Potholes | യൂത്ത് ലീഗ് എണ്ണി, ചന്ദ്രഗിരി പാലം മുതൽ ചളിയങ്കോട് വരെ 136 കുഴികൾ! കെ എസ് ടി പി റോഡിൽ യാത്രക്കാർക്ക് നരകയാതന
● 33 വലിയ കുഴികളും റോഡിലുണ്ട്.
● കുഴികളിൽ വീണ് നിരവധി അപകടങ്ങൾ ഉണ്ടായിട്ടുണ്ട്.
● അധികൃതരുടെ അലംഭാവത്തിനെതിരെ ശക്തമായ പ്രതിഷേധം
കാസർകോട്: (KasargodVartha) ചന്ദ്രഗിരി സംസ്ഥാന പാതയിലെ യാത്രക്കാർ കുഴികളിൽ വീണ് നരകയാതന അനുഭവിക്കുന്നത് തുടരുന്നു. ചന്ദ്രഗിരി പാലം മുതൽ ചളിയങ്കോട് പാലം വരെ 136 കുഴികളാണ് ഈ പാതയിൽ രൂപപ്പെട്ടിരിക്കുന്നത്. ഇതിൽ 33 എണ്ണം വലിയ കുഴികളാണ്. മുസ്ലിം യൂത് ലീഗ് ചെമ്മനാട് ശാഖാ കമ്മിറ്റി നടത്തിയ സർവേയിലാണ് റോഡിന്റെ ശോചനീയാവസ്ഥയുടെ ഭീകര ചിത്രം ഒരിക്കൽ കൂടി പുറത്തുവന്നത്. റോഡിലെ ഈ ദുരിതക്കാഴ്ച കണ്ടില്ലെന്ന് നടിക്കുന്ന അധികൃതരുടെ അലംഭാവത്തിനെതിരെ ശക്തമായ പ്രതിഷേധമാണ് ജനങ്ങളിൽ നിന്ന് ഉയരുന്നത്.
റോഡിൽ ഇത്രയധികം കുഴികൾ രൂപപ്പെട്ടിട്ടും, ഇതുമൂലം നിരവധി അപകടങ്ങൾ സംഭവിച്ചിട്ടും അധികൃതർ കണ്ണടച്ചിരിക്കുകയാണ്. കുഴികൾ കാരണം അനവധി അപകടങ്ങൾ ഉണ്ടായിട്ടും അധികൃതർ നടപടിയെടുക്കാത്തതിൽ നാട്ടുകാർക്കിടയിൽ വലിയ പ്രതിഷേധമുണ്ട്. കുഴികൾ അടക്കാതെ കോട്ടരുവം പാലത്തിന് പെയിന്റടിക്കുന്ന അധികൃതരുടെ നടപടി അടുത്തിടെ വിമർശനങ്ങൾക്ക് ഇടയാക്കിയിരുന്നു.
സംസ്ഥാന പാതയുടെ നിർമാണം അശാസ്ത്രീയമാണെന്നുള്ള ആരോപണം ആദ്യം മുതൽ തന്നെ ശക്തമാണ്. കനത്ത മഴയെ താങ്ങാനാവാത്ത ദുർബലമായ അടിത്തറയാണ് റോഡിനുള്ളതെന്നാണ് ആക്ഷേപം. മഴ പെയ്താൽ ഉടൻ തന്നെ റോഡ് തകർന്ന് കുഴികൾ രൂപപ്പെടുന്നത് പതിവാണ്. നിർമാണം തുടങ്ങിയ കാലം മുതൽ നിരവധി പേർക്ക് ഈ റോഡിലുണ്ടായ അപകടങ്ങളിൽ ജീവൻ നഷ്ടപ്പെട്ടിട്ടുണ്ട്. റോഡിന്റെ ശോചനീയാവസ്ഥയ്ക്ക് ശാശ്വതമായ പരിഹാരം കാണാതെ അധികൃതർ അലംഭാവം കാണിക്കുന്നതായും ആക്ഷേപമുണ്ട്.
കുഴികളിൽ വീണ് വാഹനങ്ങൾ അപകടത്തിൽപ്പെടുന്ന സംഭവങ്ങൾ പതിവായി റിപോർട് ചെയ്യപ്പെടുന്നു. ഇരുചക്ര വാഹന യാത്രക്കാരാണ് കൂടുതലും അപകടത്തിൽപ്പെടുന്നത്. കുഴികളിൽ വീണ് വാഹനങ്ങൾ നിയന്ത്രണം വിട്ട് മറിഞ്ഞു വീഴുന്നത് സാധാരണ കാഴ്ചയാണ്. ഇത് നിരവധി പേരുടെ ജീവൻ അപകടത്തിലാക്കുകയും വാഹനങ്ങൾക്ക് കേടുപാടുകൾ വരുത്തുകയും ചെയ്യുന്നു.
പ്രശ്നം നിരവധി തവണ അധികൃതരുടെ ശ്രദ്ധയിൽ പെടുത്തിയിട്ടും ഫലപ്രദമായ നടപടിയുണ്ടായിട്ടില്ല. വർഷം തോറും റോഡ് തകരുമ്പോഴും താൽക്കാലിക അറ്റകുറ്റപ്പണികൾ മാത്രമാണ് നടത്തുന്നത്. ദിവസങ്ങൾക്കകം റോഡ് പഴയപടിയാകുന്നു. കളനാട് പള്ളിക്ക് മുന്നിൽ അദാനി ഗ്രൂപ്പിന്റെ ഗ്യാസ് പൈപ് ലൈനിന് വേണ്ടി റോഡ് കുഴിച്ചപ്പോൾ ഉണ്ടായ പ്രശ്നവും ഇതുവരെ പരിഹരിക്കപ്പെട്ടിട്ടില്ല. ചന്ദ്രഗിരി പാതയിലെ കുഴിയിൽ വീണ് അപകടം സംഭവിക്കുന്നത് കാത്തിരിക്കുകയാണോ അധികൃതർ എന്നാണ് നാട്ടുകാരുടെ ചോദ്യം.
#Kasaragod, #KSTPRoad, #Potholes, #RoadSafety, #KeralaRoads, #PublicProtest
Tags
Share this story
