വിവാഹ വീട്ടിലെ ഭക്ഷണാവശിഷ്ടങ്ങള്‍ പുഴയില്‍ തള്ളാനെത്തിയ യുവാവ് അറസ്റ്റില്‍; കാര്‍ കസ്റ്റഡിയില്‍

By Web Desk SNNov 13, 2017, 13:36 IST

കാസര്‍കോട്: (www.kasargodvartha.com 13/11/2017) വിവാഹ വീട്ടിലെ ഭക്ഷണാവശിഷ്ടങ്ങള്‍ പുഴയില്‍ തള്ളാനെത്തിയ യുവാവിനെ പോലീസ് അറസ്റ്റു ചെയ്തു. ചൗക്കി ആസാദ് നഗറിലെ സൈനുല്‍ ആബിദീന്‍ തങ്ങളെ (33)യാണ് അറസ്റ്റു ചെയ്തത്. ഞായറാഴ്ച രാത്രി 7.50 മണിയോടെയാണ് സംഭവം. കാറില്‍ മാലിന്യങ്ങളുമായെത്തി എരിയാല്‍ പാലത്തിന് സമീപം പുഴയില്‍ തള്ളാന്‍ ശ്രമിക്കുന്നതിനിടെയാണ് സൈനുല്‍ ആബിദീന്‍ പിടിയിലായത്.

ഇയാളുടെ വീട്ടില്‍ നടന്ന വിവാഹത്തിന്റെ ഭക്ഷണാവശിഷ്ടങ്ങളാണ് പുഴയില്‍ തള്ളാന്‍ ശ്രമിച്ചത്. ചാക്കിലാക്കിയാണ് അവശിഷ്ടങ്ങള്‍ കൊണ്ടുവന്നത്. മാലിന്യം കൊണ്ടുവന്ന കാറും പോലീസ് കസ്റ്റഡിയിലെടുത്തു.