Social Service | എസ്‌വൈഎസ് സാന്ത്വന ദിനത്തിൽ കാസർകോട്ട് സേവനമനസ്ക്കരുടെ ഒത്തൊരുമ

കാസർകോട്: (KasargodVartha) സാമൂഹിക സേവനത്തിന്റെ പുതിയ അധ്യായം രചിച്ചുകൊണ്ട് എസ്‌വൈഎസ് സാന്ത്വന ദിനം ജില്ലയിൽ ആഘോഷിച്ചു. വിവിധ പരിപാടികളിലൂടെ സമൂഹത്തിലെ അഗതികളെയും ദുരിതബാധിതരെയും സഹായിക്കുക എന്ന ലക്ഷ്യത്തോടെയാണ് ഈ ദിനം ആചരിക്കുന്നത്.

കാസർകോട് ജനറൽ ആശുപത്രിയിൽ നടന്ന ഭക്ഷണ വിതരണോത്ഘാടനം എസ്‌വൈഎസ് സംസ്ഥാന സാന്ത്വനം പ്രസിഡന്റ് ഡോ. ദേവർശോല അബ്ദുസ്സലാം മുസ്‌ലിയാർ നിർവഹിച്ചു. ജില്ല പ്രസിഡന്റ് കാട്ടിപ്പാറ അബ്ദുൽ ഖാദിർ സഖാഫി, ജില്ലാ ഫിനാൻസ് സെക്രട്ടറി മൂസ സഖാഫി കളത്തൂർ, സാന്ത്വനം സെക്രട്ടറി അബ്ദുൽ റസാഖ് സഖാഫി കോട്ടക്കുന്ന്, ഒർഗനൈസിംഗ് പ്രസിഡന്റ് സിദ്ധീഖ് സഖാഫി ബായാർ, വഹാബ് സഖാഫി മമ്പാട്, അഷ്‌റഫ് സഖാഫി തലേക്കുന്നു, ബഷീർ ഏണിയാടി, അബ്ദുൽ അസീസ് സൈനി, മുനീർ എർമാളം, മുഹ് മദ് കുഞ്ഞി ഉളുവാർ തുടങ്ങിയവർ സംബന്ധിച്ചു.  

‘സാന്ത്വന ദിനം സമൂഹത്തിലെ അഗതികളോടുള്ള നമ്മുടെ കരുതലിന്റെ പ്രതീകമാണ്. ഈ ദിനം നമുക്ക് അവരെ സഹായിക്കാനുള്ള ഒരു അവസരമായി കാണണം,’ ഡോ. ദേവർശോല അബ്ദുസ്സലാം മുസ്‌ലിയാർ പറഞ്ഞു.

ജില്ലാ സുന്നി സെന്റർ മസ്ജിദിൽ നടന്ന രിഫാഈ അനുസ്മരണ സംഗമത്തിൽ രിഫാഈ തങ്ങളുടെ ജീവിതവും പ്രവർത്തനങ്ങളും മാതൃകയാക്കണമെന്ന് ആഹ്വാനം ചെയ്തു. സംഗമത്തിൽ ഡോ.ദേവർശോല അബ്ദുസ്സലാം മുസ്‌ലിയാർ നേതൃത്വം നൽകി. ജില്ലാ ഫിനാൻസ് സെക്രട്ടറി മൂസ സഖാഫി കളത്തൂർ ഉദ്ഘാടനം ചെയ്തു. 

മഞ്ചേശ്വരം സോൺ കമ്മിറ്റിയുടെ നേതൃത്വത്തിൽ മൂഹിമ്മാത്ത് സേഫ് ഹോമിലും കാസർകോട് തെരുവിലും ഭക്ഷണ വിതരണം നടത്തി. ബദിയടുക്കയിൽ കിറ്റ് വിതരണവും കാഞ്ഞങ്ങാട് സോൺ ബഡ്സ് സ്കൂളിൽ സേവനവും തൃകരിപ്പൂരിൽ വിധവകൾക്ക് ഫുഡ്‌ കിറ്റ് വിതരണവും നടത്തി. 

സാന്ത്വന ദിനത്തിൽ സംഘടിപ്പിച്ച വിവിധ പരിപാടികളിൽ സോൺ നേതാക്കളും പ്രവർത്തകരും അധ്യാപകരും വിദ്യാർത്ഥികളും ഉൾപ്പെടെ നിരവധി പേർ പങ്കെടുത്തു.

ഫോട്ടോ : എസ് വൈ എസ് സാന്ത്വന ദിനത്തിൽ കാസർകോട് ജനറൽ ആശുപത്രിയിൽ ഭക്ഷണ വിതരണോത്ഘാടനം എസ് വൈ എസ് സംസ്ഥാന സാന്ത്വനം പ്രസിഡന്റ് ഡോ.ദേവർശോല അബ്ദുസ്സലാം മുസ്‌ലിയാർ നിർവഹിക്കുന്നു

#SYSServiceDay, #Kasaragod, #CommunitySupport, #SocialService, #ReliefActivities, #FoodDistribution