ബൈപ്പാസ് ആവശ്യം വീണ്ടും ചൂട്പിടിക്കുന്നു
Aug 6, 2012, 23:54 IST
അതേസമയം റോഡ് വികസനംമൂലം ഭൂമിനഷ്ടപ്പെടുന്നവര്‍ നല്‍കിയ പരാതിയുടെ അടിസ്ഥാനത്തില്‍ റവന്യൂ അധികൃതര്‍ ആദ്യഘട്ട ഹിയറിംഗ് തുടങ്ങിയിട്ടുണ്ട്. കുഡ്‌ലു, കാസര്‍കോട് വില്ലേജിലെ പരാതിക്കാരെ വിളിച്ച് സ്ഥലം നഷ്ടപ്പെടുന്നതിനെകുറിച്ച് വിശദമായ അന്വേഷണവും നടത്തി. ഇതിനുവേണ്ടി കളക്ട്‌റേറ്റില്‍ മാസങ്ങള്‍ക്കുമുമ്പ് എല്‍.എ. സെക്ഷനില്‍ പരാതികള്‍ സ്വീകരിച്ചിരുന്നു. ഈ പരാതികള്‍ ശരിയാണോ എന്നും പരാതിക്കാരന്‍ യഥാര്‍ത്ഥമാണോ എന്നും പരാതികളില്‍ പറഞ്ഞ കാര്യങ്ങള്‍ സത്യമാണോ എന്നുമാണ് ആദ്യഘട്ട ഹിയറിംഗില്‍ ബന്ധപ്പെട്ട ഉദ്യോഗസ്ഥര്‍ പരിശോധിച്ചത്.
തലപ്പാടി മുതല്‍ കാസര്‍കോട് വരെ നാല് വരിപാതയുമായി ബന്ധപ്പെട്ട് സര്‍വ്വേകല്ലിട്ടിട്ടുണ്ട്. ഇതില്‍ മൊഗ്രാല്‍ പുത്തൂരില്‍ റെയില്‍വേ ട്രാക്കിനോടടുത്താണ് കല്ലിട്ടിട്ടുള്ളത്. ഇതേചൊല്ലി റെയില്‍വേയും ദേശീയപാത അധികൃതരും തമ്മിലുള്ള തര്‍ക്കവും നിലവിലുണ്ട്. നാല് വരി പാതയ്ക്ക് റെയില്‍ പാളത്തിന്റെ സാമിപ്യം അപകടത്തിന് വഴിവെക്കുമെന്നും വിലയിരത്തപ്പെടുന്നു.
ആക്ഷന്‍ കമ്മിറ്റിയാണ് ചൗക്കി-ഉളിയത്തടുക്ക വഴിയുള്ള ബൈപ്പാസ് റോഡ് വേണമെന്ന് ആവശ്യപ്പെട്ടിരിക്കുന്നത്. നിലവിലുള്ള ദേശീയപാത നാല് വരിയാക്കുമ്പോള്‍ നഷ്ടപരിഹാരമായി വന്‍തുക നല്‍കേണ്ടിവരുമെന്നും എന്നാല്‍ ബൈപ്പാസ് നിര്‍മ്മിക്കുന്നത് വഴി സര്‍ക്കാറിന് വന്‍ലാഭമുണ്ടാകുമെന്നാണ് ആക്ഷന്‍ കമ്മിറ്റിയുടെ വിലയിരുത്തല്‍. അതേസമയം വളവുകള്‍ ദേശീയപാതയില്‍ വാഹനങ്ങളുടെ വേഗതക്ക് തടസ്സമുണ്ടാകുമെന്നും അതുകൊണ്ട് ബൈപാസിന് സാധ്യതയില്ലെന്നും വാദിക്കുന്നവരുമുണ്ട്. എന്നാല്‍ ഇപ്പോള്‍ റെയില്‍വേയും ഹൈവേയും തമ്മിലുള്ള തര്‍ക്കംമൂലം ദേശീയപാത വികസന പ്രവര്‍ത്തനങ്ങള്‍ മന്ദീഭവിച്ചിരിക്കുകയാണ്.
