ആബിദ് വധം: മുഖ്യപ്രതികളായ രണ്ടുപേരെ കൂടി കോടതി പോലീസ് കസ്റ്റഡിയില്‍ വിട്ടു

കാസര്‍കോട്: (www.kasargodvartha.com 17.01.2015) എസ്.ഡി.പി.ഐ പ്രവര്‍ത്തകന്‍ തളങ്കര നുസ്രത്ത് റോഡിലെ സൈനുല്‍ ആബിദി (22) നെ കാസര്‍കോട് എം.ജി റോഡിലെ മുസ്ലിം ലീഗ് ജില്ലാ ഓഫീസ് കെട്ടിടത്തില്‍ പ്രവര്‍ത്തിക്കുന്ന ബെഡ്‌സെന്ററില്‍ കയറി പിതാവിന്റെ മുമ്പില്‍ വെച്ച് കുത്തിക്കൊലപ്പെടുത്തിയ സംഭവത്തില്‍ അറസ്റ്റിലായി റിമാന്‍ഡില്‍ കഴിയുകയായിരുന്ന രണ്ട് മുഖ്യപ്രതികളെ പോലീസ് കൂടുതല്‍ ചോദ്യം ചെയ്യാനായി കസ്റ്റഡിയില്‍ വാങ്ങി.

ബട്ടംപാറ സൂര്‍ളു സ്വദേശിയും തേപ്പ് പണിക്കാരനുമായ അനില്‍ കുമാര്‍ എന്ന കടമ്പ് അനി (24), ബി.എം.എസ്. പ്രവര്‍ത്തകനും ചുമട്ട് തൊഴിലാളിയുമായ അണങ്കൂര്‍ ജെ.പി. കോളനിയിലെ വരുണ്‍ കുമാര്‍ എന്ന അണ്ണു (27) എന്നിവരെയാണ് കേസ് അന്വേഷിക്കുന്ന സി.ഐ. പി.കെ. സുധാകരന്‍ കൂടുതല്‍ ചോദ്യം ചെയ്യാനായി കസ്റ്റഡിയില്‍ വാങ്ങിയത്.

കാസര്‍കോട് ജെ.എഫ്.സി.എം. കോടതിയാണ് വെള്ളിയാഴ്ച പ്രതികളെ പോലീസ് കസ്റ്റഡിയില്‍ വിട്ടത്. കൊലപാതകം സംബന്ധിച്ചും മറ്റു പ്രതികളൂടെ പങ്കിനെക്കുറിച്ചും കൊലപാതകത്തിന്റെ ആസൂത്രണം സംബന്ധിച്ചും കൂടുതല്‍ വിവരങ്ങള്‍ ശേഖരിക്കാനാണ് പ്രതികളെ കസ്റ്റഡിയില്‍ വാങ്ങിയതെന്ന് സി.ഐ പറഞ്ഞു.

കേസിലെ മറ്റൊരു പ്രതി ജ്യോതിഷിനെ നേരത്തെ രണ്ടു ദിവസത്തേക്ക് കസ്റ്റഡിയില്‍ വാങ്ങുകയും ചോദ്യം ചെയ്യലിന് ശേഷം തിരിച്ച് കോടതിയില്‍ ഹാജരാക്കുകയും ചെയ്തിരുന്നു. കൊലപാതകത്തിന്റെ ഗൂഢാലോചനയിലും ഒത്താശ ചെയ്ത് കൊടുത്തതിലും പങ്കുള്ള ചിലരെ കൂടി ഇനി അറസ്റ്റ് ചെയ്യാനുണ്ട്.

ഡിസംബര്‍ 22ന് രാത്രിയാണ് സൈനുല്‍ ആബിദിനെ ബെഡ്‌സെന്ററില്‍ കയറി പിതാവിന്റെ മടിയിലേക്ക് തല കുനിച്ച് നിര്‍ത്തി കുത്തിക്കൊലപ്പെടുത്തിയത്.