സി.പി.എം. നിരാഹാര സമരം പിന്‍വലിച്ചു

കാസര്‍കോട്: പാചക വാതക വിലവര്‍ധനവിനും വിലക്കയറ്റത്തിനുമെതിരെ സി.പി.എം. നടത്തിവന്ന നിരാഹാര സമരം അവസാനിപ്പിച്ചു. ശനിയാഴ്ച ഉച്ചയ്ക്ക് സമരം അവസാനിപ്പിക്കുന്നതായി സംസ്ഥാന സെക്രട്ടറി പിണറായി വിജയന്‍ കണ്ണൂരില്‍ വാര്‍ത്താ സമ്മേളനത്തില്‍ പ്രഖ്യാപനം നടത്തിയതിന് പിന്നാലെയാണ് സമരം അവസാനിപ്പിച്ചത്.

കാസര്‍കോട് ജില്ലയില്‍ 50 കേന്ദ്രങ്ങളിലാണ് കഴിഞ്ഞ നാല് ദിവസമായി നിരാഹാര സമരം നടത്തിവന്നത്. ഒരു മണ്ഡലത്തില്‍ 10 വീതം സ്ഥലങ്ങളിലായി സംസ്ഥാനത്ത് 1,400 കേന്ദ്രങ്ങളിലായിരുന്നു സമരം. കാസര്‍കോട് പുതിയ ബസ് സ്റ്റാന്‍ഡ് പരിസരത്ത് സി.ഐ.ടി.യു. നേതാവ് ടി.കെ. രാജന്‍ നടത്തിവന്ന സമരം എം.പി. പി. കരുണാകരന്‍ നാരങ്ങാനീര് നല്‍കി അവസാനിപ്പിച്ചു. നേതാക്കളായ എം. സുമതി, കെ. ഭാസ്‌ക്കരന്‍, കെ. കുഞ്ഞിരാമന്‍, കെ.യു. മേരി തുടങ്ങിയവര്‍ സംബന്ധിച്ചു.