കാസര്‍കോട് നഗരം വെട്ടിമുറിക്കുന്നത് ഒഴിവാക്കുവാനും മുന്‍സിപ്പല്‍ ബസ് സ്റ്റാന്‍ഡിന്റെ മുന്‍വശം ഉള്‍പ്പടെയുള്ള ഭാഗങ്ങള്‍ റോഡിന് വേണ്ടി വിട്ടുകൊടുക്കേണ്ടിവരുന്ന സാഹചര്യം ഇല്ലാതാക്കാനും ദേശിയ പാതയ്ക്ക് കാസര്‍കോട്ട് ബൈപാസ് നിര്‍മ്മിക്കണമെന്ന് വിവിധ രാഷ്ട്രിയ കക്ഷികളും ജനപ്രതിനിധികളും നേരത്തെ ആവശ്യം ഉന്നയിച്ചിരുന്നു. കാസര്‍കോട് മുന്‍സിപ്പാലിറ്റിയും ഇത് സംബന്ധിച്ച് പ്രമയം പാസാക്കിയിരുന്നു. ഇതിനിടയിലാണ് ബൈപാസ് ആവശ്യം ഉന്നയിച്ച് ആക്ഷന്‍ കമ്മിറ്റി ഹൈക്കോടതിയെ സമീപ്പിച്ചത്.
എന്നാല്‍ ബൈപാസ് ആവശ്യം ഏതാനും കെട്ടിട ഉടമകളുടേത് മാത്രമാണെന്ന് പ്രചരിപ്പിക്കാനും ചിലനിക്ഷിപ്ത താല്‍പര്യക്കാര്‍ ശ്രമം നടത്തി. ചൗക്കി ഭാഗങ്ങളില്‍ ഏതാനും കുടുംബങ്ങളെ കുടിയൊഴിപ്പിക്കേണ്ടിവരുന്ന കാരണവും ഇവര്‍ ബൈപാസ് വിരുദ്ധ പ്രചരണത്തിനായി ഉപയോഗിച്ചു.
കുടിയൊഴിപ്പിക്കുന്നവര്‍ക്ക് അര്‍ഹമായ നഷ്ടപരിഹാരം നല്‍കി ഭരണതലത്തില്‍ ആവശ്യമായ നടപടികളെടുക്കുന്നതിന് പകരം ബൈപാസ് ആവശ്യത്തെ മരവിപ്പിക്കാനാണ് പിന്നീടുണ്ടായ നീക്കങ്ങള്‍. ചൗക്കി വഴി ബൈപാസ് നിര്‍മ്മാണം നടക്കുകയാണെങ്കില്‍ ആ പ്രദേശത്ത് ബസ് സ്റ്റാന്‍ഡ് ഉള്‍പ്പടെ വന്‍വികസനം സ്വപ്‌നം കാണാനും നിലവിലെ കാസര്‍കോട് ടൗണിന്റെ സൗന്ദര്യം നഷ്ടപ്പെടാതെ നോക്കാനും നാട്ടിലെ രാഷ്ട്രിയക്കാര്‍ക്കും നാഴികയ്ക്ക് നാല്‍പ്പത് വട്ടം വികസന പ്രസംഗിക്കുന്നവര്‍ക്കും സാധിച്ചിട്ടില്ലെന്നാണ് യാഥാര്‍ത്ഥ്യം. വികസന സെമിനാറുകളിലും മറ്റും ഒട്ടനേകം പദ്ധതികള്‍ അവതരിപ്പിച്ചുട്ടെങ്കിലും ബൈപാസിനു വേണ്ടിയുള്ള യാതൊരു നീക്കങ്ങളും ഇതുവരെ ഉണ്ടായിട്ടില്ലെന്നാണ് വാസ്തവം. ഇന്നല്ലെങ്കില്‍ നാളെ കാസര്‍കോട്ട് പുതിയൊരു റോഡ് കൂടി വേണ്ടിവരുമെന്ന് സമ്മതിക്കാത്തവരില്ല. അത് അല്‍പം നേരത്തെയാക്കാനോ വികസന കാര്യത്തില്‍ ഒരു ചുവടു മുന്നോട്ട് വെക്കാനോ ആവശ്യമായ ദീര്‍ഘദൃഷ്ടിയെങ്കിലും ബന്ധപ്പെട്ടവരില്‍ നിന്നുണ്ടാവണമെന്നാണ് വികസനം സ്വപ്‌നം കാണുന്നവരുടെ ആഗ്രഹം.
Tags
Share this story
