നിയമ പാലകര്‍ നീതി നടപ്പിലാക്കണം: എസ്.ഡി.പി.ഐ പോലീസ് സ്‌റ്റേഷൻ മാര്‍ച്ച് നടത്തി

കാസര്‍കോട്: പോലീസ് നീതി നടപ്പിലാക്കണമെന്നാവശ്യപ്പെട്ട് എസ്.ഡി.പി.ഐ മൊഗ്രാല്‍ പുത്തൂര്‍ പഞ്ചായത്ത് കമ്മിറ്റിയുടെ ആഭിമുഖ്യത്തില്‍ കാസര്‍കോട് ടൗണ്‍ പോലീസ് സ്‌റ്റേഷനിലേക്ക് മാര്‍ച്ച് നടത്തി.

മൊഗ്രാല്‍ പുത്തൂര്‍ പ്രദേശത്ത് വീട് കയറി ഗുണ്ടായിസം നടപ്പിലാക്കുന്നവരെ അറസ്റ്റ് ചെയ്യാന്‍ പോലീസ് മടിക്കാണിക്കുകയും 14-ാം വാര്‍ഡ് ഗ്രാമസഭ ചേരാതെ മിനുട്‌സ് എഴുതിയതിനെ ചോദ്യം ചെയ്ത എസ്.ഡി.പി.ഐ പ്രവര്‍ത്തകരെ ഇല്ലാത്ത കഥകള്‍ മെനഞ്ഞു ജാമ്യമില്ലാ വകുപ്പ് ചാര്‍ത്തി ജയിലില്‍ അടക്കുകയും ചെയ്ത പോലീസ് നടപടി ഇരട്ട നീതിയാണെന്നും നീതി നടപ്പിലാക്കാന്‍ നിയമപാലകര്‍ മുന്നോട്ടുവരണമെന്നും ജില്ലാ സെക്രട്ടറി എ എച്ച് മുനീര്‍ പറഞ്ഞു.
പോലീസ് സ്‌റ്റേഷനിലേക്ക് എസ്.ഡി.പി.ഐ നടത്തിയ മാര്‍ച്ച് ഉത്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മണ്ഡലം പ്രസിഡന്റ് അബ്ദുല്ല എരിയാല്‍ അധ്യക്ഷതവഹിച്ചു. ഏരിയ ജനറല്‍ സെക്രട്ടറി
 വൈ മുഹമ്മദ്, നസീര്‍ കല്ലങ്കൈ, ലത്തീഫ് എരിയാല്‍ നേതൃത്വം നല്‍കി.

ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.