പ്രമുഖ രാഷ്ട്രീയ നേതാവ് മരിച്ചതായുള്ള വ്യാജ സന്ദേശം ആശങ്കപരത്തി

കാസര്‍കോട്: കാസര്‍കോട് ജില്ലയിലെ പ്രമുഖ രാഷ്ട്രീയ നേതാവ് മരിച്ചതായുള്ള വ്യാജ സന്ദേശം ജനങ്ങളെയും പ്രവര്‍ത്തകരേയും ഒരേപോലെ ആശങ്കയിലാഴ്ത്തി. ചൊവ്വാഴ്ച പുലര്‍ചെ രണ്ട് മണിയോടെയാണ് ഇത്തരമൊരു സന്ദേശം വാട്ട്‌സ് ആപിലും, ഫേസ് ബുക്കിലും പ്രചരിച്ചത്.

ഇതേ തുടര്‍ന്ന് സത്യാവസ്ഥ അറിയാനായി 'കാസര്‍കോട് വാര്‍ത്ത'യടക്കമുള്ള മാധ്യമ ഓഫീസുകളിലേക്ക് നൂറുകണക്കിന് ഫോണ്‍ കോളുകളാണ് എത്തിയത്. നബിദിനാഘോഷ പരിപാടികള്‍ നടക്കുന്നതിനിടെയുണ്ടായ ഈ വ്യാജ പ്രചരണം മണിക്കൂറുകളോളം ആളുകളെ ആശങ്കയുടെ മുള്‍മുനയിലാക്കി.

ഗള്‍ഫ് നാടുകളിലും ഇത്തരത്തിലുള്ള പ്രചരണം നടന്നതായി സൂചനയുണ്ട്. പാര്‍ട്ടിയുടെ പല നേതാക്കള്‍ളും വാര്‍ത്ത ശരിയല്ലെന്ന് അറിയിച്ചെങ്കിലും വിശ്വാസം വരാതെ പലരും നേരിട്ട് നാട്ടിലെ അടുത്ത ബന്ധുക്കളെ വിളിച്ച് പ്രചരണം സത്യമാണോ എന്ന് അന്വേഷിക്കുകയുംചെയ്തു.

ആരാധനാലയങ്ങളില്‍ നിന്നുപോലും സന്ദേശത്തിന്റെ നിജസ്ഥിതി അറിയാനായി അന്വേഷണം ഉണ്ടായിരുന്നു. ഇത്തരം വ്യാജ പ്രചരണം നടത്തുന്നത് ആരാണെന്ന് അന്വേഷിച്ച് കണ്ടെത്തണമെന്നാണ് പാര്‍ട്ടി പ്രവര്‍ത്തകര്‍ ആവശ്യപ്പെടുന്നത്. ഫേസ് ബുക്കിലെ ഒരു ഗ്രൂപ്പില്‍ ഈ വ്യാജ സന്ദേശം നല്‍കിയവര്‍ പിന്നീട് ഇത് നീക്കംചെയ്തു.

നേരത്തെ മറ്റൊരു പ്രമുഖ നേതാവ് ശ്വാസംമുട്ടലിന് നെബുലേസര്‍ നല്‍കിയപ്പോള്‍ അതിന്റെ ചിത്രം എടുത്ത് ഇദ്ദേഹം അത്യാസന്ന നിലയിലാണെന്ന വ്യാജ പ്രചരണവും ചിലര്‍ നടത്തിയിരുന്നു. അപകട സ്ഥലത്തും മോര്‍ച്ചറിയിലും രക്തം വാര്‍ന്നൊഴുകുന്നതിന്റേയും ചിന്നിചിതറിയ ശരീര ഭാഗങ്ങളുടേയും ചിത്രങ്ങളെടുത്ത് ഫേസ് ബുക്കിലിടുന്നവരുടെ എണ്ണവും വര്‍ധിച്ചിട്ടുണ്ട്. ഇത് നിയന്ത്രിക്കുന്നതിന് നടപടി സ്വീകരിച്ചില്ലെങ്കില്‍ ഭാവിയില്‍ ഗുരുതരമായ വിപത്തായിരിക്കും നേരിടേണ്ടി വരികയെന്ന് മറ്റൊരു പ്രമുഖ നേതാവ് പ്രതികരിച്ചു.
ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.

Advertisement: