കാണാതായ യുവാവിനെ തൂങ്ങി മരിച്ച നിലയില്‍ കണ്ടെത്തി

ചെറുവത്തൂര്‍: (www.kasargodvartha.com 05.04.2019) രണ്ടു ദിവസം മുമ്പ് കാണാതായ യുവാവിന്റെ മൃതദേഹം സായി മന്ദിരത്തിനടുത്ത് തൂങ്ങി മരിച്ച നിലയില്‍ കണ്ടെത്തി. ചീമേനി പിലാന്തോളിയിലെ തന്തര വീട്ടില്‍ മാനുവല്‍ എന്ന പാപ്പച്ചന്റെ മകന്‍ മനു ഇമ്മാനുവലിനെ (22)യാണ് ചീമേനി കുറിക്കുണ്ടിലെ സായി മന്ദിരത്തിനോടു ചേര്‍ന്നുള്ള കഴുക്കോലില്‍ തൂങ്ങി മരിച്ച നിലയില്‍ കണ്ടെത്തിയത്.

വെള്ളിയാഴ്ച രാവിലെയാണ് പരിസരവാസികള്‍ മൃതദേഹം കണ്ടെത്തിയത്. മനു സഞ്ചരിച്ച ബൈക്ക് ഏതാനും മാസം മുമ്പ് മൈസൂരില്‍ വെച്ച് അപകടത്തില്‍പെട്ടിരുന്നു. ഇതിനു ശേഷം ഇയാള്‍ ഏറെ അസ്വസ്ഥനായിരുന്നുവത്രെ. വീട്ടില്‍ നിന്ന് കാണാതായതിനെ തുടര്‍ന്ന് ബന്ധുക്കള്‍ അന്വേഷണം നടത്തിയിരുന്നുവെങ്കിലും കണ്ടെത്താനായില്ല. സായി മന്ദിരത്തിനോടു ചേര്‍ന്നുള്ള കഴുക്കോലില്‍ പുതപ്പില്‍ കെട്ടിത്തൂങ്ങിയ നിലയിലാണ് മൃതദേഹം.

ചീമേനി പോലീസ് ഇന്‍ക്വസ്റ്റ് നടത്തിയ ശേഷം മൃതദേഹം പോസ്റ്റുമോര്‍ട്ടത്തിനായി പരിയാരം മെഡിക്കല്‍ കോളേജ് ആശുപത്രിയിലേക്ക് മാറ്റി.