Kite Beach Park | വിനോദ സഞ്ചാരികളുടെ പ്രിയപ്പെട്ട ഇടമായി കേരളം മാറുന്നുവെന്ന് മന്ത്രി പി എ മുഹമ്മദ് റിയാസ്; സെല്‍ഫി പോയിന്റുകളും കുട്ടികള്‍ക്കുള്ള കളിസ്ഥലവും ഫുഡ് കോര്‍ടും അടക്കം 1.25 കോടി രൂപ ചെലവഴിച്ച കൈറ്റ് ബീച് പാര്‍ക് ഉദ്ഘാടനം ചെയ്തു

കാസര്‍കോട്: (KasargodVartha) കൂടുതല്‍ സഞ്ചാരികളെ ആകര്‍ഷിക്കാന്‍ കൈറ്റ് ബീച്ച് പാര്‍ക്കിന് സാധിക്കുമെന്ന് പൊതുമരാമത്ത്, ടൂറിസം വകുപ്പ് മന്ത്രി പി.എ.മുഹമ്മദ് റിയാസ്. ഹൊസ്ദുര്‍ഗ്ഗ് കടപ്പുറത്ത് ടൂറിസം വകുപ്പ് നിര്‍മ്മിച്ച കൈറ്റ് ബീച്ച് പാര്‍ക്ക് ഓണ്‍ലൈനായി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

ജില്ലയില്‍ ഒരു ടൂറിസം കേന്ദ്രം കൂടി മനോഹരമായി ഉയര്‍ന്നു വരികയാണ്. ടൂറിസം വകുപ്പ് 1.25 കോടി രൂപ മുതല്‍ മുടക്കിയാണ് കൈറ്റ് ബീച്ച് പാര്‍ക്ക് ആകര്‍ഷകമാക്കിയിരിക്കുന്നത്. ടൂറിസം മേഖലയില്‍ വലിയ കുതിച്ചുചാട്ടം സാധ്യമാക്കാന്‍ സാധിക്കുന്ന പദ്ധതികള്‍ ടൂറിസം വകുപ്പ് നടപ്പിലാക്കുന്നുണ്ട്. ബേക്കല്‍ ടൂറിസം പ്രധാനപ്പെട്ട ചുവടുവെപ്പാണ് നടത്തിയത്.

അജാനൂര്‍ ഗ്രാമപഞ്ചായത്തിലെ കുളവയലില്‍ ബേക്കല്‍ വില്ലേജ് ടൂറിസം പദ്ധതി ആരംഭിക്കാന്‍ പോകുകയാണ്. അത് പൂര്‍ത്തിയാകുമ്പോള്‍ ആ പ്രദേശം വലിയ വികസന കുതിപ്പിന് സാക്ഷിയാകും. സഞ്ചാരികളുടെ പ്രിയപ്പെട്ട ഇടമായി കേരളം മാറുകയാണ്. സംസ്ഥാന സര്‍ക്കാറിന്റെ കൃത്യമായ ഇടപെടലുകളുടെയും കാലാനുസൃതമായ പ്രചരണ പരിപാടികളുടെയും ഫലമായി ഓരോ വര്‍ഷവും കേരളം സന്ദര്‍ശിക്കാനെത്തുന്ന ആഭ്യന്തര സഞ്ചാരികളുടെയും, വിദേശ സഞ്ചാരികളുടെയും എണ്ണത്തില്‍ വന്‍ വര്‍ദ്ധനവാണ് ഉണ്ടാകുന്നതെന്നും മന്ത്രി പറഞ്ഞു.