മൈനോറിറ്റി കോണ്‍ഗ്രസിനോട് ഡി സി സിയുടെ അവഗണന; സംസ്ഥാന നേതൃത്വം രേഖാമൂലം ഉറപ്പുതന്നില്ലെങ്കില്‍ പാര്‍ട്ടിയുമായി സഹകരിക്കുന്ന കാര്യം പുനരാലോചിക്കുമെന്ന് ജില്ലാ വൈസ് ചെയര്‍മാന്‍

കാസര്‍കോട്: (www.kasargodvartha.com 05.04.2019) മൈനോറിറ്റി കോണ്‍ഗ്രസിനോട് ഡി സി സി അവഗണന കാണിക്കുന്നുവെന്ന പരാതിയുമായി ജില്ലാ വൈസ് ചെയര്‍മാന്‍ ഹബീബ് ബെണ്ടിച്ചാല്‍ രംഗത്തെത്തി. 400 ഓളം അംഗങ്ങളുള്ള മൈനോറിറ്റി കോണ്‍ഗ്രസിന് ഡി സി സി ഓഫീസില്‍ പ്രത്യേക ക്യാബിനോ പ്രവര്‍ത്തിക്കാനുള്ള അടിസ്ഥാന സൗകര്യമോ ജില്ലാ നേതൃത്വം ഒരുക്കിക്കൊടുന്നില്ലെന്ന് ജില്ലാ വൈസ് ചെയര്‍മാന്‍ വാര്‍ത്താ സമ്മേളനത്തില്‍ കുറ്റപ്പെടുത്തി.

ആറു വര്‍ഷമായി കെ പി സി സി എക്‌സിക്യൂട്ടീവ് അംഗമെന്ന നിലയിലും ജില്ലാ വൈസ് ചെയര്‍മാനെന്ന നിലയിലും താന്‍ പ്രവര്‍ത്തിക്കുന്നു. പോഷക സംഘടനയുടെ പ്രവര്‍ത്തനങ്ങള്‍ കാര്യക്ഷമമാക്കാന്‍ പലതവണ ഡി സി സിയുടെ സഹായം അഭ്യര്‍ത്ഥിച്ചിട്ടും അതൊന്നും പാലിക്കുന്നില്ല. യു ഡി എഫ് സ്ഥാനാര്‍ത്ഥിയുടെ വിജനയത്തിന് സജീവമായി തന്നെ ഇപ്പോള്‍ രംഗത്തുണ്ടെങ്കിലും ഒരാഴ്ചക്കുള്ളില്‍ രേഖാമൂലം ഉറപ്പ് നല്‍കിയില്ലെങ്കില്‍ തിരഞ്ഞെടുപ്പ് പ്രചരണ പരിപാടിയിലും മറ്റും നിസഹകരിക്കും. വാക്കാല്‍ ഡി സി സി നേതൃത്വം ഇക്കാര്യത്തില്‍ ഉറപ്പുനല്‍കിയിട്ടുണ്ടെന്നും ഹബീബ് ബെണ്ടിച്ചാല്‍ കൂട്ടിച്ചേര്‍ത്തു.