Pollution Issue | മൊഗ്രാൽ പുഴയോരത്ത് കൂടി നടക്കണമെങ്കിൽ മൂക്ക് പൊത്തണം; മാലിന്യങ്ങൾ വലിച്ചെറിയുന്നത് പതിവ്

മൊഗ്രാൽ: (KasargodVartha) സർക്കാർ 'മാലിന്യമുക്ത നവകേരളം' എന്ന ലക്ഷ്യത്തോടെ വിപുലമായ പദ്ധതികൾ നടപ്പിലാക്കുമ്പോഴും, മൊഗ്രാൽ പുഴയോരത്ത് കൂടി നടക്കണമെങ്കിൽ മൂക്ക് പൊത്തണം. പൊതുയിടങ്ങളിലും, ജലാശയങ്ങളിലും മാലിന്യം വലിച്ചെറിയുന്നവർക്കെതിരെ സർക്കാർ നിർദേശ പ്രകാരം ജില്ലാ ഭരണകൂടവും, ത്രിതല പഞ്ചായത്തും, ആരോഗ്യവകുപ്പും, എൻഫോഴ്സ്മെന്റ് സ്‌ക്വാഡും, ഹരിത കർമ്മ സേനയും നടപടികൾ കടുപ്പിക്കുമ്പോഴും ഇതൊന്നും തങ്ങൾക്ക് ബാധകമല്ലെന്ന നിലയിലാണ് മാലിന്യങ്ങൾ പുഴയോരത്തേക്ക് വലിച്ചെറിയുന്നത്. 

മൊഗ്രാൽ പുഴയോരം ഇപ്പോഴും മാലിന്യ നിക്ഷേപ കേന്ദ്രമായി മാറിയിരിക്കുന്നു. ഭക്ഷണാവശിഷ്ടങ്ങൾ, പ്ലാസ്റ്റിക് കവറുകൾ തുടങ്ങിയവ ചാക്കുകളിലാക്കി പുഴയോരത്ത് വലിച്ചെറിയുന്നത് സാധാരണമായി മാറിയിരിക്കുന്നു. ഇത് ദുർഗന്ധം പരത്തുന്നതോടെ പുഴയോരത്ത് കൂടി നടന്നു പോകാൻ പറ്റാത്ത അവസ്ഥയാണുള്ളത്. ഇത് പുഴയുടെ ആവാസവ്യവസ്ഥയെയും പ്രതികൂലമായി ബാധിക്കുന്നു.

കണ്ടൽക്കാടുകൾക്ക് സംരക്ഷണ കവചം ഒരുക്കുന്ന ഈ പ്രദേശത്ത് മാലിന്യം വലിച്ചെറിയുന്നത് വലിയൊരു പാരിസ്ഥിതിക പ്രശ്നമാണ്. അധികൃതർ കർശന നടപടികൾ സ്വീകരിച്ചിട്ടും മാലിന്യം വലിച്ചെറിയുന്ന സംസ്കാരത്തിന് ഒരു കുറവും സംഭവിച്ചിട്ടില്ല എന്നതാണ് യാഥാർത്ഥ്യം. മൊഗ്രാൽ പുഴയെയും വായുവിനെയും വെള്ളത്തെയും മലിനമാക്കുന്നവർക്കെതിരെ കർശന നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.

 #MogralRiver #Pollution #WasteManagement #Kerala #GarbageDisposal #EnvironmentalProtection