എസ് ഐയെ തള്ളിവീഴ്ത്തിയ ശേഷം പുഴയില്‍ ചാടി രക്ഷപ്പെട്ട പ്രതി അറസ്റ്റില്‍

കുമ്പള:  (www.kasargodvartha.com 27.09.2017) മണല്‍ക്കടത്തുമായി ബന്ധപ്പെട്ട കേസില്‍ പിടികൂടാനെത്തിയ എസ് ഐയെ തള്ളിവീഴ്ത്തി പുഴയില്‍ ചാടി രക്ഷപ്പെട്ട പ്രതിയെ  പോലീസ് അറസ്റ്റ് ചെയ്തു. കുമ്പള ഉളുവാറിലെ ഓണന്ത ലത്വീഫിനെ (38)യാണ് പോലീസ് അറസ്റ്റ് ചെയ്തത്. അഡീഷണല്‍ എസ്.ഐ. ശിവദാസിന്റെ പരാതിയിലാണ് ലത്വീഫിനെതിരെ കുമ്പള പോലീസ് കേസെടുത്തിരുന്നത്.

ആരിക്കാടി സമീര്‍ കൊലക്കേസിലെ പ്രതിയാണ് ലത്വീഫ്. ഇക്കഴിഞ്ഞ ആഗസ്ത് 20ന് രാവിലെ മണല്‍ക്കടത്ത് കേസുമായി ബന്ധപ്പെട്ട് ലത്വീഫിനെ പിടികൂടാന്‍ എ എസ് ഐ ശിവദാസിന്റെ നേതൃത്വത്തിലുള്ള പോലീസ് സംഘം ലത്വീഫിന്റെ വീട്ടിലെത്തിയതായിരുന്നു. എന്നാല്‍ എസ് ഐയെ തള്ളിവീഴ്ത്തിയ ശേഷം ലത്വീഫ് വീടിന് പുറത്തേക്കോടുകയായിരുന്നു. പോലീസ് പിന്തുടര്‍ന്നതോടെ ലത്വീഫ് പുഴയില്‍ ചാടുകയും എസ് ഐക്ക് നേരെ വധഭീഷണി മുഴക്കുകയും ചെയ്തു.



പുഴയിലിറങ്ങിയാല്‍ മുക്കിക്കൊല്ലുമെന്നായിരുന്നു ഭീഷണിപ്പെടുത്തിയത്. ലത്വീഫിനെ പുഴയിലിറങ്ങി പിടികൂടാന്‍ പോലീസ് ശ്രമം നടത്തിയെങ്കിലും ഇയാള്‍ നീന്തി രക്ഷപ്പെടുകയായിരുന്നു. പോലീസിനെ ആക്രമിച്ചതിനും കൃത്യനിര്‍വഹണം തടസപ്പെടുത്തിയതിനും ലത്വീഫിനെതിരെ പോലീസ് കേസെടുത്തിരുന്നുവെങ്കിലും പ്രതിയെ പിടികൂടാന്‍ കഴിഞ്ഞിരുന്നില്ല. ഇതിനിടെ ലത്വീഫിനെ നല്ലനടപ്പിന് ശിക്ഷിക്കണമെന്നാവശ്യപ്പെട്ട് കുമ്പള പോലീസ് ആര്‍.ഡി.ഒക്ക് റിപ്പോര്‍ട്ട് നല്‍കുകയും ചെയ്തിരുന്നു. ചൊവ്വാഴ്ച രാത്രി കുമ്പളയില്‍ നിന്നാണ് ലത്വീഫിനെ പോലീസ് കസ്റ്റഡിയിലെടുത്തത്.

Related News:
എസ് ഐയെ തള്ളിവീഴ്ത്തിയ ശേഷം പുഴയില്‍ ചാടിയ യുവാവിനെതിരെ നല്ലനടപ്പിന് പോലീസ് റിപ്പോര്‍ട്ട്