Environment | പ്ലാസ്റ്റിക് മാലിന്യത്തിൽ വീർപ്പുമുട്ടുന്ന തീരങ്ങൾക്ക് മോചനം! സർക്കാർ പദ്ധതി വരുന്നു ​​​​​​​

കാസർകോട്: (KasargodVartha) കേരളത്തിലെ മാലിന്യം നിറഞ്ഞ കടലിനെയും കടലോരത്തെയും പ്ലാസ്റ്റിക് മുക്തമാക്കി സ്വാഭാവിക ആവാസ വ്യവസ്ഥ വീണ്ടെടുക്കാൻ സംസ്ഥാന സർക്കാർ ഫിഷറീസ് വകുപ്പ് ‘ശുചിത്വ സാഗരം സുന്ദര തീരം’ എന്ന ബൃഹദ് പദ്ധതിക്ക് തുടക്കം കുറിക്കുന്നു. മൂന്ന് ഘട്ടങ്ങളിലായി നടപ്പിലാക്കുന്ന ഈ പദ്ധതിയിൽ മത്സ്യത്തൊഴിലാളികൾ, സന്നദ്ധ സംഘടനകൾ, തദ്ദേശസ്ഥാപനങ്ങൾ, രാഷ്ട്രീയ പ്രസ്ഥാനങ്ങൾ തുടങ്ങി സമൂഹത്തിലെ എല്ലാ വിഭാഗങ്ങളുടെയും സഹകരണം ഉറപ്പാക്കും.

പദ്ധതിയുടെ ആദ്യ ഘട്ടം ബോധവൽക്കരണ പരിപാടികൾക്കാണ് ഊന്നൽ നൽകുന്നത്. തീരദേശങ്ങളിൽ ലഘുലേഖ വിതരണം, നാടകങ്ങൾ, കലാപരിപാടികൾ, തീരദേശ നടത്തം, ബൈക്ക് റാലികൾ എന്നിവ സംഘടിപ്പിക്കും. രണ്ടാം ഘട്ടത്തിൽ മാലിന്യ ശേഖരണവും പുനരുപയോഗവുമാണ് ലക്ഷ്യമിടുന്നത്. ഇതിനായി ക്ലീൻ കേരള കമ്പനി, ശുചിത്വ മിഷൻ എന്നിവയുടെ സഹായം തേടും. കേരളത്തിൻ്റെ 590 കിലോമീറ്റർ ദൈർഘ്യമുള്ള തീരപ്രദേശം ഇതിലൂടെ പ്ലാസ്റ്റിക് മുക്തമാക്കും. ഓരോ കിലോമീറ്ററും അടയാളപ്പെടുത്തി, ഓരോ കിലോമീറ്ററിലും പ്രവർത്തനങ്ങൾക്കായി 25 സന്നദ്ധ പ്രവർത്തകർ വീതമുള്ള 483 ആക്ഷൻ ഗ്രൂപ്പുകളെ സജ്ജമാക്കും.

പ്ലാസ്റ്റിക് മാലിന്യം ശേഖരിക്കുന്നതിന് തീരദേശ മേഖലയിലെ ജനസാന്ദ്രതയുള്ള പ്രദേശങ്ങളിൽ 1200 ബോട്ടിൽ ബൂത്തുകൾ സ്ഥാപിക്കും. തുടർന്ന് ഹാർബറുകൾ കേന്ദ്രീകരിച്ച് മൂന്നാം ഘട്ട മാലിന്യ ശേഖരണം നടക്കും. മന്ത്രിമാർ, എംഎൽഎമാർ, തദ്ദേശസ്വയംഭരണ സ്ഥാപനങ്ങളിലെ ജനപ്രതിനിധികൾ എന്നിവരും ഈ പദ്ധതികളിൽ പങ്കാളികളാകും.

ശുചിത്വ സാഗരം സുന്ദര തീരം പദ്ധതിയുടെ രണ്ടാം ഘട്ട പ്രവർത്തനങ്ങൾ ഈ മാസം 11ന് ആരംഭിക്കും. രാവിലെ ഏഴ് മണി മുതൽ വൈകുന്നേരം 5 മണി വരെ കേരളത്തിൻ്റെ തെക്ക് കൊല്ലങ്കോട് മുതൽ വടക്ക് മഞ്ചേശ്വരം വരെയുള്ള കടൽത്തീരത്ത് 483 കേന്ദ്രങ്ങളിലായി പന്ത്രണ്ടായിരത്തോളം സന്നദ്ധ പ്രവർത്തകരുടെ സഹകരണത്തോടെയാണ് പദ്ധതി നടപ്പിലാക്കുകയെന്ന് ഫിഷറീസ് വകുപ്പ് അധികൃതർ അറിയിച്ചു. പ്ലാസ്റ്റിക് മാലിന്യം കൊണ്ട് നിറഞ്ഞിരിക്കുന്ന കാസർകോട്ടെ തീരങ്ങൾ ഉൾപ്പെടെയുള്ള പ്രദേശങ്ങൾക്ക് ഈ പദ്ധതി ഒരു വലിയ ആശ്വാസമായേക്കും.

The Kerala government's Fisheries Department is launching 'Shuchithwa Sagaram Sundara Theeram', a large-scale project to clean the state's coasts of plastic waste. The three-phase initiative involves awareness campaigns, waste collection and recycling, aiming to make Kerala's 590 km coastline plastic-free with the cooperation of various stakeholders. The second phase starts on April 11.

#CoastalCleanup #Kerala #PlasticFreeCoast #ShuchithwaSagaram #Environment #FisheriesDepartment