Golden Jubilee | കാഞ്ഞങ്ങാട് സംയുക്ത മുസ്‌ലിം ജമാഅത്തിന്റെ സുവർണ ജൂബിലി ആഘോഷങ്ങൾക്ക് വ്യാഴാഴ്ച തുടക്കം

കാഞ്ഞങ്ങാട്: (KasargodVartha) സംയുക്ത മുസ്‌ലിം ജമാഅത്തിന്റെ ഒരു വർഷം നീണ്ടു നിൽക്കുന്ന സുവർണ്ണ ജൂബിലി ആഘോഷങ്ങൾക്ക് വ്യാഴാഴ്ച തുടക്കമാവും. സുവർണ്ണ ജൂബിലി ഉദ്ഘാടന മഹാ സമ്മേളനത്തിനും ആസ്ഥാന മന്ദിര പുനർനിർമ്മാണ ശിലാസ്ഥാപന കർമ്മത്തിനും ഒരുക്കങ്ങൾ പൂർത്തിയായതായി കാഞ്ഞങ്ങാട് സംയുക്ത മുസ്‌ലിം ജമാഅത്ത് ഭാരവാഹികൾ വാർത്താസമ്മേളനത്തിൽ അറിയിച്ചു.

അമ്പതാണ്ടുകൾക്ക് മുമ്പ് കാഞ്ഞങ്ങാട്, പരിസരപ്രദേശങ്ങളിലെ മുസ്‌ലിം മഹല്ലുകളെ ഏകീകരിക്കുന്നതിനും അവക്ക് ശാസ്ത്രീയമായ ഒരു ഐക്യ രൂപം ഉണ്ടാക്കുന്നതിനും വേണ്ടി സ്ഥാപിതമായ സംയുക്ത മുസ്‌ലിം ജമാഅത്ത്, ഈ വർഷങ്ങളായി അനുഭവപ്പെടുന്ന സമഗ്രമായ സാമൂഹിക പരിവർത്തനത്തിന്റെ പാരമ്പര്യത്തെ അനുസ്മരിച്ചാണ് സുവർണ്ണ ജൂബിലി ആഘോഷിക്കുന്നത്. 

കഴിഞ്ഞ അരനൂറ്റാണ്ടിൽ, സമുദായത്തിനും സമൂഹത്തിനും വേണ്ടി പ്രാധാന്യമാർന്ന പ്രവർത്തനങ്ങൾ നടത്തിയ ജമാഅത്ത്, വ്യക്തികളും മഹല്ലുകളും തമ്മിലുള്ള പ്രശ്നങ്ങൾ പരിഹരിക്കാനും  അതുപോലെ, അനന്തരാവകാശ വിഭജനം സംബന്ധിച്ച് ഉണ്ടാകുന്ന തർക്കങ്ങളും ഇടപെട്ട് പരിഹരിക്കാൻ സ്ഥിരം സംവിധാനം ഉണ്ട് എന്നതും അത്തരമൊരു സംവിധാനത്തിലൂടെ മൂവായിരത്തിൽപരം പരാതികൾക്ക് ഇതിനകം തീർപ്പ് കൽപ്പിക്കാൻ കഴിഞ്ഞു എന്നതും അനേകം പേരുകൾക്ക് സേവനം നൽകിയത് അഭിമാനകരമായ നേട്ടമായാണ് കാണപ്പെടുന്നതെന്ന് ഭാരവാഹികൾ പറഞ്ഞു.

കാഞ്ഞങ്ങാട് സംയുക്ത മുസ്‌ലിം ജമാഅത്ത് കേരളത്തിലെ ആദ്യത്തെ സംയുക്ത ജമാഅത്ത് ആണ്, ഇതിന്റെ പ്രവർത്തനങ്ങൾ തന്നെ മറ്റുള്ള സംയുക്ത ജമാഅത്തുകൾക്ക് മാതൃകയായി മാറിയിട്ടുണ്ട്. കേരള മുസ്ലിം ഡയറക്ടറിയിൽ കെ കെ മുഹമ്മദ് അബ്ദുൽ കരീം ചേർത്തു പറഞ്ഞത് പോലെ, ഏക സംയുക്ത ജമാഅത്ത് സംവിധാനമാണ് കാഞ്ഞങ്ങാട് സംയുക്ത മുസ്‌ലിം ജമാഅത്ത് എന്ന് നേതാക്കൾ അനുസ്മരിച്ചു.

