗ് റൂമിനിലെ മുഴുവന്‍ സ്വര്‍ണവും എടുക്കാനായിരുന്നു പദ്ധതിയിട്ടതെങ്കിലും പുറത്തുകാത്തുനിന്നവര്‍ ചില അപായസിഗ്നല്‍ നല്‍കിയതോടെ സ്‌ട്രോങ്ങ് റൂമിലെ ഒരു വലിപ്പിലെ സ്വര്‍ണം മാത്രംബാക്കിവെച്ച് പ്രതികള്‍ വാഹനങ്ങളില്‍ രക്ഷപ്പെട്ടുവെന്നാണ് ഇരുവരും പോലീസിനോട് വെളിപ്പെടുത്തിയത്.

പ്രതികളെ വൈകിട്ടോടെ കോടതിയില്‍ ഹാജരാക്കുമെന്നാണ് പോലീസ് പറയുന്നത്. കേസിലെ മറ്റുപ്രതികള്‍ക്കുവേണ്ടിയുള്ള തിരച്ചില്‍ ഇപ്പോഴും തുടരുകയാണെന്നാണ് പോലീസ് സൂചന നല്‍കുന്നത്.