കുട്ടികളുമായി പോവുകയായിരുന്ന സ്‌കൂള്‍ ബസിന്റെ ടയര്‍ ഊരിത്തെറിച്ചു; ദുരന്തം ഒഴിവായി

By Web Desk - MainAug 8, 2019, 11:53 IST

കുണ്ടംകുഴി: (www.kasargodvartha.com 08.08.2019) നിറയെ കുട്ടികളുമായി പോവുകയായിരുന്ന സ്‌കൂള്‍ ബസിന്റെ ടയര്‍ ഊരിത്തെറിച്ചു. ഭാഗ്യം കൊണ്ടാണ് വന്‍ ദുരന്തം ഒഴിവായത്. മുന്നാട് പുത്യയില്‍ ബുധനാഴ്ച രാവിലെയാണ് അപകടമുണ്ടായത്. കുണ്ടംകുഴി ഗവ. ഹയര്‍ സെക്കന്‍ഡറി സ്‌കൂള്‍ ബസിന്റെ ടയറാണ് ഊരിത്തെറിച്ചത്. ഡ്രൈവര്‍ വാഹനം പെട്ടെന്ന് നിര്‍ത്തിയതിനാല്‍ അപകടം സംഭവിച്ചില്ല. കുട്ടികളെ മറ്റൊരു ബസില്‍ സ്‌കൂളിലെത്തിച്ചു.

പിറകു വശത്തെ ടയറുകളില്‍ ഒന്നിന്റെ ബോള്‍ട്ട് മുറിഞ്ഞതിനെ തുടര്‍ന്ന് ടയര്‍ ഊരിത്തെറിക്കുകയായിരുന്നു. പിറകിലെ ചക്രം പഞ്ചറാവുകയും ചെയ്തു. എട്ടു വര്‍ഷം പഴക്കമുള്ള ബസാണിത്. സ്‌കൂളിലെ വാഹനങ്ങള്‍ കൃത്യമായ ഇടവേളകളില്‍ പരിശോധന നടത്താറുണ്ടെന്നും കേടുപാടുകള്‍ പരിഹരിക്കാറുണ്ടെന്നും സ്‌കൂള്‍ അധികൃതര്‍ പറഞ്ഞു.