പതിറ്റാണ്ടുകളായി കാഞ്ഞങ്ങാട്ടും പരിസരങ്ങളിലും ഉണ്ടായിട്ടുള്ള നിരവധി സാമൂഹിക പ്രശ്‌നങ്ങളിൽ കാഞ്ഞങ്ങാട് സംയുക്ത മുസ്‌ലിം ജമാഅത്ത് ഇടപെട്ടു. സമൂഹത്തെ പൊതുവായും സമുദായത്തെ പ്രത്യേകിച്ചും ബാധിക്കുന്ന സുപ്രധാനമായ വിഷയങ്ങളിൽ നിലപാടുകൾ സ്വീകരിച്ചുകൊണ്ട് സമൂഹത്തിന് കൃത്യമായ മാർഗ്ഗദർശനം നൽകുന്നതിനും സംയുക്ത ജമാഅത്തിന് സാധിച്ചിട്ടുണ്ട്. 

കാഞ്ഞങ്ങാട് സംയുക്ത മുസ്‌ലിം ജമാഅത്ത് കഴിഞ്ഞ 50 വർഷക്കാലയളവിനുള്ളിൽ നിരവധി ശ്രദ്ധേയമായ സമ്മേളനങ്ങളും പരിപാടികളും ചർച്ചകളും സൗഹൃദ സംഗമങ്ങളും സംഘടിപ്പിച്ചിട്ടുണ്ട്. 2015-ൽ നടന്ന 40-ാം വാർഷിക സമ്മേളനം കാഞ്ഞങ്ങാട് കണ്ട ഏറ്റവും വലിയ മതപരമായ സമ്മേളനമായി മാറിയെന്ന് അന്ന് വർത്താമാധ്യമങ്ങളൊക്കെ അഭിപ്രായപ്പെട്ടതാണ്.

2010-ൽ പാണക്കാട് സയ്യിദ് മുഹമ്മദ് ശിഹാബ് തങ്ങൾ ആരംഭിച്ച ‘സ്മാരക മംഗല്യനിധി’ പദ്ധതിക്ക് കീഴിൽ, സ്ത്രീകളുടെ വിവാഹത്തിന് സഹായമായി പത്തു വർഷങ്ങളായി ഒരു ലക്ഷം രൂപ വീതം അനുവദിക്കുന്ന പദ്ധതി 450ലധികം കുട്ടികൾക്ക് 4.5 കോടി രൂപ ചെലവഴിച്ചുവെന്ന് ഭാരവാഹികൾ അറിയിച്ചു. കാഞ്ഞങ്ങാട് സംയുക്ത മുസ്‌ലിം ജമാഅത്ത് 40-ാം വാർഷിക സമ്മേളനത്തോടനുബന്ധിച്ച് ആവിഷ്കരിച്ച ഭൂദാന പദ്ധതിയിൽ ഏതാണ്ട് അറുപതോളം കുടുംബങ്ങൾക്ക് 5 സെൻറ് ഭൂമിയും പതിച്ച് നൽകിയിട്ടുണ്ട്.

സുവർണ്ണ ജൂബിലി ഉദ്ഘാടനം:

വ്യാഴാഴ്ച, വൈകിട്ട് നാല് മണിക്ക്, മെട്രോ മുഹമ്മദ് ഹാജി നഗറിൽ നടക്കുന്ന സുവർണ്ണ ജൂബിലി ഉദ്ഘാടനം, പ്രസിഡന്റ് പാലക്കി സി കുഞ്ഞഹമ്മദ് ഹാജിയുടെ അധ്യക്ഷതയിൽ പാണക്കാട് സയ്യിദ് സ്വാദിഖ് അലി ശിഹാബ് തങ്ങൾ നിർവഹിക്കും. സയ്യിദ് ജിഫ്രി മുത്തുക്കോയ തങ്ങൾ ആസ്ഥാന മന്ദിര പുനർനിർമാണ ശിലാസ്ഥാപന കർമം നിർവഹിക്കും.

