Inauguration | മടിക്കൈ പുളിക്കാൽ പാലം മന്ത്രി പി എ മുഹമ്മദ് റിയാസ് ഉദ്ഘാടനം ചെയ്തു; മലയോര മേഖലയ്ക്ക് പുതുജീവൻ

നീലേശ്വരം: (KasargodVartha) മലയോര മേഖലയിലേക്കുള്ള ഗതാഗത സൗകര്യം വൻതോതിൽ മെച്ചപ്പെടുത്തുന്ന തരത്തിൽ മടിക്കൈ പുളിക്കാൽ ചാലിന് കുറുകെ നിർമിച്ച പുതിയ പാലം പൊതുമരാമത്ത് - വിനോദസഞ്ചാര മന്ത്രി പി എ  മുഹമ്മദ് റിയാസ് ഉദ്ഘാടനം ചെയ്തു. വർഷങ്ങളോളം നാട്ടുകാർ കാത്തിരുന്ന ഈ പദ്ധതിയുടെ പൂർത്തീകരണം പ്രദേശവാസികൾക്ക് വലിയ ആശ്വാസമായി.

കാലപ്പഴക്കത്തിൽ അപകടാവസ്ഥയിലായ പഴയ ക്രോസ്ബാർ കം ബ്രിഡ്ജ് പൊളിച്ചാണ് പുതിയ പാലം നിർമിച്ചത്. പഴയ പാലത്തിലൂടെ ഗതാഗതം നിരോധിച്ചതോടെ പ്രദേശവാസികൾക്ക് വലിയ ബുദ്ധിമുട്ടുകൾ നേരിടേണ്ടി വന്നിരുന്നു. പുതിയ പാലത്തിന്റെ നിർമാണം വഴി നീലേശ്വരം-എരിക്കുളം-കാഞ്ഞിരപ്പൊയിൽ റോഡിൽ ഗതാഗതം സുഗമമാകുമെന്നാണ് പ്രതീക്ഷ. 

പടന്നക്കാട്-വെള്ളരിക്കുണ്ട് റോഡ് വികസന പദ്ധതിയുടെ ഭാഗമായാണ് പുളിക്കാൽ പാലം നിർമ്മിച്ചത്. റോഡ് വീതികൂട്ടി കയറ്റിറക്കവും വളവും കുറച്ചാണ് പദ്ധതി നടപ്പാക്കുന്നത്. 3.29 കോടി രൂപ ചിലവിലാണ് പുളിക്കാൽ പാലം പൂർത്തിയായത്. മടിക്കൈ-കോടോം ബേളൂർ-കിനാനൂർ കരിന്തളം പഞ്ചായത്തുകളിലൂടെയാണ് ഈ പാത കടന്നുപോകുന്നത്. 

ഈ പദ്ധതിയിലൂടെ മലയോര മേഖലയിലെ ജനജീവനം കൂടുതൽ സുഗമമാകുമെന്ന് മന്ത്രി പറഞ്ഞു. പദ്ധതി നടപ്പാക്കുന്നതിൽ സഹകരിച്ച എല്ലാവർക്കും അദ്ദേഹം നന്ദി അറിയിച്ചു. ചടങ്ങിൽ ഇ ചന്ദ്രശേഖരൻ എംഎൽഎ, ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ തുടങ്ങിയവർ പങ്കെടുത്തു.

 #Kasargod #PulikalBridge #Kerala #TrafficImprovement #Infrastructure #Minister