Environmental Initiative | സ്‌കൂൾ കലോത്സവത്തിനായി വിത്തുകൾ നിറച്ച പേപ്പർ പേന റെഡി

കാസർകോട്: (KasargodVartha) ജില്ലാ സ്‌കൂൾ കലോത്സവം ഈ വർഷവും പരിസ്ഥിതി സൗഹൃദമായി മാറാൻ ശ്രമങ്ങൾ ആരംഭിച്ചു. സ്‌കൂളിലെ പരിസ്ഥിതി ക്ലബ്ബ് അംഗങ്ങൾ ചേർന്ന് 500-ഓളം പലതരത്തിലുള്ള വിത്തുകൾ നിറച്ച പേപ്പർ പേനകൾ തയ്യാറാക്കിയത് കലോത്സവത്തിന് പുതുമയേകുന്നു.

പ്ലാസ്റ്റിക് പേനകൾ ഉപേക്ഷിച്ച് പേപ്പർ പേനകൾ ഉപയോഗിക്കുന്നതിലൂടെ, പരിസ്ഥിതി മലിനീകരണം കുറയ്ക്കുകയും പുതിയ തലമുറയിൽ പരിസ്ഥിതി സംരക്ഷണ ബോധം വളർത്തുകയും ചെയ്യുക എന്നതാണ് ഈ പദ്ധതിയുടെ ലക്ഷ്യം. സ്‌കൂൾ അധ്യാപിക സജിത.പി, ഗ്രീൻ പ്രോട്ടോക്കോൾ കമ്മറ്റി കൺവീനർ മനോജ് പിലിക്കോട് എന്നിവരുടെ നേതൃത്വത്തിലാണ് ഈ പദ്ധതി വിജയകരമായി നടപ്പിലാക്കിയത്.

കലോത്സവം വേദിയിൽ പേപ്പർ പേനകൾ വിതരണം ചെയ്യുന്നതിലൂടെ, കലോത്സവം ഒരു ഹരിത മേളയായി മാറും. ഈ പദ്ധതി മറ്റ് സ്‌കൂളുകൾക്കും പ്രചോദനമാകുമെന്നും പ്രതീക്ഷിക്കുന്നു. മുൻ വർഷങ്ങളിലും ഇത്തരം പേനകൾ നിർമിച്ചു വിദ്യാർഥികൾ കയ്യടിനേടിയിരുന്നു.

 #GreenInitiative, #EcoFriendly, #Sustainability, #SeedPens, #Kasargod, #SchoolFestival