രാജ്മോഹൻ ഉണ്ണിത്താൻ എംപി, ഹാരിസ് ബീരാൻ എംപി, ഇ ചന്ദ്രശേഖരൻ എംഎൽഎ, എൻ എ നെല്ലിക്കുന്ന് എംഎൽഎ, അബ്ദുസ്സമദ് പൂക്കോട്ടൂർ, ശുഐബുൽ ഹൈതമി, പി എ ഉബൈദുള്ളാഹി നദ്‌വി, യു കെ മിർസാഹിദ് അൽ ബുഖാരി, ബിൽടെക് അബ്ദുല്ല, കല്ലട്ര മാഹിൻ ഹാജി, കെ എം ഷംസുദ്ദീൻ, കെ ഇ എ ബക്കർ തുടങ്ങിയവർ സമ്മേളനത്തിൽ സംബന്ധിക്കും.

പൂർത്തിയാക്കൽ പദ്ധതികൾ:

ആസ്ഥാന മന്ദിരം റമദാൻ കഴിഞ്ഞ് പൂർത്തിയാക്കാനും, റമദാനിനു ശേഷം വിവിധ സെഷനുകളും പരിപാടികളും ഉൾക്കൊള്ളുന്ന ഐതിഹാസികമായ സുവർണ്ണ ജൂബിലി സമാപന മഹാ സമ്മേളന പരിപാടികൾ ആവിഷ്കരിക്കാനാണ്  ജമാഅത്ത് നേതൃത്വത്തിന്റെ തീരുമാനം. നാല് മേഖലകളായി വിഭജിച്ച് മേഖല സമ്മേളനങ്ങളും പ്രചരണ വാഹന ജാഥകളും ഉൾപ്പെടെയുള്ള പരിപാടികളും കമ്മിറ്റി ആസൂത്രണം ചെയ്തിട്ടുണ്ട്. ആസ്ഥാന മന്ദിര നിർമാണത്തോടൊപ്പം തന്നെ, കമ്മിറ്റിക്ക് സ്ഥിര വരുമാനമുണ്ടാക്കാനുള്ള പദ്ധതികളെക്കുറിച്ചും കമ്മിറ്റി ആലോചിക്കുന്നു. ഈ പദ്ധതികൾ നടപ്പിലാക്കാനായി സുവർണ്ണ ജൂബിലിയോടനുബന്ധിച്ച് രണ്ടുകോടി രൂപ സമാഹരിക്കാൻ കമ്മിറ്റി ആഗ്രഹിക്കുന്നു.

സി കുഞ്ഞഹമ്മദ് ഹാജി പാലക്കി, ബഷീർ വെള്ളിക്കോത്ത്, എം കെ അബൂബക്കർ ഹാജി, മുബാറക് ഹസൈനാർ ഹാജി, ജാതിയിൽ ഹസൈനാർ ഹാജി, കെ ബി കുട്ടി ഹാജി, പി കെ അബ്ദുല്ലക്കുഞ്ഞി, ശരീഫ് എഞ്ചിനീയർ, റഷീദ് തോയമ്മൽ, കെ കെ അബ്ദുറഹ്മാൻ പാണത്തൂർ, താജ്ജുദ്ദീൻ കമ്മാടം, അബൂബക്കർ മാസ്റ്റർ തുടങ്ങിയവർ വാർത്താസമ്മേളനത്തിൽ പങ്കെടുത്തു.

#KanhangadJamaath #GoldenJubilee #MuslimCommunity #SocialChange #ReligiousCelebration #KeralaNews