ബിംബകല്‍പനയില്‍ പുതിയ ഭാഷ സൃഷ്ടിച്ച കവിയായിരുന്നു മഹാകവി പി. കുഞ്ഞിരാമന്‍ നായര്‍ -കവി പി രാമന്‍

കാസര്‍കോട്: (www.kasargodvartha.com 04.11.2019) ബിംബകല്‍പനയില്‍ പുതിയ ഭാഷ സൃഷ്ടിച്ച കവിയായിരുന്നു മഹാകവി പി. കുഞ്ഞിരാമന്‍ നായരെന്ന് കവി പി രാമന്‍ അഭിപ്രായപ്പെട്ടു. കേരള കേന്ദ്ര സര്‍വകലാശാല മലയാള വിഭാഗത്തില്‍ പി. സാഹിത്യവേദിയുമായി സഹകരിച്ച് നടത്തിയ പി. സ്മൃതി ദിനത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം.

യാതൊരു യുക്തിക്കും വഴങ്ങാത്ത കവിതയുടെ പൂനിലാപൈമ്പാലാണ് പി. യുടെ കവിത. 'ഒറ്റ രാവിലെ പൂമരങ്ങളായ് വിത്തുകളൊക്കെയും' എന്ന അപൂര്‍വ ബിംബകല്‍പനകള്‍ പി.യുടെ കവിതയില്‍ കാണാം. കുട്ടിത്തം, കവിത്വം, പൊരുത്തം ഇവ മൂന്നും ചേരുന്നതാണ് പി.യുടെ മാനസികാവസ്ഥ. പരമ്പരാഗത സങ്കല്‍പങ്ങളെ തകിടം മറിക്കുന്ന കവിതകളായിരുന്നു അവ. സൗന്ദര്യത്തെക്കുറിച്ചുള്ള മായിക സങ്കല്‍പങ്ങള്‍ അവയില്‍ കാണാം. പുതുകവികളില്‍ സാമര്‍ഥ്യവും ബുദ്ധിജീവിത്തവും മാത്രമാണുള്ളത്. എവിടെയും ഓടി നടക്കുന്ന ആനന്ദക്കുട്ടന്മാരാണ് പി. കവിതയില്‍ കാണുന്നതെന്നും പി രാമന്‍ പറഞ്ഞു.

പ്രൊഫ. (ഡോ.) എന്‍ അജിത്കുമാര്‍ അധ്യക്ഷത വഹിച്ചു. പി.യുടെ മകന്‍ വി രവീന്ദ്രന്‍ മാഷ്, പി ബാലകൃഷ്ണന്‍ നായര്‍, പി രാധ, ഡോ. ദേവി കെ എന്നിവര്‍ സംസാരിച്ചു.